Облыс ардагерлер ұйымында кеңінен меркеленуде.
Ұлыстың ұлы күні — Наурыз тойы облыс ардагерлер ұйымдарында кеңінен мерекеленуде. Өтіп жатқан барлык, шаралар санитарлық сақтық ережелерін қатаң сақтау жағдайында ұйымдастырылуда. Кеше Тараз қаласындағы Абай атындағы орталық кітапханада Тараз қалалық ардагерлер кеңесінің ұйымдастыруымен «Армысың, Әз- Наурыз” атты мерекелік басқосу ұйымдастырылып, оған қаланың ардақты қариялары мен ақ жаулықты аналары қатысты. Мерекелік шараға қатысушылар «Нұр тарайды Наурыздан» деген тақырыпта қойылған кітап көрмесімен танысты. Жиында Тараз қалалық ардагерлер кеңесі төрағасының орынбасары Күләш Әбдікешова құттықтау сөз сөйледі. Күләш Әмедияқызы қазақтың ежелгі дәстүрімен сәбидің тұсауын кесіп, ақжолтай тілеген айтты.
Осында жиналған көпшілік наурыз көжеден дәм татып, «Ұлыс оң болсын, ақ мол болсын!» деген ізгі тілектерімен бөлісті. Ұлттық қауіпсіздік қызметінің ардагері, Тараз қалалық билер кеңесінің төрағасы Сауранбек Жамалбеков жиналғандарға ақ батасын берді. Өнерпаз қария Ысқақов Аманқұл наурыз тойына әннен шашу шашты.
Бүгін, яғни 19 наурызда Ұлыстың ұлы күні облыстық ардагерлер кеңесінде өз жалғасын тапты. Облыс ардагерлерінің бас штабына бірқатар елге еңбегі сіңген ардақты ақсақалдар мен ақ жаулықты аналар шақырылып, оларға облыстық ардагерлер кеңесінің төрағасы Еркінбек Бейсенбекұлы Солтыбаевтың қолымен «Қазақстан Конституциясына — 25 жыл» мерекелік медалі, «Облысқа сіңірген еңбегі үшін» төсбелгісі, облыс әкімінің Құрмет грамотасы мен Алғысхаты салтанатты жағдайда табыс етілді.
Осы күні «Ардагерлер орталығы» ғимаратында Тараз қалалық ардагерлер кеңесінің ұйымдастыруымен шаһардағы белсенді ардагерлерге наурыз көже таратылды.
Еркінбек Бейсенбекұлы Солтыбаев шараға қатысушыларды және облыстың барлық ардагерлерін жаңару мен жаңғыру мерекесі — Наурыз тойымен құттықтады.
Наурыз мерекесі Тараз қаласында және барлық аудан орталықтары мен елді мекендерде ардагерлердің белсенді атсалысуымен және кеңінен қатысуымен аталып өтуде.
Әз-Наурыз баршамызға бақ-береке, қуаныш пен шаттық сыйласын!
Суретте: Тараз қаласындағы Абай атындағы орталық кітапханада өткен мерекелік шарадан көрініс
Ғұмыр дария. – 2021. – 19 наурыз
