Биыл 16 мамырда Президент Қасым-Жомарт Тоқаев «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлыққа қол қойған болатын. Осыған орай Тараз қаласындағы «Ұлы дала» кітапханасында бірнеше жыр жинағының авторы, ақын, журналист, Қазақстан Жазушылар одағының мүшесі, ҚР Мәдениет саласының үздігі, ҚР Ақпарат саласының үздігі Ғайни Әлімбекқызымен «Қаламы — сырлас, сөзі — шындық» атты әдеби-шығармашылық кездесу кеші өтті.

   Кештің ашылу салтанатында сөз алған ҚР мәдениет қайраткері, сазгер Дүйсенәлі Бықыбаев ақынның сырлы сөзіне жазылған әндерге тоқталып, Ғайни Әлімбекқызының шығармашылық қыры туралы әңгімеледі.

— Ғайни Әлімбекқызы — ең әуелі лирик ақын. Оның қаламынан туған сыршыл да сезімге толы өлеңдері оқырмандардың ыстық ықыласына бөленіп келеді. Ақын жырларынан адам жанының нәзік иірімдерін, өмірге деген сүйіспеншілікті, туған жерге деген сағыныш пен азаматтық ұстанымды аңғаруға болады.

Журналистика саласында да өзіндік қолтаңбасын қалыптастырып, талай жарқын жобаларды жүзеге асырды. Оның телеарнадағы шығармашылық ізденістері мен еңбегінің нәтижесінде дүниеге келген бағдарламалар бүгінде телеарнаның алтын қорындағы бағалы туындыларға айналды десек, артық айтқандық емес.

Біз Ғайни Әлімбекқызымен шығармашылық байланыста болып, бірлесіп біраз ән жаздық. Сол әндеріміз бүгінде тыңдарман жүрегіне жол тауып, шырқалып жүр. Алдағы уақытта да бірлескен жұмыстарымыз жалғасын табады деген сенім бар. Жақында туған облысымызға арнаған тағы бір әніміз тыңдарманға жол тартады.

Бүгінгідей кездесулердің маңызы әрдайым ерекше. Әсіресе жастардың елге танымал, шығармашылығымен және еңбегімен көпке үлгі болған тұлғалармен жүздесуі олардың дүниетанымын кеңейтіп, өнерге, білімге және ізденіске деген қызығушылығын арттырады. Өмір жолы қалыптасқан азаматтардың тәжірибесін тыңдау, олардың жетістіктері мен шығармашылық ізденістерінен тағылым алу жас ұрпақтың тұлға болып қалыптасуына оң ықпал етеді деп сенеміз, — деді Дүйсенәлі Дыбысалыұлы.

Кездесу барысында кеш қонағы Ғайни Әлімбекқызы өзінің шығармашылық өмірі мен журналистік тәжірибесі туралы сыр бөлісіп, оқырмандардың сұрақтарына жауап берді. Сонымен қатар кітапхана қызметкерлері ақынның сезімге толы жырларын нақышына келтіріп оқып, сөзіне жазылған әндерді орындады.

Кеш соңында «Сырлы сөздің салмағы» атты кітап көрмесі көрермен назарына ұсынылып, оқырмандарға ақынның шығармашылығымен танысуға мүмкіндік берілді.

  Жұмаш Жолболды

Jambyl-Taraz. — 2026. — 23 қазан (№84). — 48 б.

      Жуырда «Анаға тағзым» облыстық отбасылық даму әлеуметтік орталығында М.Әуезов атындағы кітапхананың ұйымдастыруымен «Бата — балаға мәңгі құт» атты дәстүрді дәріптеу кеші өтті.

Тағылымды басқосудың негізгі мақсаты — халқымыздың ғасырлар бойы қалыптасқан бата беру дәстүрін дәріптеу, ұлттық құндылықтарды кеңінен насихаттау, жас ұрпақтың бойына ата дәстүрді сіңіру және үлкенді құрметтеу мәдениетін қалыптастыру.

Іс-шара барысында қазақ халқының салт-дәстүрлері, ұрпақ тәрбиесіндегі үлкеннің орны, отбасы құндылықтары мен аға буын және кейінгі ұрпақ арасындағы сабақтастық жайында әңгіме өрбіді. Қатысушылар батаның халқымыздың рухани өміріндегі орнына тоқталып, оның жай ғана ізгі тілек емес, елдің амандығын, шаңырақтың берекесін, ұрпақтың болашағын тілеген ақ ниеттің көрінісі екенін атап өтті.

Тараз қалалық ардагерлер кеңесінің жауапты хатшысы Сауранбек Жамалбеков ұлттық тәрбиеде үлкеннің орны ерекше екенін айтып, бата беру дәстүрінің тәрбиелік мәніне тоқталды.

— Қазақта үлкеннің алдын кесіп өтпей, сөзін тыңдап, батасын алу — әуелден қалыптасқан тәрбие. Батада үлкеннің өмірлік тәжірибесі, көргені мен түйгені, кейінгі ұрпаққа деген ақ тілегі бар. Сондықтан баланың үлкеннің сөзін тыңдап, батасын алып өсуі — оның бойына ізеттілік пен адамгершілікті сіңірудің бір жолы. Бүгінгі таңда осындай дәстүрлерді ұмытпай, жастарға түсіндірудің маңызы зор, — деді Сауранбек Жамалбеков.

Оның айтуынша, салт-дәстүрді дәріптеу тек белгілі бір шара аясында қалып қоймай, отбасылық тәрбие арқылы күнделікті өмірде жалғасын табуы қажет. Себебі бала ұлттық құндылықты, ең алдымен, өз шаңырағынан көріп өседі.

Кездесуде Тараз қалалық ардагерлер кеңесінің ұйымдастыру әдістемелік комиссиясының төрағасы Алдаберді Махашев те өз ойын ортаға салып, аға буынның кейінгі ұрпаққа өнеге көрсетудегі жауапкершілігіне тоқталды.

Бата беру — халқымыздың тұрмыс тіршілігімен біте қайнасқан дәстүр. Дастарқан басында, қуанышты сәттерде, сапарға аттанарда немесе маңызды іске кіріскенде үлкеннің ақ батасын алу — жасқа ақ жол тілеп, ізгі ниет білдірудің белгісі болған. Оның әр жолынан елдің бірлігі, отбасының амандығы мен ұрпақтың болашағына деген тілек аңғарылады.

Жиында қатысушылар да ата дәстүрді сақтаудың, оны келер ұрпаққа жеткізудің маңыздылығы жөнінде пікір алмасты. Әсіресе қазіргі кезде үлкен мен кішінің арасындағы сыйластықты нығайтып, ұлттық тәрбиені отбасынан бастау қажеттігі айтылды.

 А.Орынбасарқызы

Ar-Ai. — 2026. — 7 қазан (№76). — 7 б.

     Тараз қаласының «Бәйтерек» шағын ауданында орналасқан №4 кітапхана ұжымы №66 орта мектеппен бірлесе отырып, «Қарттарын қадірлеген ел ардақты» тақырыбында тағылымды кеш өткізді.

 Кешті кітапхана меңгерушісі Бағира Бұлтанқұлова құттықтау сөзімен ашып, қарттардың отбасында да, қоғамда да атқарар рөлі мен алар орны ерекше екендігіне кеңінен тоқталды. Сондай-ақ, қарттық әлсіздік емес, өмір тәжірибесі мен даналықтың биігі екенін және қарияларды құрметтеудің ұлттық тәрбиедегі маңызын да атап өтті.

«Құлақтан кіріп, бойды алар, әсем ән мен тәтті күй» деп хәкім Абай айтпақшы, музыкалық бағдарлама бойынша №66 мектептің оқушысы Нұрасыл Мұрат домбырамен «Еркесылқым» күйін орындап, көпшіліктің көңілін серпілтіп тастады.

Әр салада елеулі еңбек етіп, құрметті демалыста жүрсе де қоғамдық жұмыстардан қол үзбей, бала тәрбиесімен де айналысып жүрген түрлі марапаттың иелері, асқар таудай аталарымыз бен ақ жаулықты апаларымыз Бестерекбай Бекмеров, Баян Мамытбекқызы және Құнанбай Өскелеңовтер өздерінің балалық шақтарынан бастап, бүгінге дейін жүріп өткен жолдары мен бастарынан өткізген түрлі оқиғалары және ел үшін еткен еңбектері жайлы тұщымды да қызықты әңгімелеп берді.

Содан кейін ұрпақтар сабақтастығын айшықтай түсу мақсатында «Асыл сөз — атадан, ақыл сөз — әжеден» атты мақал-мәтелдер сайысы ұйымдастырылды. Оқушылар мақалдың алғашқы бөлігін айтып, ал, қонақтар оның жалғасын тауып, ұлттық сөз өнерінің тәрбиелік мәнін көрсетті әрі тіл байлығы алдымен оқу мен тоқудан екенін ұғындырды.

Тақырып аясында оқушылардың қатысуымен арнайы дайындалған «Тоқта, балам, атаң келеді артыңда» атты сахналық шағын қойылым көрсетілді. Онда үлкенге құрмет көрсетудің, қарттарға қолдау білдірудің маңызы зор екені бейнеленіп, адам бойындағы жақсы және жаман қасиеттер көрініс тапты.

Тартымды да әсерлі шыққан қойылым «Қарттарым — асыл қазынам» деген атпен кітап көрмесіне жалғасып, оған жан-жақты библиографиялық шолу жасаған кітапханашы Гүлнұр Советова қатысушыларға көнекөз қарттардың өнегесі, ұлттық тәрбие, салт-дәстүр, отбасы құндылықтары туралы шығармалармен таныстырды.

Өз кезегінде аталмыш мектептің оқушылары  Гүлсана Жақып, Раяна Жанай және Инабат Болат әсем әндер шырқап берді. «Батамен ел көгерер, жаңбырмен жер көгерер» демекші, шарапатты әс-шараның есте қалар сәттерінің бірі ақсақал аталарымыздың көпшілікке ақ баталарын берулері болды.

Тағылымды кешті кітапхана қызметкері Аңсаған Жақанаева тартымды да татымды жүргізді.

Ешкімнің ешқашан қарттықтан қашып құтыла алмайтынын тағы да ойға салып, қарттарын қадірлеген елдің абыройы арта беретінін тереңнен ұғындырған мәні мен мағынасы зор тағылымды кеш соңында кітапхана меңгерушісі Б. Бұлтанқұлова уақыттарын бөліп келген қарттарға өз ұжымының атынан алғыс айтып, естелікке сыйлықтар табыс етті. Мектеп кітапханасының меңгерушісі Раушан Тажиева да 6 «Е» сынып оқушылары атынан сый-сияпаттарын табыстады.

Бақытжан Әліқұлов

Аулиеата. — 2026. — 6 қазан (№76). — 4 б.

     Мемлекет басшысы Қасым-Жомарт Тоқаевтың бастамасымен жүзеге асырылып жатқан «Зерделі ұлт қалыптастыру» бағдарламасы аясында кітап оқу мәдениетін дамытуға ерекше мән берілуде.

 Ал, кітапхана — осы игі мақсаттың жүзеге асатын ең маңызды орындарының бірі. Өйткені, мұнда кітап қана емес, білім бар, тарих бар, ой бар.

Осы бағытта Тараз қаласындағы Абай атындағы орталық кітапханасында «Кітап-рухани сарқылмас қазына» атты әдеби кеш өткізілді. Әдеби кешті жүргізуші кітапханашы Гүлжан Қордабай бүгінгі басқосу әдеттегідей кітапхана ішінде емес, ашық аспан астында кітап көрмесі әлеміне саяхат жасау арқылы өткізіліп жатқандығын айта келе, кештің мәнін арттырып, тағылымды әңгімелерімен, өмірлік тәжірибелерімен бөлісер ардақты ардагерлер, қаламы қарымды қаламгерлердің қатысып отырғандығын атап өтті.

Алғашқы сөз кезегін алған қазақ әдебиетінде өзіндік қолтаңбасы бар қаламгер, Қазақстан Жазушылар одағының мүшесі, ақын — жазушы Баймахамбет Ахмет: «Кітапсыз да, кітапханасыз да адамның ойдағыдай дамуы мүмкін емес. Қазіргі таңда интернет әлеуетінің қарқынды дамып жатқанына қарамастан, дәстүрлі кітапхананың ағартушылық рөлі ешқашан мәнін жоғалтпайды.

Егер біз ұрпағымызды жастайынан мазмұнды, сапалы, ұлттық рухы жоғары және заманауи бағыттағы кітаптармен сусындатсақ, жаһандық сын — қатерлерге төтеп бере алатын парасатты азаматтарды тәрбиелеп шығара аламыз», — деп сөзін тұжырымдады.

Ал, Тараз қалалық ардагерлер кеңесі жанындағы тұрақты комиссияның төрағасы, Қазақстан Журналистер одағының мүшесі Алдаберді Мақашев балалар жазушысы Бердібек Соқпақбаевтың «Балалық шаққа саяхат» атты кітабына шолу жасап, бұл туындының өзінің өмірлік жолына сара бағыт бергендігін әсерлі әңгімелеп берді.

Жамбыл өңірінің белгілі балалар жазушысы журналист Марат Құлибаев: «Кітапхананың есігін ашу үшін жарлық та, жоба да , науқан да қажет емес. Тек ниет керек. Ниет болса, кітап та табылады, уақыт та табылады, оқырман да табылады. Ал оқырманы бар елдің болашағы да жарқын болмақ» — деген қаламгер тұрғындарды, оның ішінде жастарды кітап оқуға шақырды.

Жылы жүздесу барысында кітаптың адам өміріндегі орны, жас ұрпақты кітап оқуға баулудың маңызы кеңінен сөз болды.

Әдеби кештің екінші бөлімінде «Кітап білгірі» атты әдеби — танымдылық сайыс өткізіліп, оқырмандарға «Біз қаншалықты кітаппен доспыз?» деген сауал берілді.

Одан кейін «Оқырмандар таңдауы» бойынша «Егер сізге өміріңізде бір ғана кітапты қайта-қайта оқуға мүмкіндік берілсе, қай кітапты таңдар едіңіз және неліктен?» — деген сұрақ қойылды.

Жалпы, қатысып отырған оқырмандар белсенділік танытып, сұрақтарға толыққанды жауап берді.

Абай мұрасы — адамды білімге, еңбекке, талап пен ізденіске жетелейтін терең тағылым мектебі. Ұлы ойшылдың осы ойларын жүрекпен қабылдаған кітапханашылар А.Усаева мен Н.Қайырбекова ақынның қара сөздерінен және өлеңдерінен үзінді оқыды.

Келесі кезекте ұлттық өнердің мәйегін сақтап, терме арқылы тағылым мен тәрбие таратқан дәстүрлі өнердің иесі Сәрсен Әбілқайыр қасиетті домбырамен бірнеше күйдің сырлы сазын зор шабытпен орындап, көпшіліктің ілтипатына бөленді.

Әдеби кеш соңында кітапханашылар Света Қожахметова, Анар Тілеген және Бағира Бұлтанқұлова кітап көрмесімен таныстырып, бірқатар жазушылардың кітаптарының мазмұны мен тағылымы жайында ойларын ортаға салды.

Сауранбек Жамалбеков,

Тараз қалалық ардагерлер кеңесінің жауапты хатшысы.

Ғұмыр-Дария. — 2026. — 12 қыркүйек (№17). — 7 б.

    Бүгінде Таразымыздың іргесі кеңейіп, аумағы артып жатыр. Қала құрамына 14 елді мекен қосылды. Жаңа әлеуметтік нысандар салынуда. Тек соңғы жылдары кітапханалар жүйесіне 9 кітапхана қосылып, тұрғындарға кітапханалық — ақпараттық қызмет көрсетудің ауқымы кеңейе түсті.

     Солардың бірі — аптаның алғашқы күні ашылған «Сұлутөр» кітапханасы. Бұл руханият ордасы Мемлекет басшысы Қасым-Жомарт Тоқаев өзінің бастамаларында ел болашағын білімді, ойы озық, кітап құмар ұрпақпен байланыстырып, «Кітап оқитын ұлт» жалпы ұлттық бастамасы аясында пайдалануға берілді.

Оның жалпы аумағы — 320 шаршы метрді құрайды. Кітапхананың кітап қоры 9 418 дана көлемінде. «Сұлутөр» алабындағы жаңа кітапхананың ашылуына облыстық, Тараз қалалық ардагерлер кеңестерінің мүшелері, зиялы қауым өкілдері. Кітап сүйер жастар қатысты.

Сөйтіп қаламызда тағы бір заманауи рухани орталық ашылды. Осындай қуанышты сәтпен Тараз қаласының әкімі Бақытжан Орынбеков, облыстық ардагерлер кеңесінің- төралқа мүшесі, қоғам қайраткері Қасымхан Төлендиев, Жамбыл облыстық маслихатының депутаты, Қазақстан Жазушылар одағының мүшесі, Жамбыл облыстық «Аq jol» газетінің бас редакторы Оралхан Дәуіт құттықтап, жылы лебіздерін білдірді, жаңа кітапхананың алқызыл лентасын қиды.

  Кітапханада оқырмандардың кітап оқып, компьютерлік білімін жетілдіруіне, бос уақыттарын тиімді өткізуіне және өзара пікір алмасуына барлық мүмкіндік қарастырылған. Атап айтқанда, руханият ордасына келушілердін жан-жақты дамуына ықпал ету мақсатында «Домбыра», «Сурет салып үйренеміз», «Қолөнер» және ардагерлерді кітап оқумен қатар, компьютерлік сауаттылыққа үйрететін «Компьютерді оңай үйренеміз» үйірмелері жұмыс істейді.

Сонымен қоса, «Коворкинг» білім орталығында жастармен әртүрлі тақырыптарда мәдени іс-шаралар өткізіледі.

Сондай-ақ, абонемент, оқу залы бөлімдерінде ақын-жазушылардың мұралары, тарихи бастаулары көне дәуірлердің тереңіне бойлап жатқан басылымдар топтастырылған.

 Ғұмыр-дария. — 2026. — 28 тамыз (№16). — 8 б.

Нысанның салтанатты ашылу рәсіміне Тараз қаласының әкімі Бақытжан Орынбеков қатысып, кітапхана ұжымына табыс тіледі.

Сонымен қатар еңбек ардагері Қасымхан Төлендиев пен Қазақстан Жазушылар одағының мүшесі, облыстық «Aq jol» газетінің бас редакторы Оралхан Дәуіт сөз сөйлеп, жылы лебіздерін білдірді.

Қала әкімдігінің қолдауымен қолданысқа берілген кітапханада кітап қоры 9 418 дананы құрайды.

Кітапханада оқырмандардың кітап оқып, компьютерлік білімін жетілдіруіне, бос уақыттарын тиімді өткізуіне және өзара пікір алмасуына барлық мүмкіндік қарастырылған.

Атап айтқанда, руханият ордасына келушілердің жан жақты дамуына ықпал ету мақсатында «Домбыра», «Сурет салып үйренеміз», «Қолөнер» және ардагерлерді кітап оқумен қатар, компьютерлік сауаттылыққа үйрететін «Компьютерді оңай үйренеміз» үйірмелері жұмыс істейді.

Сонымен қоса, «Коворкинг» білім орталығында жастармен әртүрлі тақырыптарда мәдени іс-шаралар өткізіледі.

Сондай-ақ, абонемент, оқу залы бөлімдерінде ақын жазушылардың мұралары, тарихи бастаулары көне дәуірлердің тереңіне бойлап жатқан басылымдар топтастырылған.

Айта кетейік, қала аумағына 14 елдімекеннің қосылуы нәтижесінде кітапханалардың да саны артып, бүгінде олардың қатары 9 жаңа нысанмен толығып отыр.

  Aq jol. — 2026. — 25 тамыз

     Қазақ поэзиясының алып бәйтерегі, жыр дүлділі Жамбыл Жабаевтың шығармашылық мұрасын дәріптеу мақсатында Жамбыл ауданы бойынша шекара басқармасында «Жамбыл — менің жай атым, халық — менің шын атым» атты поэзиялық кеш ұйымдастырылды.

Тағылымды жиынды Жамбыл ауданы бойынша шекара басқармасының тәрбиелік, идеологиялық және кадрлық жұмыстар бөлімінің аға офицері, аға лейтенант Қайрат Байтиков пен кітапханашы Кәмилә Әбсеметова Тараз қалалық орталықтандырылған көпшілік кітапханалар жүйесіне қарасты Абай атындағы орталық кітапхана қызметкерлерімен бірлесіп өткізді.

Кештің басты мақсаты — қазақ халқының ұлы жыршысы Жамбыл Жабаевтың өмір жолы мен шығармашылық мұрасын насихаттау, жас буынның бойына ұлттық құндылықтарды сіңіріп, әдебиетке деген қызығушылығын арттыру.

Іс-шара барысында жыр алыбының өнегелі ғұмыры мен халқына қалдырған бай әдеби мұрасы кеңінен таныстырылды. Қатысушылар ақынның ел бірлігі мен халық тағдырын арқау еткен өлеңдері мен жыр-толғауларын мәнерлеп оқып, Жамбыл поэзиясының өміршеңдігі мен тәрбиелік мәніне тоқталды.

Кеш барысында сөз алған қатысушылар Жамбыл Жабаев шығармашылығының қазақ әдебиетіндегі ғана емес, тұтас ұлт руханиятындағы ерекше орнын атап өтті. Ақын жырларындағы отансүйгіштік, адамгершілік пен елдік рухтың бүгінгі ұрпақ тәрбиесінде де маңызын жоймағаны айтылды.

Әдеби басқосу аясында ұйымдастырылған «Жыр дүлділі» атты кітап көрмесі де көпшіліктің қызығушылығын тудырды. Көрмеге қойылған әдебиеттер арқылы оқырмандар ақынның шығармашылық әлемімен жақынырақ танысып, оның өмірі мен еңбегіне қатысты тың мәліметтер алды.

Рухани мазмұны терең поэзиялық кеш қатысушыларға ерекше әсер сыйлап, ұлы жыраудың бай мұрасын насихаттауға бағытталған тағылымды шара ретінде есте қалды. Мұндай кездесулер ұлттық әдебиетті ұлықтап, жастардың тарихи танымы мен рухани дүниесін байытуға қызмет ететіні сөзсіз.

 Кәмилә Әбсеметова,

Жамбыл ауданы бойынша шекара басқармасы бөлімшесінің кітапхана

меңгерушісі

Aq jol. — 2026. — 20 маусым (№67). — 11 б.

      Биыл қазақтың ұлы ақыны, жырау Жамбыл Жабаевтың туғанына 180 жыл толуына орай елімізде «Жамбыл жылы» деп жарияланып, ұлт руханиятын ұлықтауға бағытталған ауқымды іс-шаралар ұйымдастырылуда.

 «XX ғасырдың Гомері», жыр дүлділі, ғасыр ақыны, Жыр алыбы — Жамбыл Жабаевтың 180 жылдығына орай қалалық Ғ.Мұратбаев атындағы кітапхана қызметкерлері «Жырдың жампозы — Жамбыл» тақырыбында әдеби портрет ұйымдастырып өткізді.

Кеш әсерлі ашылу салтанатымен басталып, сахна төрінде Жамбыл бейнесі ұсынылып, жүргізушінің мазмұнды сөзімен жалғасын тапты. Шара барысында облыстық айтыскер ақындар, жыршы-термешілер орталығының ғылыми қызметкері Апбасов Дидар Жамбылға арналған арнау жырын орындап, көрерменге ерекше әсер сыйлады. Әдеби бөлімде №35 орта мектептің оқушылары ақын шығармаларын мәнерлеп оқыды. Кештің көркемдік бөлігінде «Жамбыл мен Айкүміс» айтысы сахналанып, көрермендер қазақтың сөз өнерінің құдіретіне куә болды. Сондай-ақ, «Ленинградтық өренім» атты тарихи көрініс ұсынылып, ақынның ел басына күн туған шақтағы рухты жырлары көркем түрде бейнеленді. Іс-шара аясында «Жыр алыбы — Жамбыл» атты кітап көрмесі ұйымдастырылып, келушілер ақынның мол мұрасымен танысты. Музыкалық бөлімде облыстық айтыскер ақындар, жыршы-термешілер орталығының үйірме жетекшісі Сәрсен Әбілқайыр «Жекпе-жек» күйін орындап, кештің мазмұнын байыта түсті.  Кештің құрметті қонағы — өлеңдері республикалық және халықаралық баспасөз беттерінде жарияланып жүрген, Халықаралық «Шабыт» шығармашыл жастар фестивалінің дипломанты, республикалық Ахыт Үлімжіұлы атындағы жазба ақындар мүшәйрасының II орын иегері Жұлдыз Бейсек болды. Ақын кеш барысында сөз сөйлеп, Жамбыл мұрасының маңыздылығына тоқталды.

Аталған әдеби кеш — жас ұрпаққа рухани тәрбие беріп, ұлттық құндылықтарды дәріптеуге бағытталған маңызды мәдени шаралардың бірі болды.

       «Киелі өлкенің кілті — біздің қолымызда» жобасы аясындағы тағылымды кездесу

      Жамбыл облыстық қазақ драма театрының 90 жылдық мерейтойына орай Абай атындағы орталық кітапханада «Ұлтымыздың саф өнері — театр» атты тағылымды кездесу кеші өтті. Тағылым мен тәрбиеге толы шара мәдениет пен өнерді ұлықтауға, театр өнерінің қадір-қасиетін жас ұрпаққа насихаттауға бағытталды.

Кездесуге театр сахнасының саңлақтары — Қазақстанның еңбек сіңірген әртісі, «Құрмет» орденінің иегері, театр саласында 52 жыл еңбек еткен Майра Жалмұхаметқызы Алимбетова және Қазақстанның халық әртісі, «Құрмет» орденінің иегері, сахнада 55 жыл қызмет еткен Мәкен Рахымжанқызы Рахымжанова қатысты. Өнер иелері өздерінің шығармашылық жолдары, театрдағы қызықты сәттері мен сахна мәдениетінің қыр-сыры туралы әсерлі әңгімелерімен бөлісті. Кеш барысында қонақтар театрдың тек өнер ордасы ғана емес, адамның жан дүниесін байытып, рухани кемелденуіне жол ашатын қасиетті мекен екенін ерекше атап өтті. Олар сахнада түрлі образға ену арқылы өзге кейіпкерлердің тағдырын сезіну, адам жанының терең иірімдерін ашу — актерлік шеберліктің басты ерекшелігі екенін жеткізді. Сонымен қатар, кездесуде тұрақты оқырмандарға арналған шағын шеберлік сабағы ұйымдастырылды. Оқырмандарға сахна тілі, дауыс ырғағын меңгеру, бет мимикасын дұрыс қолдану, сондай-ақ көңіл күйге сай жаңылтпаштарды айту әдістері практикалық түрде көрсетілді. Әсіресе, түрлі этюдтар арқылы актерлік шеберліктің қырлары таныстырылып, көрермендердің қызығушылығын арттырды.

Кездесу өте әсерлі әрі мазмұнды өтті. Сахна майталмандарының өмірден түйгені мен өнер жолындағы естеліктері көпшілікке ой салып, ерекше әсер қалдырды. Әсіресе, олардың шынайы әңгімелері мен сахнаға деген адалдығы жастарға үлкен үлгі болды.

Шералхан Жұлдыз,

Кітапхананы дамыту және әдістемелік жұмыс бөлімінің меңгерушісі,  Тараз қаласы

Тәрбие сағаты. — 2026. — (№4-6). — 13 б.

     «Бірлігіміз жарасқан — таусылмайтын жыр дастан»

      Абай атындағы орталық кітапханада 1 мамыр — Қазақстан халқының бірлігі күніне орай «Бірлігіміз жарасқан — таусылмайтын жыр дастан» атты мерекелік кеш өтті. Кітапханашылар А.Ноғайбаева мен Ж.Орманкулова мерекенің маңызы туралы қазақ және орыс тілдерінде ақпарат берді. Олар бұл күннің елдегі бейбітшілік, ынтымақ, достық дәстүрлерін нығайтатын, әрбір қазақстандықтың Отанға деген сүйіспеншілігі мен патриоттық сезімін арттыратын ерекше мереке екенін атап өтті. Жамбыл облыстық Қазақстан халқы Ассамблеясының Ақсақалдар кеңесінің мүшесі, өңірлік «Архыз» қарашай-балқар этномәдени бірлестігінің өкілі Исмайл Хаджимуратов, Жамбыл облысы әкімдігінің ақпарат және қоғамдық даму басқармасына қарасты «Қоғамдық келісім» КММ-нің жетекші сарапшысы Жалпанова Рианна Руслановна, Немістер қоғамының этномәдениет жөніндегі үйлестірушісі Кобер Евгения Владиславовна, Корей ақсақалдар кеңесінің төрағасы Ким Светлана Николаевна және №39 мектеп-гимназиясының орыс тілі пәнінің мұғалімі Салимова Венера Анваровна оқырмандарды Қазақстан халқының бірлігі күні мерекесімен құттықтады.

      Кездесу барысында қонақтар еліміздегі ұлтаралық татулық пен қоғамдық келісімнің маңыздылығына ерекше тоқталды. Олар Қазақстанда әрбір ұлт өз мәдениеті мен салт-дәстүрін сақтай отырып, бір шаңырақ астында тату-тәтті өмір сүріп келе жатқанын атап өтті. Сондай-ақ жастарды ел бірлігін қадірлеуге, достық пен сыйластықты нығайтуға шақырып, мұндай мерекелердің қоғамдағы ынтымақты арттырудағы қызметі зор екенін жеткізді. Жамбыл облыстық корей ассоциациясының хор ұжымы «Саран» және «Хипарам» әндерін орындады. «Поющие сердца» вокалдық ансамблі «Хопсаполька» және попурри әндерін шырқап, көрермендердің көңілінен шықты. Қазіргі заман гуманитарлық-техникалық колледжінің 1 курс білімгерлері өзбек және орыс ұлттық билерін билеп, өнерлерін көрсетті.

№39 мектеп-гимназиясының оқушылары — 9-сынып оқушысы Магаметалиев Ислам, 8-сынып оқушысы Ким Валерия, 10-сынып оқушылары Сорокина Ильвира мен Абдеев Рашит өз тілдерінде сәлемдесіп, оқырмандарға құттықтау сөздерін жеткізді.

«Қазақстан — Бірлік пен татулық мекені» атты кітап көрмесіне кітапханашы  Ж.Жаңабаева таныстырып, библиографиялық шолу жасады.

Іс-шара мазмұнды әрі әсерлі өтті. Кеш барысында әр ұлттың өнері мен мәдениеті кеңінен таныстырылып, көрермендерге көтеріңкі көңіл күй сыйлады. Қатысушылар бірлік пен татулықтың қадірін терең сезініп, ортақ құндылықтарды дәріптеудің маңызын ұғынды. Мұндай тағылымды шаралар ел ішіндегі ынтымақты нығайтып, жас ұрпақты отансүйгіштікке тәрбиелеуге ықпал етеді.

Саулебаева Ұлбосын,

ОККЖ-нің директоры, Тараз қаласы

Тәрбие сағаты. — 2026. — (№4-6). — 12 б.

     23 сәуір — Ұлттық кітап күніне орай Орталықтандырылған көпшілік кітапханалар жүйесінің №5 кітапханасында «Кітап әлемі» аясында «Поэзия әлемінде» атты кездесу кеші өткізілді. Рухани құндылықтарды дәріптеуге бағытталған бұл әсерлі шара аясында кітаптар шеруі ұйымдастырылып, оқырмандарға ерекше көңіл күй сыйлады. Кітапқа деген қызығушылықты арттырып, оқырман мен руханият арасындағы байланысты нығайтты.

     Кештің негізгі мақсаты — жергілікті ақын-журналист Хамит Есаманның шығармашылығын кеңінен насихаттау болды. Кездесу барысында қаламгер өз туындыларын оқып, поэзияның терең сырлары мен шабыт әлемі туралы ой бөлісті. Хамит Есеман — қазақ әдебиетіне өзіндік қолтаңбасын қалдырған қаламгер. Ол қоғамдағы маңызды мәселелерді көтеріп, халықтың үнін жеткізген тұлға ретінде танылды. Кеш барысында ақынның өмірі мен шығармалары жайлы айтылып, оның әдебиеттегі орны талқыланды.

№5 кітапхана жанындағы «Дарын» шығармашылық клубының мүшелері ақын еңбектерінен үзінділер оқыды. Сонымен қатар Тараз қаласының өнерпаздары би билеп, кештің мазмұнын байытты.

Кітапханашылар ұйымдастырған «Ұлы боп күн кешкім келеді» атты кітап көрмесі оқырмандар назарына ұсынылды. Оқырмандар кеш қонағына сұрақтар қойып, ақын шығармашылығымен тереңірек танысты. Бұл кездесу Хамит Есеманның мол мұрасын ұлықтап, жас ұрпаққа таныстыруға мүмкіндік берді. Сонымен бірге Абай атындағы орталық кітапханасында 23 сәуір — Ұлттық кітап кұніне орай «Ой маржаны — кітап» тақырыбында ашық есік күні өтті. Рухани мазмұны терең шара кітап көрмелері мен түрлі инсталляциялар арқылы безендіріліп, оқырмандарға ерекше мәдени орта қалыптастырды.

Іс-шара барысында жүргізушілер кітаптың адамзат өміріндегі маңызына тоқталып, оқырмандарды мерекемен құттықтады. Философиялық мазмұндағы сахналық көрініс қойылып, кітап пен оқырман арасындағы рухани байланыс көркем түрде бейнеленді. Бұл көрініс арқылы ақпараттық дәуірдегі кітаптың рөлі терең ашылды.

Мәдени бөлімде Жамбыл облыстық айтыскер ақындар, жыршы-термешілер орталығының өнерпазы Сәрсенбай Әбілхайыр күй орындап, көрермен ықыласына бөленді. Сонымен қатар, кітапхана өміріне белсене қатысқан бірқатар оқырмандар марапатталды. Олардың қатарында Жамбыл облысының кәмелетке толмағандардың істері жөніндегі мамандандырылған ауданаралық сотының төрағасы Думан Мауленов, Тараз қалалық мәслихат депутаты Азамат Лесбек және жас оқырман Бақытжанқызы Аиша бар.

Кештің құрметті қонағы — Қазақстан Жазушылар және Журналистер одақтарының мүшесі, балалар жазушысы, сатирик-ақын Бақытжан Әлімқұлов болды. Қаламгер өз шығармашылығы туралы ой бөлісіп, оқырмандармен әңгімелесті. №63 мектеп оқушылары ақын өлеңдерін мәнерлеп оқып, кеш мазмұнын толықтыра түсті.

«Жанды кітап» бөлімінде Бақтияр Бекназаров кітаптың өмірдегі орны туралы тағылымды пікірлерін ортаға салды. Іс-шара соңында балаларға арналған «Додокаэдр»  ойыны ұйымдастырылып, олардың танымдық қабілеттерін дамытуға бағытталған қызықты сәттер сыйлады. 23 сәуір — Ұлттық кітап күніне орай «Бүгінгі кітап — ертеңгі білімнің  негізі» атты кітап жәрмеңкесі ұйымдастырылды. Іс-шараның мақсаты — оқырмандардың кітапқа деген қызығушылығын арттыру, оқу мәдениетін қалыптастыру және рухани құндылықтарды насихаттау. Жәрмеңке барысында көркем әдебиет, балаларға арналған кітаптар, танымдық және ғылыми еңбектер көпшілік назарына ұсынылып, оқырмандар жаңа басылымдармен танысып, өздеріне қажетті кітаптарды таңдау мүмкіндігіне ие болды. Сонымен қатар, шараға білім мен рухани байлықтың қайнар көзі саналатын «Атамұра» баспасының өкілі және оқырманға сапалы әдебиеттерді ұсынуда аянбай еңбек етіп жүрген «Кітап ал» кітап дүкенінің өкілдері қатысып, өздерінің кітап өнімдерін көпшілікке ұсынып, сатылымға шығарды.

Ұлттық кітап күніне орай  Ғ.Мұратбаев атындағы кітапхана №35 орта мектеп оқушыларымен бірге «Кітап әлемі-ғажайып әлем» атты дивертисмент кешін өткізді. Мақсаты — оқушыларға кітаптың маңызын түсіндіру, кітапханаға қызығушылығын арттыру, рухани құндылықтарды насихаттау және оқу мәдениетін қалыптастыру болды. Кеште жүргізуші кітаптың білімнің қайнар көзі екенін атап өтті, оқушылар тақпақтар оқып, «Қазақ биін» орындады, жұмбақтар шешіп, «Жасырын кейіпкерді тап» ойынына қатысты. «Менің атым Қожа» мен «Жусан иісі» шығармаларынан үзінділер ұсынылып, оқушылар белсенділік танытты. Кітапхана қызметкерлері «Кітап — білім қазынасы» көрмесін таныстырып, балалар әдебиеті мен танымдық кітаптарға шолу жасады. «Жалғастыр» ойыны мен сұрақтар арқылы оқушылар өз ойларын еркін жеткізді. Іс-шара соңында кітаптың адам өміріндегі маңызы тағы да айтылып, оқушылар кітап оқуға шақырылды. Кеш мазмұнды әрі қызықты өтіп, оқырмандардың кітапқа деген қызығушылығын арттырды.

Саулебаева Ұлбосын,

ОККЖ-нің  директоры, Тараз қаласы

Тәрбие сағаты. — 2026. — (№4-6). — 12-13 б.