Майдангерлермен мақтанамыз

Майдангерлермен мақтанамыз (Ұлы Отан соғысының ардагері Шалданбай Шаңбаев )

Ұлы Жеңісті жақындатқан ардагерлердің ерлігі, өнегеге толы өмірі арада қанша жыл өтсе де, ұрпақтан-ұрпаққа үлгі ретінде айтыла береді. Өйткені Жеңіс мерекесі – жер басып жүрген барша адамзат баласы үшін мерейлі той.

Осындай қуанышты мерекеге орай «Нұр Отан» партиясы Тараз қалалық филиалының ұйымдастыруымен  Жамбыл медициналық колледжінің студенттері Ұлы Отан соғысының ардагері Шалданбай Шаңбаев және «Ауған соғысы ардагерлері мен мүгедектер одағы» ҚБ төрағасы, «Құрмет» орденінің иегері Дүкенбай Ермековпен кездесті. Сол сұрапыл отты жылдарда кеудесін оққа тосып, ерліктің үлгісін көрсеткен жерлес жауынгерлердің арасында Шалданбай Шаңбаевтың есімін ерекше атауға болады. Тағдырдың жазуымен қаршадайынан соғысқа аттанған ол кезінде өзі секілді барлық майдангердің көкейінде тек бір ғана мақсат болғанын айтты: «Ол – Отанды жаудан қорғау және тек қана жеңіс» болатын. Міне, сол мақсатқа жеткен, бізге бүгінгі бейбіт тірлікті сыйлаған аға буын өкілдеріне құрметтің қандайы да лайық.

Шалданбай ата 1924 жылы Т. Рысқұлов ауданы, Жаңатұрмыс ауылында дүниеге келген. Балалық шағы, отызыншы жылдардағы қиын нәубет жылдары әлі күнге дейін көз алдында. Сол тұста көрген қиындықтар бала Шалданбайды төзімділікке тәрбиелеп қана қоймай, басқа түскен ауыртпалықтарды жеңе білу қасиеттерін де бойына сіңіре береді. 1942 жылы әскерге шақыру хатын алған кезде ол он сегіз жаста еді. Әскери жолы Волга өзенінің бойында оқу-жаттығудан басталады. Осында төрт ай оқығаннан кейін 27 желтоқсанда параходпен Сталинград қоршауына аттанады.

– Сол кезде тізеден қар, үскірік аяз болды. Соған қарамастан жеңіс үшін тек қана алға қарай адымдай бердік, – деп еске алады ақсақал.

Осы жерде немістермен алты ай қырғын соғыс болады. Генерал Павел Павлович басқарған Сталинград майданының әскерлері келіп, жауды артқа шегіндіреді. Павловичтің әскеріне қосылып, ол Кательниково, Запорожье, Одесса қалаларын, Румыния мен Венгрияны жаудың қолынан азат етуге қатысқан. Содан Франкфурт-на-Одере қаласы арқылы Берлинге жақындайды. Осылайша 9 мамырда Жеңіс күнін Берлинде тойлайды. Соғыс біткеннен кейін 1946 жылы елге аман-есен оралады. Алайда ауылға келген кезде Шалданбай ата ағасының соғыста хабар- ошарсыз қалғанын естиді. Ағасының 2 ұл, 2 қызын асырап-бағу үшін оқудан бас тартып, тракторшы болып жұмыс істейді.

Бүгінде 95 жасқа қараған Шалданбай ата ағайын-туғандары, бала-шағасының ортасында бақытты да, берекелі ғұмыр кешіп отыр. Тоғыз ұл-қыз өсіріп, олардан немере-шөбере сүйіп отырған ақсақал әлі де тың, сергек. Кеудесіндегі орденьдер мен медальдар – ардагердің жүріп өткен жолдарының бедерлі белгісіндей. Осылайша әсерлі әңгімесімен бөліскен Ұлы Отан соғысының ардагері Шалданбай Шаңбаев студенттерге оқуда озат, еңбекте ешкімнің ала жібін аттамай, адал болуларын айтып, ақ батасын берді. Бұдан соң «Ауған соғысы ардагерлері» ҚБ төрағасы Дүкенбай Ермеков сұрапыл соғыста елдігімізді нығайта білген азаматтардың ерен ерліктерін баяндап, жастарға үлгі етті. Оның айтуынша, Ауған соғысына облыстан 2200 азамат аттанып, оның 71-і келмеген.

Сондай-ақ кездесуде әскери дайындық тобының студенттері «Соғыс сабақтары» атты ойын-тренинг өткізіп, қонақтарға автоматты шашып-жинау бойынша біліктіліктерін көрсетті.

Шынар Асанқызы

Жамбыл — Тараз. — 2018. — 11 мамыр

• 3201
• 72
• 107