Мемлекет басшысы Қасым-Жомарт Тоқаев «Тәуелсіздік бәрінен қымбат» атты мақаласында Наурыз мейрамын тойлау тұжырымдамасын әзірлеп, көктем мерекесінің мазмұнын байыту туралы тапсырмасына сәйкес, 15 наурыз — Тарихқа тағзым күні деп белгіленген болатын.

Осыған орай Абай атындағы орталық кітапханада белгілі мемлекет және қоғам қайраткері, үш мәрте Социалистік Еңбек Ері, Қазақ КСР Ғылым академиясының академигі, техника ғылымдарының докторы Дінмұхамед Ахметұлы Қонаевтың 110 жылдығына арналған «Заманының заңғар тұлғасы» атты ашық есік күні өтті.

Кеш барысында кітапхана қызметкері Гүлсат Қонысбаева композитор Г.Тұрашқызының «Сақтап қалған бабалардың рухын» атты өлеңін оқыса, кітапхана оқырманы Жанерке Спатай мен Жансая Сейітжанқызы композитор Т.Сарыбаевтың «Наурыз-думан» атты әнін шырқады.

Сонымен қатар кітапхана оқырмандарына «Наурыз — жыл басы» викториналық ойыны ұйымдастырылды.

— Бүкіл Алаш жұртына аты мәлім Дінмұхамед Қонаевтың елінің өркендеп-өсуіне қосқан үлесі мен сіңірген еңбегі зор. Ұзақ жылдар бойы Қазақстанды басқарған қайраткердің жасампаз істерін бүгінгі ұрпақ ұмытқан жоқ. Елім, жұртым деп қызмет еткен Дінмұхамед Ахметұлы артына мол мұра қалдырып кетті. Жақсы адам туралы жақсы сөз көп айтылады. Оның әрбір сәті сағынышпен еске алынады. Себебі карапай- ым халықтың арасынан шығып, халықтың үміті мен сенімін ақтап, халықтық тұлға дәрежесіне көтерілуден асқан абырой жоқ. Ал кісілік пен кішілікті халықтан үйреніп, сол қасиетпен ұлтты тәрбиелеуге ниеттенудің өзі қайталанбас ерлік. Тарих деген сол, әрбір елдік тұлғаның халық үшін төккен тері мен көрген бейнетін таразылайды. Ел басқару, елдікке бастау оңай шаруа емес. Ол тек қана аңызға айналған абыздардың еншісіндегі ғана дүние, — деді өз сөзінде кітапхананың қызмет көрсету бөлімінің меңгерушісі Гүлжазира Қойшыбайқызы.

Шара барысында кітапхана ұжымы ұйымдастырған «Заманының заңғар тұлғасы» атты кітап көрмесіндегі С.Әбдірайымұлының «Елу жыл ел ағасы» және «Өнегелі өмір» сериясымен жарық көрген «Дінмұхамед Қонаев» атты жинағына библиографиялык шолу жасалды.

Осы күні орталықтандырылған көпшілік кітапханалар жүйесінің №6 кітапханасы оқырмандарға ұлы жазушы, ғұлама ғалым Мұхтар Әуезовтің туғанына 125 жыл толуына орай «Әлем таныған Әуезов» атты шарасын ұсынды.

Ашық есік күнінің шымылдығы қалалық мәдениет үйінің домбырашыларының орында- уындағы «Қазақ» күйімен түріліп, «Мұхтардың өзі де үлгі, өмірі де» әдеби-монтаж көрсетілді. Сондай-ақ жазушыға оқырмандар мен оқушылар жүрекжарды жырларын арнады. Ал Тараз өңірлік университеті «Актерлік өнер» факультетінің студенттері «Қаракөз» трагедиясынан көрініс көрсетті.

— Мұхтар Әуезовтің маған «Көксерек» және «Жетім» әңгімесі ұнайды. Мағыналы, әдеби түрде жазылған. Атамыздың көптеген кітаптары мен шығармалары әлемге танымал. Осындай шараға ұйытқы болып, оның құнды дүниелерін кейінгі ұрпаққа танытып жатқан ұйымдастырушыларға алғыс айтамын, — дейді оқушы Аружан Рахымжан.

Гүлбаршын Сейтқазиева, Лаура Абайқызы

Jambyl-Taraz. — 2022. — 16 наурыз

Өз ғасырының бір туар перзенттерінің бірегейі ретінде тарихтың алтын парақтарында өмір жолы мен қызметі хатталып, халқының жадында мәңгілік сақталып қалған ұлы тұлға — Дінмұхамед Ахметұлы Қонаев. Айрықша құрметтеуге лайықты қарымды қайраткер ретінде ел есінде қалған еңсесі биік жан.

Осынау тау тұлғалы азаматтың туған күніне орай Тараз қалалық ардагерлер кеңесі Абай атындағы орталық кітапхана ұжымымен бірлесе отырып, аса көрнекті мемлекет және қоғам қайраткері Д.Қонаевтың 110 жылдық мерей тойына арнап «Ұлтымыздың ұлы тұлғасы» атты оқырмандар конференциясы өткізілді.

Бас қосудың мақсаты — жас ұрпаққа дәуірдің дара тұлғасы, адамдықтың Алатауы Дінмұхамед Қонаев туралы жан-жақты түсінік қалыптастыру, кемеңгер тұлғаның мемлекетке және халқына сіңірген ерекше еңбегін, қажырлы жүргізген саясатын үлгі ету, жастар бойына халқымыздың құндылықтарын сіңіріп, ұлтжанды ұрпақ тәрбиелеу үшін әдебиеттерді насихаттау.

Іс-шараға Тараз қалалық ардагерлер кеңесі төрағасының орынбасары Малтабар Жаманбаев бастаған бір топ ардагерлер, колледж білімгерлері мен кітапхана оқырмандары қатысты.

Алғашқы сөзді қалалық ардагерлер кеңесінің жауапты хатшысы, кезінде Ұлттық Қауіпсіздік комитетінің полковнигі болған Сауранбек Жамалбеков алды. «Химпром» өнді- рістік бірлестігінде ауысым басшысы болып жүрген кезінде 1969 жылы маусым айында зауытқа Д.Қонаевтың келгендігін айтып, қол алысып тұрып, өзіне айтқан жылы лебізін, тілегін тебірініспен жеткізді.

Қазақстан Жазушылар одағының мүшесі, «Д.Қонаев» медалінің иегері Баймағанбет Ахмет бүкіл Алаш жұртына аты мәлім Димаш ағаның елінің өркендеп өсуіне қосқан үлесі мен сіңірген еңбегінің зор екендігін айта келе ол кісі жөнінде жазған туындыларымен жан-жақты таныстырды. Өз кезегінде ақын Құрманғазы Мыңжасарұлы Д.Қонаевқа арнаған арнау өлеңдерін оқыды. Сондай-ақ қалалық ардагерлер кеңесі жанындағы Әкелер кеңесінің төрағасы Аманқұл Ысқақов та өлең жолдарын домбырамен нақышына келтіріп, орындап берді.

Қалалық ардагерлер кеңесі ұйымдастыру-әдістемелік комиссиясының төрағасы Алдаберді Мақашев Д.Қонаевпен ұмытылмас әсерлі кездесуін ерекше шабытпен баяндады.

1980 жылы 12 маусымда Д.Қонаев Сарысу ауданына іс-сапармен келіп, бірқатар шаруашылықтарды аралағаннан кейін аудандағы жаңа типтік жобамен салынған № 124 Байқадам селолық орта кәсіптік-техникалық училищесіне атбасын бұрып, ондағы инженер-педагогикалық ұжыммен оқушылармен кездесіп, оқу орнының оқу-материалдық базасымен танысты.

Өзіне жарасымды еңселі биік бойы, жайдары жүзі бізге ерекше жылы көрінді. Ардақты кісінің өз көпшілікпен қол беріп амандаса бастады. Мен ол кезде директордың орынбасары едім, жұмсақ та аялы алақанын директордан кейін екінші болып алып ерекше қуанышқа кенеліп қалдым. Аса құрметті кісімен түскен суретті сары майдай сақтап келемін.

Кітапхана қызметкерлері өзінің телегей теңіздей білімі мен тәжірибесін, жеке өмірін тұтастай халқына, ұлтына арнап, мансап пен байлықтың құлы болмай, өзінің емес қара ормандай халқының, ұлты мен ұрпағының қамы үшін адал ғұмыр кешіп, баршамызға үлгі болған Д.Қонаевқа арналған «Заманының заңғар тұлғасы» атты кітап көрмесімен таныстырып, библиографиялық шолу жасады. Д.Қонаевтың өмірі мен еңбек жолына арналған «Елін танытқан ер» атты бейне шолу көрсетілді.

Тараз қалалық ардагерлер кеңес төрағасының орынбасары М.Жаманбаев қоғам қайраткері Д.Қонаев өз заманының ұлы саясаткер болғандығын, ол билік басында болған уақыт қарама-қайшылықта күрделі болғанымен, елдің экономикасын әлеуметтік саласын, ғылымын, ұлттық мәдениетін дамыту ісіне айтулы еңбек сіңіргендігін айтып өтіп, жас ұрпаққа ұлы тұлғаның жүріп өткен жолын насихаттау санасына жеткізу бүгінгі күннің талабы екендігін атап өтті.

А.Меңлібайұлы

Тараз қалалық ардагерлер кеңесінің мүшесі

Ардагерлер кеңесі. – 2022. – 2 наурыз