Өткен аптада Тараз қаласындағы Абай атындағы орталық кітапханада Тараз қалалық ардагерлер кеңесінің және аталған кітапхана ұжымының бірлесе ұйымдастыруымен «Тәуелсіздік — Мәңгілік ел мұраты » деген тақырыпта «дөңгелек үстел» отырысы өтті. Басқосуда оған қатысушылар тәуелсіз еліміздің тарихы, егемендік жылдарындағы қолжеткен жетістіктер, бүтіндей жаңа ұрпақтың қалыптасуы туралы ой-пікірлерін ортаға салды.
Казақстанның тәуелсіз ел ретінде жүріп өткен 30 жылында адам да өзгерді, заман да өзгерді. Кешегі өтпелі кезеңде қирап қалған ауылдар мен қалалардың орнына бітімі бөлек, бейнесі өзгеше жаңа шаһарлар салынды, елді мекендер қатар түзеді. Жоспарлы экономиканың құрсауында болған адамдарымыз еркін еңбектің көрігін қыздырды. Жаңа ұғымдар, жаңа көзқарастар, жаңа пайымдар пайда болды.
«Дөңгелек үстел» отырысына қатысушы ардагерлер «30 жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекетімізді нығайту үшін жастарымыз не істей алады?» деген сұрақтар төңірегінде ой өрбітті, пікір қозғады.
Кездесуді жүргізген кітапхана директорының орынбасары Назым Мұхамедиярова қатысушыларды сөзге тартып, ойға ой қосып, әңгімені жандандырып отырды.
«Дөңгелек үстел» отырысында сөз алған еңбек ардагерлері Мақұлбек Жаналиев, Қанымкүл Бейсембаева, Сауранбек Жамалбеков, Ескермес Жантенов, Сайлаухан Ашановтар тәуелсіздік жайлы ой толғап, жаңарған, жасарған еліміздің жарқын болашағы туралы тағылымды әңгімелер айтты.
Жастар жағы да пікір алмасудан шет қалмады. «Жамбыл» телеарнасының жүргізушісі Риналь Рахматуллин және Тәуелсіздіктің құрдасы (1991 жылы 16 желтоқсанда туған) Жамбыл электр жүйесі кәсіпорнының бөлімше басшысы Еркебұлан Мұқанов тәуелсіз еліміздің гүлденуі мен көркейуі жолында еңбек етіп жатқан жастар туралы ой қозғады.
Жиында сөз сөйлеген Тараз қалалық ардагерлер кеңесі төрағасының орынбасары Күләш Әбдікешова мен Абай атындағы орталық кітапхана директоры Ұлбосын Сәулебаева мәңгілік ел мұраты болып табылатын тәуелсіздік туралы толғаныстарын білдірді
Алдаберді Мақашев,
Тараз қалалық ардагерлер кеңесінің мүшесі
Ғұмыр дария. – 2021. – 25 ақпан
