Қымбатты жас достар!
Алдарыңызда — күлкі мен қызыққа, шынайы оқиғаларға толы бір керемет кітап! Жазғы демалысты көңілді өткізгіңіз келсе, жаңа достармен танысып, кейіпкермен бір түрлі оқиғаларды бастан кешіргіңіз келсе — бұл кітап сіз үшін!
Бұл жазғы демалыс шомылуға, демалуға достармен көңіл көтеруге арналған уақыт. Бірақ кейіпкеріміз Грегтің бұл жаздан күткені басқа еді… Ендеше, Жефф Киннидің «Итше ыстық күндер» атты кітабын бірге ашайық.
Жефф Кинни – америкалық жазушы, карикатурашы және онлайн ойын әзірлеуші. Ол балалар мен жасөспірімдерге арналған «Тентек балақайдың күнделігі» (Diary of a Wimpy Kid) сериясының авторы ретінде бүкіл әлемге танымал. Оның кітаптары 75-тен астам тілге аударылып, миллиондаған данамен таралып, киноға да айналған. Жазушы өз шығармалары арқылы балалардың шынайы өміріндегі қызықты, күлкілі әрі кейде қиын сәттерін жеңіл тілмен жеткізеді.
Сіздердің назарларыңызға Жефф Киннидің «Тентек балақайдың күнделігі» сериясынан шыққан «Итше ыстық күндер» атты қызықты да ерекше кітабын ұсынамыз.
Кинни, Ж. Тентек балақайдың күнделігі. Итше ыстық күндер [Мәтін] / Жефф Кинни. ; [ағыл. тіл. ауд. Н. Берікқазы].- Алматы : Steppe&World Publishing, 2023. – 224 б.
«Итше ыстық күндер» кітабында басты кейіпкер Грег жазғы демалысты ойын-сауыққа толы өткізгісі келеді. Бірақ анасы оны күнделікті отбасымен уақыт өткізуге, кітап оқуға және сыртта ойнауға итермелейді. Грег болса ыстық күндердің барлығын үйде видеоойынмен өткізгісі келеді. Демалыс қызықты ма, әлде сұмдық па – оны кітаптан оқып білуге болады! Күлкіге, шынайылыққа, бала қиялына толы бұл кітап жасөспірім оқырманды бірден баурап алады.
«Тентек балақайдың күнделігі» – қазіргі балалардың тілімен жазылған, қызықты оқиғаларға толы күнделік формасындағы шығарма. Жеңіл тіл, ерекше стиль, күлкілі суреттер мен шынайы оқиғалар – балаларды кітап оқуға тартатын басты факторлар. «Итше ыстық күндер» — осы сериядағы жарқын туындылардың бірі.
Құрметті оқырман! Егер сен де жаз мезгілінде қандай қызықтар мен оқиғаларға тап болуға болатынын білгің келсе – осы кітапты оқып көр! Жаңа кітап кітапханамызда! Кел де, ал да, күлкі мен қызыққа толы демалысқа бірге аттан!
