Қымбатты жас оқырмандар!

Әр адамның өз ерекшелігі бар. Біреу суретті әдемі салады, біреу спортқа бейім, ал енді бірі өзгелерге қамқор бола біледі. Адамдарды ерекше ететін – олардың сыртқы келбеті емес, жүрегіндегі мейірімі, арманы мен жігері. Бүгін сіздерді достық, батылдық және өз-өзіне сену туралы сыр шертетін «Барыңды бағала. Алғыс» атты  әсерлі хикаятпен таныстырамыз.

 Барыңды бағала. Алғыс [Мәтін] / [бас ред. Ш. Мұқан]. — Алматы: Мазмұндама, 2024. — 52 б.

Бұл шығарма Калифорниядан отбасымен бірге Нью-Йоркке көшіп келген Бәрри есімді баланың өмірі туралы баяндайды. Жаңа қала, жаңа мектеп, жаңа орта – мұның бәрі кез келген бала үшін оңай емес. Бәрри де бұрынғы достарын, туған қаласын сағынып, алғашында өзін жалғыз сезінеді.

Бәрридің тағы бір ерекшелігі бар. Ол туғаннан бір қолы кем болып дүниеге келген. Алайда ата-анасы оның бақытты өмір сүруі үшін бар күшін салып, дәрігерлердің көмегімен жасанды қол жасатады. Уақыт өте келе ол қол Бәрридің өз қолындай болып кетеді. Сондықтан Бәрри өзін ешқашан өзгелерден кем санамайды.

Жаңа мектепке келгенде кейбір балалар оның қолына таңырқай қарап, оны өзгеше қабылдайды. Бірақ Бәрри олардың пікіріне бола жасымайды. Ол ақылды, зерек, ашық мінезді бала болғандықтан, біртіндеп сыныптастарының құрметіне ие болады. Оның бойындағы сенімділік пен қайсарлық достар табуына көмектеседі.

Хикаятта Бәрридің анасы ұлын қорғағысы келіп, балалармен өзі сөйлескісі келеді. Алайда Бәрри бұған қарсы болады. Өйткені ол өзін аяуды немесе ерекше қарым-қатынасты қажет етпейді. Ол бәрі сияқты қарапайым бала екенін дәлелдегісі келеді. Бұл оның қаншалықты батыл әрі өзіне сенімді екенін көрсетеді.

Бұл шығарма оқырманға өте маңызды ой салады: адамның қадірі оның сыртқы келбетінде емес, мінезінде, ақылында және жүрегінде. Егер адам өзіне сенсе, өзін толыққанды тұлға ретінде қабылдаса, айналасындағы адамдар да оған солай қарай бастайды.

Сонымен қатар хикаят бізді өзгелерді сыртқы ерекшелігіне қарап бағаламауға үйретеді. Денесінде қандай да бір өзгешелігі бар балалар да біздің  достарымыз, сыныптастарымыз, өзіміз секілді армандайтын, қуанатын, кейде мұңайып қалатын қарапайым адамдар. Сондықтан ешкімді кемсітуге, мазақ етуге немесе шеттетуге болмайды.

Бәрридің оқиғасы әр баланың жүрегіне: «Өзіңе сен, арманыңнан бас тартпа және өзгелерді құрметтей біл» деген маңызды ойды жеткізеді.

Бұл әсерлі хикаят достықтың, мейірімділіктің және өз-өзіне деген сенімнің қаншалықты маңызды екенін көрсетеді. Бәрридің өмір жолы бізге кез келген қиындықты жеңуге болатынын, ал адамды ерекше ететін оның кемшілігі емес, қайсарлығы мен жақсы қасиеттері екенін түсіндіреді.

Қымбатты балақайлар, сіздерді Бәрридің тағылымға толы оқиғасымен танысып, мейірімділік пен адамгершілік туралы терең ойлануға шақырамыз!

Қымбатты балақайлар!

Кітап – білімнің сарқылмас бұлағы, ал энциклопедия – қоршаған әлемнің сан қырлы құпияларын ашатын ғажайып қазына. Бүгін сіздерді Анна Булгакованың «Негешке арналған үлкен энциклопедия» атты танымдық кітабымен таныстырамыз.

Булгакова, А.К. Негешке арналған үлкен энциклопедия [Мәтін]. 2 шығарылым / Анна Булгакова. — Харьков: Ранок, 2025. — 96 б.

Бұл кітап кішкентай оқырмандарды қызықты сұрақтарға жауап іздеуге, жаңа білім алуға және дүниені танып-білуге жетелейді.

Балалар кейде үлкендердің де ойына келе бермейтін сұрақтар қояды. Мысалы, кеменің неге батпайтынын, аспанның неге көк екенін немесе ғарышта не бар екенін білгісі келеді. Әрине, мұндай сұрақтардың жауабын ересектер білгенімен, оны бес жасар балаға түсінікті тілмен жеткізу әрдайым оңай емес. Осы тұрғыдан алғанда, бұл энциклопедия ата-аналар мен балалар үшін таптырмас көмекші бола алады.

Кітапта елуге жуық қызықты сұрақтар мен олардың түсінікті жауаптары берілген. Олар адам денесінің құрылысы, күнделікті тұтынатын тағамдар, түрлі машиналардың жұмыс істеу ерекшеліктері және ғарышты игеру сияқты маңызды тақырыптарды қамтиды. Әрбір мәлімет бала тіліне жеңіл, қызықты әрі тартымды түрде баяндалған.

Энциклопедияның басты ерекшелігі – білімді ойынмен ұштастырып, оқырманды ойлануға және ізденуге жетелеуі. Кітап беттерін парақтаған сайын балалар жаңа мәліметтермен танысып қана қоймай, қоршаған әлемнің сан алуан құпияларын ашуға талпынады.

Бұл кітап жас оқырмандардың таным көкжиегін кеңейтіп, ғылымға деген қызығушылығын арттырады. Сонымен қатар, олардың сұрақ қоя білуіне, ойлау қабілетін дамытуына және білімге құштар болып өсуіне ықпал етеді.

Негешке арналған үлкен энциклопедия – қызықты сұрақтарға жауап беретін, білім мен танымға толы құнды кітап. Қымбатты балақайлар, сіздерді осы энциклопедиямен танысып, жаңалықтар мен қызықты деректерге толы ғажайып әлемге саяхат жасауға шақырамыз!

Қымбатты жас оқырман!

Сен армандағанды ұнатасың ба? Кейде көк аспанда қалықтап ұшқың келіп, кейде өзің ғана білетін ғажайып әлемге саяхат жасағың келе ме? Ендеше бұл кітап сені дәл сондай сиқырлы мекенге бастайды.

Балақайлар, балаларға арналған қызықты әрі танымды шығармаларымен кеңінен танымал түрік жазушысы Мерт Арыктың «Менің ұшатын керігім» атты кітабын оқуға ұсынамыз.

Арык, М. Менің ұшатын керігім [Мәтін] / Мәрт Арык. ; түрік тіл. ауд. Қ. Әбенқызы ; бас ред. Ш. Мұқан ; сурет. Х. Сөнмезай. — Алматы: Мазмұндама, 2023. — 68 б.

Бұл шығармадағы Мони де сен сияқты армандайды, қиялдайды және сурет салғанды жақсы көреді. Ол кейде қиналады, кейде көңілі түседі, бірақ ешқашан армандарынан бас тартпайды. Өйткені әр баланың жүрегінде ешкімге ұқсамайтын ерекше талант пен асыл қазына жасырынған.

Кітап беттерін парақтай отырып, сен Монимен бірге қиял қанатына мініп, таңғажайып оқиғаларды бастан кешесің. Сонымен қатар өзіңе сенудің, талмай еңбектенудің және арманыңды жүзеге асыру үшін батыл қадам жасаудың қаншалықты маңызды екенін түсінесің.

Ендеше, қиял әлемінің есігін айқара ашып, Монимен бірге қызықты сапарға аттан! Мүмкін, осы кітап саған да өз жүрегіңде жасырынған ғажайып қабілетті табуға көмектесер.

Арманда! Сен! Әрекет ет! Және өз қиялыңның қаншалықты биікке самғай алатынын көр!

Қымбатты балалар!

Ертегі  қиялдың қанатын кеңге жайып, бізді таңғажайып әлемдерге жетелейтін ғажайып жол. Құрметті жас оқырмандар, назарларыңызға ақын, жазушы Баянғали Әлімжановтың «Мейірімді Асқар» атты әсерлі ертегісіне шолуды ұсынамыз.

Әлімжанов, Б. Мейірімді Асқар [Мәтін] : ертегі / Баянғали Әлімжанов. — Астана: Фолиант, 2024. — 120 б.

 Ертегінің басты кейіпкері Асқардың басынан кешкен оқиғалары әрбір оқырманға жақсылық жасаудың қадірін ұғындырып, жүрекке ізгілік нұрын себеді. Бұл кітапты оқи отырып, сендер түрлі ертегі кейіпкерлерімен танысып қана қоймай, адам бойындағы ең асыл қасиеттердің құдіретін сезінесіңдер.

Бұл шығарма — мейірімділігімен көптің ықыласына бөленген Асқар есімді кейіпкердің таңғажайып сапарлары туралы қызықты ертегі.

Оқиға ауылдағы ақкөңіл қария Асқардың күтпеген жағдайдан кейін жас балаға айналуынан басталады. Осы сәттен бастап ол сиқырлы ертегілер әлеміне тап болады. Мұнда Асқар түрлі халықтардың ертегілеріндегі танымал кейіпкерлермен кездесіп, жаңа достар табады. Ол Алдар Көсемен жолығып, Алтын балықты құтқарады, Қар ханшайымымен, Барон Мюнхгаузенмен достасады. Осы арқылы автор балаларды әртүрлі халықтардың мәдениетімен және ертегілерімен таныстырады.

Ертегінің «Мейірімді Асқардың жаңа достары» бөлімінде Асқар қазақ ертегілеріндегі атақты кейіпкерлер — Таусоғар, Желаяқ, Көлтаусар және Ептімен танысады. Олар бірге кең далада небір қызықты оқиғаларды бастан кешіріп, қиындықтарды бірлік пен тапқырлықтың арқасында жеңеді.

Үшінші бөлімде Асқардың мейірімді жүрегі тағы бір мәрте көрінеді. Ол төрт түлік малдың төлдерін Жезтырнақ пен Жалмауыз кемпірден құтқарып, әлсіздерге қамқор болудың үлгісін көрсетеді.

Төртінші бөлімде Асқар мен достары Анд таулары мен Амазонкаға саяхат жасап, табиғаттың ғажайып сырларымен танысады. Ал бесінші бөлімде олар Жердің егізі саналатын қиял-ғажайып Галлий ғаламшарына аттанып, бұрын-соңды болмаған қызықты оқиғаларды бастан кешіреді.

Бұл ертегінің басты құндылығы — мейірімділік, достық, батылдық және жанашырлық. Асқар қай жерде жүрсе де өзгелерге көмектесіп, жақсылық жасаудан жалықпайды. Сондықтан да ол көптеген достар тауып, ертегілер әлемінің сүйікті кейіпкеріне айналады.

Бұл ертегі әр баланы армандауға, ізгілік жасауға және өмірге мейіріммен қарауға үндейді.

Қымбатты жас оқырман!

Кейбір кітаптар бізді таңғажайып оқиғаларға жетелесе, кейбірі жүрегімізге жылулық сыйлап, жақын адамдарымыздың қадірін тереңірек сезінуге көмектеседі. Танымал түрік жазушысы Арлы Эминенің «Атамның тәтті тоқашы» – дәл сондай мейірімге толы шығарма.

Арлы, Э. Атамның тәтті тоқашы [Мәтін] / Эмине Арлы. ; түрік тіл. ауд. Ә. Бекболатұлы ; бас ред. Ш. Мұқан ; сурет. Ш. Зарей.- Алматы: Мазмұндама, 2023. — 68 б.

Атамның тәтті тоқашы – отбасы құндылығын, достық пен қамқорлықты дәріптейтін әсерлі туынды.

Шығармада Самир атты балақайдың атасына деген ерекше сүйіспеншілігі баяндалады. Ол атасының наубайханасында дайындалатын зімбір қосылған тәтті тоқашты қатты жақсы көреді. Алайда бір күні сүйікті тоқашының дәмі өзгеріп кеткенін байқап, оның себебін анықтауға бел буады. Бұл жолда оған досы Менессе мен ата-анасы қолдау көрсетіп, бәрі бірге қиындықтарды еңсереді.

Оқиға барысында Самир ұмытшақтық дертіне шалдыққан атасының жанынан табылып, оған қамқорлық танытады. Осы арқылы автор атасы мен немересі арасындағы мейірім мен сенімге құрылған байланысты әсерлі суреттеп, отбасының адам өміріндегі ең үлкен тірек екенін көрсетеді.

Кітаптің тағы бір ерекше тұсы – шығарманың соңында атасының әйгілі тәтті тоқашының рецепті берілген. Жас оқырмандар тоқаштың құрамы мен әзірлеу тәсілімен танысып қана қоймай, ата-анасымен бірге дайындап көруге мүмкіндік алады. Бұл кітапты одан әрі қызықты әрі есте қаларлық етеді.

Жылы сезімге толы бұл шығарма балаларды үлкендерді құрметтеуге, достықты бағалауға, жақын жандарына қамқор болуға және әрбір сәттің қадірін түсінуге үндейді.

Құрметті жасөспірім балақайлар!

        Сіздердің назарларыңызға қазіргі замандағы танымал балалар мен жасөспірімдер жазушысы Клэр Бертолеттің қызықты әрі тәрбиелік мәні зор  «Ханшайымның 10 оқиғасы» атты кітабын ұсынамыз.

       Бертолет, К. Ханшайымның 10 оқиғасы [Мәтін] / Бертолет К. ; [сурет. Адора ; қаз. тіліне ауд. Б. Салыхова]. — Алматы: Алматыкітап, 2024. — 68 б.

      Бұл кітап балалардың алдынан таңғажайып қиял әлемін ашады. Әр елде әртүрлі дәуірде өмір сүрген ханшайымдар туралы қиял-ғажайып ертегілер берілген.

       Шытырман оқиғаға құрылған ертегі бірден баурап алып, мәңгі есіңізде қалады. Ханшайымның ең әдемі тәжін киіп аспанмен таласқан ғимаратта тұратын Келли ханшайымға қонаққа барасыз. Патшайым Аделаида ханшайымның мінез-құлқы мен сыр сымбатын бағалай ма деп алаңдайсыз.

       «Ханшайымның 10 оқиғасын» оқи отырып Әлемдегі ханшайымдардың қиял-ғажайып әлеміне саяхаттайсыз.

       Бұл кітапты оқыған сайын қиялыңыз кеңіп, жүрегіңіз жылынып, өзіңізді шынайы ханшайымдай сезінесіз. Бұл кітап — рухани байлық пен өмірлік сабақтың қайнар көзі. Кітапты ашқан әрбір бала өзіне жақын ханшайымды табады: бірі – жүрегі жұмсақ, екіншісі – ақыл-парасатты, енді бірі – батырлығы мен табандылығымен ерекшеленеді. Олардың бастан кешкен он түрлі оқиғасы әр оқырманға қуаныш сыйлап қана қоймай, жүрегіне сенім ұялатып, арманға қанат бітіретіні сөзсіз.

       Кітапханамызға келіп, «Ханшайымның 10 оқиғасы» кітабымен бірге керемет саяхатқа аттаныңыз!

       Ертегі әлемі сізді күтуде!