Құрметті кішкентай тапқырлар, табиғат жанашырлары мен жас оқырмандар!
Көк жүзінде еркін қалықтап, әдемі әуенімен табиғатты оятатын қанатты достарымыздың құпиясын ашқыларың келе ме? Біздің бабаларымыз ежелден-ақ бүркітті — өрліктің, қарлығашты — берекенің, ал аққуды — сұлулықтың белгісі деп білген. Ендеше, сендерді құстар әлемінің ең қызықты жұмбақтары күтіп тұр!
Назарларыңызға белгілі ақын, жазушы, журналист Әли Ысқақбайдың «100 құс жайлы 100 жыр-жұмбақ» атты ерекше танымдық кітабын ұсынамыз!
Ысқақбай, Ә. 100 құс жайлы 100 жыр-жұмбақ [Мәтін] / Әли Ысқақбай. — Алматы: Балалар әдебиеті, 2026. — 48 б.
Бұл кітап — нағыз жұмбақтар жарысы! Кітапта әлемдегі ең ерекше 100 құс іріктеліп алынған. Әр құстың өзіндік суреті мен оның құпиясын жасырған әдемі өлең-жұмбағы бар. Кәне, бірінші жұмбақты шешіп көруге дайынсың ба?
Тапқыр болсаң, тауып көр!
Құстар пірі — падишасы, Момық тінді шағидасы.
Денесіне кір шалдырмай — Басты ұстанар қағидасы.
Үлпілдетіп тербетеді, Мөлдір сулы дариясы.
Әсемдіктің әлқисасы, Сыңғырлаған ән-сазасы.
Барша қауым ұнататын, Білесің бе, әзізді осы?
Бұл қай құс?
Ал қалған 99 құстың жұмбағын шеше аласың ба?
Кітап ішінде бұдан да қызықты, бұдан да күрделі жұмбақтар өте көп!
- Қай құс түнде ұйықтамайды?
- Ең жүйрік және ең кішкентай қанаттылардың қандай құпиясы бар?
- Орман емшісі деп кімді атайды?
Бұл кітап мектепте өтетін «Құстар — біздің досымыз» атты қызықты сайыстар мен ашық сабақтарға да нағыз таптырмас көмекші құрал!
Жұмбақтарды шеше отырып, сенің ой-өрісің кеңейеді, сөздік қорың байып, нағыз байқампаз зерттеушіге айналасың. Ең бастысы — тірі табиғатты аялап, қанатты достарымызды қорғауды үйренесің.
Құстардың жұмбақ әлеміне бірінші болып сүңгіп, достарыңмен жарысқың келсе, кітапханамызға асық! «100 құс жайлы 100 жыр-жұмбақ» кітабы сені күтуде!
