Тараз қаласындағы Тұңғыш Президент саябағында Тараз қаласы әкімдігінің ұйымдастыруымен Қазақстан Республикасының Конституциясының 30 жылдығына орай «Айбары асқақ – Ата заң» атты мерекелік іс-шара өтті. Мұнда жиналған көпшіліктің жүзінен Конституция күніне шаттанған жоғары көңіл күйді байқадық.

Іс-шарада Абай атындағы Тараз қалалық кітапханалар жүйесі тақырыптық кітап көрмесін көпшілік назарына ұсынса, қолөнер шеберлерінің көрмесі де көркемдігімен көз тартты. Қала тұрғындары арасында асық ату, ләңгі тебу, арқан тарту, гір тасын көтеру және тағы басқа спорт түрлерінен жарыст ар ұйымдастырылып, жеңімпаздар мен жүлдегерлер сыйлыққа да ие болды. Жастардың бойында отаншылдыққа, Конституцияны құрметтеуге деген патриоттық сезімдер оянғаны анық. Іс-шара барысында Ы.Дүкенұлы атындағы Тараз қалалық мәдениет үйінің өнерпаздары патриоттық әндер шырқап, тарихы мың жылдықтардан тамыр тартқан шаһар жұртшылығына көтеріңкі көңіл-күй сыйлады.

– Конституция күні – еліміз үшін ең қастерлі мереке. Еліміздің барлық адамдары осы Заң мен тәртіп арқылы қауіпсіз деңгейге жетіп отыр. Біздің әулиеаталықтар мерекені үлкен көңілкүймен, ерекше тойлап жатыр. Ол өте дұрыс, көңілге қонымды. Өзім «Астана» шағынауданының тұрғыны болғандықтан, осы саябаққа үнемі келемін. Серуендеп жүремін. Мерекеде түрлі бағдарламалар жүзеге асып, концерт ұйымдастырылып жатқанына қуаныштымын. Менің көршілерім де осында жүр. Ақсақалдар мен әжелер де келіп, концерт тамашалап, бір жасап қалды. Іс-шара жоғары деңгейде өтіп жатыр, – дейді А.Тоқпанов атындағы қазақ драма театрының актрисасы, Қазақстанның еңбек сіңірген әртісі Майра Әлімбетова.

Есет Досалы 

Aq jol. — 2025. — 4 қыркүйек (№99). — 2 б.

Мемлекет басшысы Қасым-Жомарт Тоқаев «Адал адам – Адал еңбек – Адал табыс» атты Ұлттық құрылтайдың үшінші отырысында сөйлеген сөзінде: «Кітапхана – мемлекеттің, ұлттың негізгі жады. Еліміз үшін құнды тарихи деректер мен материалдардың дені кітапханада сақталады. Сондықтан кітапхана ісін дамытуға бейжай қарауға болмайды», – деп атап өткен болатын. Президенттің тапсырмасына сай облыс әкімі Ербол Қарашөкеев биыл «Әулиеата – кітап оқитын өңір» жобасын жариялағаны белгілі.

 Осы құндылықтардан кітапхана саласындағы жұмыстардың қаншалықты маңызды екенін білуге болады. Саладағы жауапкершілікті кітапханашылар да ерекше сезініп келеді. Біздің өңірде кітап оқуға, кітапхана жұмысын қолдауға деген ниет жоғары. Біз оны Тараз қаласының «Ұлы дала» шағынауданында жаңа кітапхананың ашылуынан байқадық. Рухани орданың ашылу салтанатында Тараз қаласының әкімі Бақытжан Орынбеков сөз сөйледі.

— Кітап — қай кезде де рухани жан азығы, кітапхана – адамдардың жаназығына қызмет ететін қазыналы орталық. Еліміздің Конституциясының 30 жылдығы қарс аңында ашылып жатқан кітапхана құтты болсын! Осы «Ұлы дала» шағынауданында 45 мың тұрғын бар. 41 мың кітап қоры бар осы рухани орда тұрғындарға сапалы қызмет ететін болады. Осылайша біз өте маңызды істің куәсі болып отырмыз. Жаңа кітапхананың оқырмандары көп болсын!, — деді шаһар басшысы. Жазушы-драматург, халықаралық «Алаш» сыйлығының лауреаты Елен Әлімжан көпшілікті құттықтап, қуаныштарын бөлісті.

– Жалпы адам үшін екі қажеттілік бар. Біреуі – рухани байлық, екіншісі — материалдық құндылық. Материалдық байлықты өнідірушілер көп. Ал рухани байлықты жасаушылар қашанда аз. Кітапхана – киелі орын. Сол киелі жерде еңбек ететін әр кітапханашының еңбегі ерен. Біз қазір адамдар кітап оқымайды деп жүрміз. Бірақ қызықтыра білсе кітапты жанына серік ететін жандар жеткілікті. Біз оны кітапханашылардың өнегелі ісінен байқаймыз. Ашылған рухани орда әрқашан оқырмандарға толы болсын, — деп тілегін толғана жеткізді.

Мұнан соң сөз алған белгілі қаламгерлер Қазақстанның еңбек сіңірген қайраткерлері Қайырбек Асанов пен Көсемәлі Сәттібайұлы да қуаныштарын жасыра алмай, ағынан жарылып, жылы лебіздерін білдірді. Аталған ақын- жазушылардың қатысуымен кітапхананың лентасы қиылды. Шоқан Уәлиханов атындағы облыстық ғылымиәмбебап кітапханасының директоры Эльмира Абдинова да қуанышқа ортақтасқанын айта кеткен жөн. Мұнан соң құрметті қонақтар жаңа ғимаратты аралап көрді. Кітапхананың жалпы ауданы 400 шаршы метрді құрайды. Абонемент, оқу залы заман талабына сай. Жайлы коворкинг орталығы да – оқырманның үлкен қуанышы. Бір сөзбен айтқанда, мұнда қажеттіліктің бәрі бар.

– Қала бойынша 17 кітапханада 495 мың кітап қоры бар. «Ұлы дала» шағынауданының кітапханасы 41 мың дана әдеби көркем кітаппен қамтылып отыр. Кітапханашылар қазіргі таңда оқырмандарға барлық жағынан мінсіз қызмет жасауға дайын, – дейді Абай атындағы Тараз қалалық кітапханалар жүйесінің директоры Ұлбосын Сәулебаева.

Ал аталған шағынауданның тұрғындары да өте қуанышты. «Бұрын қаланың орталық бөлігіндегі кітапханаларға жиі баратынбыз. Енді үйімізге ең жақын кітапхананың қызметін пайдаланатын болдық. Бұл уақытты үнемдеуге де өте тиімді. Жаңа кітапхананың ашылуы барша тұрғындардың көңіліне алтын сәуле жаққандай ғажайып іс, үлкен қамқорлық», — деп аталған шағынауданның тұрғыны Рауан Есен өзінің көңіл күйімен бөлісті.

Жаңа кітапханаға ақ жаулықты әжелер шашу шашса, жас оқырмандар белгілі ақындардың жырларын жатқа оқып, жиынның маңызын арттыра түсті.

 Есет Досалы

Ag jol. — 2025. — 30 тамыз (№98). — 1 б.

     Қазақстан Республикасы Конституциясының 30 жылдығына орай Тараз қаласындағы «Ұлы дала» шағынауданында жаңа кітапхана пайдалануға берілді.

Нысанның салтанатты ашылу рәсіміне қала әкімі Бақытжан Орынбеков, зиялы қауым өкілдері мен жергілікті тұрғындар қатысты.

Құттықтау сөз сөйлеген шаһар басшысы ұлт руханиятын дамыту – басты міндеттердің бірі екенін ерекше атап өтті.

Сонымен қатар жазушы, драматург, публицист, «Алаш» әдеби сыйлығының лауреаты Елен Әлімжан, Қазақстанның еңбек сіңірген қайраткері, Тараз қаласының Құрметті азаматы, ақын Қайырбек Асанов және Қазақстанның еңбек сіңірген қайраткері, «Алаш» сыйлығының иегері Көсемәлі Сәттібайұлы да сөз алып, ізгі лебіздерін білдірді.

45 мыңнан астам тұрғыны бар шағынауданда ашылған жаңа кітапхана 400 шаршы метр аумақты алып жатыр. Кітап қоры – 41 мың дана. Руханият ордасында оқырмандарға абонемент бөлімі мен оқу залы, «Коворкинг» орталығы қызмет көрсетіп, тұрғындардың бос уақытын тиімді әрі мазмұнды өткізуіне барлық жағдай жасалған.

Қазіргі таңда Тараз қаласы аумағындағы 17 кітапханада жалпы кітап қоры 495 мыңнан астам дананы құрайды.

Облыс әкімінің баспасөз қызметі

Ar-Ai. — 2025. — 29 тамыз (№66). — 1 б.

      ҚР Конституциясының 30 жылдығына орай «Ұлы дала» шағынауданында жаңа кітапхана пайдалануға берілді. Салтанатты шараға Тараз қаласының әкімі Бақытжан Орынбеков қатысып, ізгі тілегін жеткізді.

– Кітапхана – адамзат өркениетінің асыл қазынасын ұрпақтан-ұрпаққа жеткізіп келе жатқан киелі мекен, тарих пен бүгінді, білім мен парасатты жалғап тұрған рухани көпір. Уақыт жылжып, қоғам өзгерсе де, кітапхананың маңызы ешқашан кеміген емес. Қайта, оның рөлі заман талабына сай жаңарып, түрленіп, толығып келеді. Заңғар жазушы Әбіш Кекілбаевтың «Адамды адам еткен – кітап, адамзат еткен – кітапхана» деген тәмсілі кітапхананың ұлт руханиятында алар орнын айшықтап тұрғаны сөзсіз.

Заман ағымына сай кітапханалар білім мен ақпараттың орталығы, зерттеу мен шығармашылықтың алаңы, тәрбие мен мәдениеттің ұйытқысына айналып келеді. Әсіресе, жастардың кітап оқуға деген қызығушылығы мол. Сондықтан, олардың сапалы туындылардан сусындауына жағдай жасау – баршамыздың ортақ міндетіміз.

Баршаңызға белгілі, биыл Жамбыл облысының әкімі Ербол Қарашөкеевтің бастамасымен «Әулиеата – кітап оқитын өңір» жобасы бастау алды. Бүгін ашылып отырған жаңа кітапхана аталған жоба аясында жүзеге асырылып жатқан ілкімді істердің бір көрінісі әрі Ата заңымыздың мерейтойына тарту болып отыр. Алдағы уақытта да бұл бағыттағы жүйелі жұмыстар өз жалғасын тауып, кітапханаларымыз жергілікті қаламгерлердің тың туындыларымен толыға бермек, – деді шаһар басшысы.

Келесі кезекте жазушы, драматург, публицист, «Алаш» әдеби сыйлығының лауреаты Елен Әлімжан, «Қазақстанның еңбек сіңірген қайраткері», Тараз қаласының Құрметті азаматы, ақын Қайырбек Асанов және «Алаш» әдеби сыйлығының иегері, Қазақстанның еңбек сіңірген қайраткері Көсемәлі Сәттібайұлы сөз алып, жылы лебіздерін арнап, руханият ордасының лентасын қиды.

45 мыңнан астам тұрғыны бар «Ұлы дала» шағынауданында ашылған кітапхананың жалпы көлемі 400 шаршы метрді, кітап қоры 41 мың дананы құрайды. Сондай-ақ онда оқырмандарға абонемент, оқу залы, коворкинг орталығы қызмет көрсетіп, келушілердің бос уақытын тиімді әрі пайдалы өткізуіне барлық жағдай жасалған.

Жалпы, қазіргі таңда облыс орталығының аумағындағы 17 кітапханада кітап қоры 495 мың данадан асып отыр.

Құрбанәлі Шахабай

Jambyl Taraz. — 2025. — 29 тамыз (№68). — 1 б.

     Абай Құнанбайұлының 180 жылдығы – халықтың тойы. Мерейтойға орай өңір кітапханаларынан да қызықты деректер келіп жатыр. Абай және оған ең жақын болған кісілердің есімін кітапханашылар да ерекше құрметтейді екен.

Бұл деректерге біз де қызыға назар аудардық. Хакімге ең қымбат адам – әжесі Зере. Жуалы ауданы Теріс ауылдық кітапханасының тұрақты оқырманы – Зере Нұржігіт. Мәселен, хакімнің анасының аты – Ұлжан. Тараз қалалық орталықтандырылған көпшілік кітапханалар жүйесінің № 4 кітапханасында Ұлжан Абдымұратова атты кітапхана оқырманы бар екен. Облыс орталығындағы Ғ.Мұратбаев атындағы кітапханасында Ұлжан Бейсенова атты қызметкер тер төгіп жүрсе, Әйгерім Қайрат, Әйгерім Ахумбекова, Әйгерім Демешова, Тоғжан Әбдіхалықова атты кітапхана оқырмандары да өз есімдерін мақтаныш етеді. Шаһардың №6 кітапханасын Әйгерім Бекпатшаева абыройлы басқарып отыр.

Қордай аудандық орталықтандырылған кітапхана жүйесі бойынша Абай есімімен аттас оқырмандар ауданның әр ауылдық аймақтарында кездеседі екен. Атап өтсек, Жамбыл ауылдық кітапханасына 2025 жылы тіркелген оқырман – 2000 жылы дүниеге келген Кұнанбай Абай Әмірханұлы. Қордай аудандық орталық кітапханасының тұрақты оқырманы, аудандық музей жетекшісінің аты-жөні Абай Кенжебаев. Өтеген батыр ауылдық кітапханасының тұрақты оқырманы Абай Айдарбек, Бетқайнар ауылдық кітапханасының тұрақты оқырманы Абай Барманқұлов, Қақпатас ауылдық кітапханасының оқырманы, 6-сынып оқушысы Абай Мадыбай және бар. Абай есімін иеленгендер мұнымен бітпейді. Жаңатұрмыс ауылдық кітапханасында Абай Сұлтанов, Қаракемер ауылдық кітапханасында Абай Төлеби, Степной ауылдық кітапханасында Абай Байғабылов, Арал ауылдық кітапханасында Абай Әлімбетов бар.

Бұл қатарға Жамбыл аудандық орталықтандырылған кітапханалар жүйе сіне қарасты Шайдана ауылдық кітапханасының тұрақты оқырманы, 9-сынып оқушысы Абай Досымды да қосуға болады. Ол «Қазақстанның үміт артары» төсбелгісінің иегері. Талас аудандық орталықтандырылған кітапханалар жүйесіне қарасты кітапханалар мен аудандық кітапхана да Абай, Ибраһим, Әйгерім, Тоғжан есімді атт ас оқырмандарға қызмет көрсетеді. Атап айтқанда, Әйгерім Әмірбек Талас ауданы әкімдігінің ішкі саясат бөлімінде статист болып жұмыс істейді. Аудандық орталық кітапхананың тұрақты оқырманы, Талапты орта мектебінің қазақ тілі мен әдебиеті пәнінің мұғалімі Әйгерім Әбілхайырова, Талапты орта мектебінің 7-сынып оқушысы, кітапхананың тұрақты оқырманы Әйгерім Сейсенбек, Ақкөл ауылындағы Ақкөл орта мектебінің 6-сынып оқушысы, кітапхананың тұрақты оқырманы Әйгерім Асатулла, Ақкөл ауылдық әкімшілігінде қоғамдық жұмысшы, кітапхананың тұрақты оқырманы Абай Қызылбай, Бостандық ауылында кітапхана оқырманы Абай Қалдарбек, Бостандық ауылдық амбулаториясының мейірбикесі, кітапхана оқырманы Тоғжан Тұрмысова, Қызыләуіт ауылы, Мыңатай Қыстаубайұлы атындағы орта мектебінің 3 «А» сынып оқушысы Ибраһим Ардақұлы, Қожағаппар ауылы, Қ.Қошманбетов мектебі бастауыш сынып мұғалімі, кітапхана оқырманы Әйгерім Байымбетова, Тамды ауылдық кітапханасының тұрақты оқырманы Әйгерім Төртбаева да – қоғамдық іске белсенді жас. Жуалы аудандық орталықтандырылған кітапханалар жүйесіне қарасты Қарабастау ауылдық кітапханасында Әйгерім Көнебаева, Қарабастау ауылында Әйгерім Талғат, Сұрым ауылдық модельді кітапханасының оқырмандары Абай Зауырбеков, Әйгерім Ілесбек, Көктөбе ауылдық кітапханасының оқырманы Әйгерім Нұрпейісова, Ақтөбеде ауылдық кітапханасының оқырмандары Абай Айтбаев, Әйгерім Дәулет, Көлтоған ауылдық кітапханасының оқырманы Әйгерім Әсет, Күреңбел ауылдық кітапханасының оқырманы Әйгерім Алмаханқызы, №10 Күреңбел орта мектебінің 9-сынып оқушысы Әйгерім Күзембаева, Теріс ауылдық кітапханасының оқырманы Әйгерім Ерпайыз, Анель Абайқызы, Мойынқұм аудандық орталық кітапхананың тұрақты оқырмандары Абай Райымбеков, Абай Омаров және Әйгерім Көшкінбай хакімнің есімін ерекше құрметтейді.

Абай хакімнің өз есімі мен айналасындағы кісілердің есімін де құрметтейтін адамдар біздің өңірде көп екен. Бұл өте қуанышты жағдай. Абай хакімге есіміміз ғана ұқсамай, өнегелі де, озат ісіміз де ұқсап жатса қанеки!

Есет Досалы

Aq jol. — 2025. — 23 тамыз (№95). — 12 б.

      Әрбір мемлекеттің өз тәуелсіздігін айқындайтын басты белгілері болады. Олар – Туы, Елтаңбасы және Әнұраны. Қазақстан Республикасының да еңсесін көтеріп, әлемге танытқан осы қасиетті құндылықтарымызды біз «Мемлекеттік рәміздер» деп атаймыз.

1992 жылдың 4 маусымында Тәуелсіз Қазақстанның жаңа мемлекеттік рәміздері қабылданды. Бұл күн тарихымызда мәңгілікке алтын әріппен жазылып, бүгінде Рәміздер күні ретінде аталып өтеді.

Туымыз – бейбітшілік пен бірліктің, биік арман мен асқақ рухтың белгісі. Елтаңбамызда шаңырақ бейнесі-ортақ Отанымызды, бірлік пен татулықты білдіреді. Әнұран – әр қазақтың жүрегін жігерлендіріп, намысын қайрайтын асқақ әуен.

Рәміздер – елдің тарихы мен болашағын сабақтастырып тұрған қасиетті құндылық. Сондықтан әрбір қазақстандық оларды қастерлеп, ардақтап, қадірлеуі тиіс. Бұл – Отанға деген сүйіспеншіліктің, патриоттық сезімнің айқын көрінісі. Бүгінгі жас ұрпаққа рәміздерімізді қастерлеу, оларға құрметпен қарау, биікке көтеру – ең үлкен аманат. Өйткені рәміздер – тәуелсіздігіміздің кепілі.

Осы орайда Тараз қалалық орталықтандырылған көпшілік кітапханалар жүйесінде «Ел рәміздері – ұлт рухы» әдеби-танымдық кеші, «Рәміздер – Тәуелсіздік тұмары» патриоттық брейн-рингі, «Мемлекеттік рәміздер – ұлттық мақтаныш» атты «дөңгелек үстел» отырысы, «Жырға қосам рәмізін Отанымның» атты мәнерлеп оқу байқауы сынды шаралар өткізілді. Онда оқырмандарға мемлекеттік рәміздердің тарихы мен маңызы таныстырылып, еліміздің айрықша белгілерінің мәні жан-жақты түсіндірілді.

Мемлекеттік рәміздерімізге деген мақтаныш сезімін арттыру – әрбір азаматтың қасиетті борышы.

Бақыт Тоқсанбаева,

Тараз қаласы әкімдігі мәдениет және тілдерді дамыту бөлімінің басшысы

Jambyl Taraz. — 2025. — 27 тамыз (№67). — 2 б.

     Абай атындағы Тараз қалалық орталықтандырылған кітапханалар жүйесіне қарасты кітапханалар оқырмандарды тарта отырып, түрлі іс-шаралар өткізіп тұрады. Мұндай ізденістер аталған мәдениет ошақтарына келетін әр кісіге жақсы әсер сыйлайды.

Мәселен, №6 кітапханада кіт ап оқуды ілгерілету мақсатында «Менің сүйікті кітабым» атты мәнерлеп оқу өткізілді. Оқырмандар өздерінің сүйікті шығармаларынан үзінділерді мәнерлеп оқып, кітап мазмұны туралы өз ойларымен бөлісті. «Кітап – рухани қазына» атты кітап көрмесі ұйымдастырылып, таныстырылды. Оның ішінде мектеп партасында отырған Еркенұр Жармамбет, Шерхан Бейсетай секілді оқушылардың кітапқа деген құштарлығын ерекше байқадық. Жақсы ұйымдастырылған мұндай көрмелер оқырманды молайта түсетіні анық.

Жалпақтөбе алабының кітапханасында оқырмандарға аса көрнекті сазгер, ән жанрының әйгілі майталманы, Қазақстан мәдениетіне еңбегі сіңген қайраткер, осы замандағы қазақ эстрадасының негізін салушылардың бірі, Қазақстанның Халық әртісі Шәмші Қалдаяқовтың өмірі мен шығармашылығын насихаттау мақсатында «Ән падишасы – Шәмші аға» атты әдеби вернисаж өткізілді. Бұл іс-шараға да алқапта тұратын тұрғындар көп жиналды. Себебі, тұрғындардың көпшілігі – дүнген ұлтының өкілдері. Олардың Қалдаяқовқа деген құрметтері ерекше. Тіпті, олар «Дүнген қызын» әншілерге қосылып, бірге шырқады. «Шәмші әндері – халқымыз үшін мәңгілік мұра. Мұндай кештердің жиі өтуі тыңдарманның жүрегіне жағымды әсер сыйлайды, әр жүректі ізгілікке тәрбиелейді. Себебі, Шәмші әндеріне толқымау мүмкін емес», – дейді әнші, Қазақстанның еңбек сіңірген қайраткері Бақыт Шағырбаев.

М.Әуезов атындағы кітапханада оқырмандарға спорттың адам өмірінде алатын орны туралы түсіндіру, салауатты өмір салтын ұстануға баулу мақсатында «Жанға дауа, қолға күш» атты спорт алаңы өткізілді. Іс-шараның жас оқырмандарға берер пайдасы мол болды. Себебі, спортты серік еткен адам сергек болады. Сергек жүрген адам кітапты да жақсы сіңіріп оқып, айналасына шуағы мен нұрын шашып тұрады. «Мұндай іс-шаралар жоспарға сай үнемі өткізіліп тұрады», – дейді аталған кітапханалар жүйесінің директоры Ұлбосын Сәулебаева.

Есет Досалы

Aq jol. — 2025. — 23 тамыз (№95). — 12 б.

      Абай атындағы орталық кітапханалар жүйесіне қарасты М.Әуезов атындағы кітапханада оқырмандарға ақын Бауыржан Үсеновтың туғанына 65 жыл толуына орай өмірі мен шығармашылығын насихаттау мақсатында «Көңілдің кейбір сәттері» атты дауыстап оқу шарасы өткізілді. Шарада ақынның нәзік сезімге толы өлеңдері, өмірдің мәні мен адам жанының иірімдерін бейнелеген туындылары оқылды.

Өнер көрсетушілер «Ән бар еді, бір әнім, шынайы әнім, Ұмытып қап әуенін мұңаямын» деп жырлаған ақынның жан әлеміне үңілуге талпыныс жасады.

Жас оқырмандар мен әдебиет сүйер қауым ақынның жүрек тербеген жырларын тебірене орындап, оның шығармаларының рухани мәні жайлы ой қозғады. Іс-шара жас оқырмандарға, студенттерге ерекше әсер етті.

Олар Бауыржан Үсеновтың:

Менің ұшқым келеді биік-биік,

Бұлттарменен тигізсем иыққа иық.

Содан кейін түйіліп төмен қарай,

Жыр нөсерін жіберсем құйып-құйып, – деген асау сезіміне немесе келесі бір сәттегі:

Көңілдің көк дөнені ал, кісіне,

Жараспас жабы тірлік сал кісіге.

Соқтырып жөнелейін, мінсіз бүгін,

Шабыттың белі жуан әлдісіне, – деп төгілген толғанысына терең бойлады.

Іс-шара барысында ақын жайлы естеліктер айтылып, шығармашылық жолынан сыр шертер бейнематериал көрсетілді. Іс-шараны кітапхана меңгерушісі Қарлығаш Әгигаева      қорытындылап, қатысушыларға алғысын білдірді.

Абай атындағы орталық кітапханасында «Жастар кітап әлемінде» жобасы аясында 12 тамыз – Халықаралық жастар күніне орай оқырмандар арасында «Жастар – мемлекетіміздің жарқын болашағы» жайында ой бөлісу мақсатында «Елдік пен ерліктің бастауы – жастар» атты пікір алмасу өткізілді. Шараның мақсаты – жас буынның елдік рухын, патриоттық сезімін арттыру, қоғамдық өмірдегі белсенділігін жоғарылату болатын. Қазіргі таңда жастардың түрлі бағыттарға белсенділігі жоғары. Соны тұрақты дамытып отыру үшін патриоттық іс-шаралар аса қажет.

Іс-шара барысында орталық кітапхана директоры Ұлбосын Сәулебаева барша жас қонақтарды белсенділікке шақырып, жастардың мемлекет дамуына қосар үлесі, олардың жаңа идеялары мен бастамалары жөнінде пікір алмасты. Белсенді оқырмандар мен жас мамандар өз ойларымен бөлісіп, ел болашағы үшін білім мен еңбектің маңыздылығын атап өтті. Кеш соңында қатысушыларға патриоттық әдебиеттер ұсынылып, кітап көрмесі таныстырылды.

Ал №4 кітапханасында «Ел болып оқимыз» облыстық жобасы аясында Ұлы Отан соғысының даңқты батыры, ерлік пен елдіктің символына айналған Бауыржан Момышұлына арналған «Халықтың жаны мен намысындай» атты тарихи-танымдық кеш өтті. Кеш барысында батырдың өмір жолы, әскери ерліктері мен әдеби шығармашылығы жан-жақты баяндалды. Қатысушылар даңқты батырдың Отанға адалдық, намыс пен жауапкершілік туралы нақыл сөздерінен үлгі алды. Іс-шарада батырдың кітаптарынан үзінділер оқылып, оның ерлікке толы ғұмырына арналған фотокөрме ұйымдастырылды. Іс-шараны кітапхана меңгерушісі Гүлжанар Жолина қорытындылап, қонақтарға алғысын білдірді.

Есет Досалы

Aq jol. — 2025. — 16 тамыз

     Тараз қалалық орталықтандырылған көпшілік кітапханалар жүйесі қазақтың ұлы ойшылы, ақын, ағартушы Абай Құнанбайұлының мерейтойына орай М.Әуезов атындағы кітапхананың ұйымдастыруымен Қ.Рысқұлбеков атындағы саябақта «Абай әлемі» атты поэзия сағатын өткізді. Оқырмандар ақынның лирикалық өлеңдерін оқып, «Абай тағылымы – халық даналығы» атты кітап көрмесімен танысты.

  Сонымен қатар «Абай мұрасы – ұрпаққа ұлағат» атты әдеби кеш ұйымдастырылды. Іс-шараға Абай атындағы Жамбыл гуманитарлық колледжінің студенттері, оқушылар, ҚР Ұлттық Ұланы 5513 әскери бөлімінің Бауыржан Момышұлы атындағы 85395 сарбаздары және кітапхана оқырмандары қатысып, Абайдың мазмұны өте бай өлеңдері мен маңыздылығы жоғары қара сөздерін жатқа оқыды. Қаламыздағы Абай атындағы №26 орта мектебінің мұғалімі Алмаш Ермекбаева Абайдың «Толық адам» ілімінің философиялық мәні туралы өз пікірімен бөлісті. Қатысушыларға «Абай жолы» романынан тәрбиелік мәні бар бейнеролик көрсетілді. «Адамзаттың шамшырағы – Абай » атты кітап көрмесі ұйымдастырылып, оқырмандарға таныстырылды. Тараз қалалық орталықтандырылған көпшілік кітапханалар жүйесіне қарасты Ғ.Мұратбаев атындағы кітапханада «Дархан халықтың – дана Абайы» атты әдеби шолу өткізілді. Іс-шара барысында жас оқырмандарға Абайдың өмірі, өлеңдері туралы тәрбиелік маңызы жан-жақты түсіндірілді. Сонымен қатар №4 және №5 кітапханаларда Абайдың шығармашылық мұрасын дәріптеу мақсатында «Абай – пір тұтар, ақыл-ой алыбы» атты дауыстап оқу іс-шарасы, «Мақсатым – тіл ұстартып, өнер шашпақ» атты дайджест ұйымдастырылды. Кітапхана оқырмандарымен ТЖМ «Қазселденқорғау » ММ «Жамбыл аумақтық пайдалану басқармасы» филиалы қызметкерлері ұлы ақынның поэзиясын мәнерлеп оқып, оның қара сөздерінен тағылымды ойларды көпшілікке жеткізді. Шығармашылық жолы туралы кең көлемде мәлімет беріліп, ақынның өлеңдері, қара сөздері мен аудармалары таныстырылды. «Абай айнасы» атты кітап көрмесі көпшілік назарын аударып, библиографиялық шолу жасалды. Іс-шараға қатысушыларға Абайдың өнегелі сөздері мен нақылдары ұсынылып, оның бүгінгі ұрпаққа берер тағылымы туралы пікір алмасты.

     «Көне қамал» кешеніндегі көркем көрініс

Тараз қаласы әкімдігінің мәдениет және тілдерді дамыту бөлімі мен «Тараз қалалық орталықтандырылған көпшілік кітапханалар» жүйесінің ұйымдастыруымен Көне қамалда «Абай әлемі» атты әдеби сазды кеш өтті. Іс-шараның мақсаты қазақтың дара тұлғасы, ұлт руханиятының темірқазығы, ұлы ақынның бай мұрасын дәріптеу, өскелең ұрпаққа терең таныстыру мақсатында болды. Іс-шарада Абайдың жүрекке жол тартқан өлеңдері мәнерлеп оқылып, кітапхана қызметкерлері ұлы ақынның қара сөздерінен терең ойлы үзінділерді көпшілікке ұсынды. Абайдың әндері орындалып, күйлері жұрттың жүрегіне жетті. «Тараз жастары» театры сахналық көріністер көрсетті. Абай атындағы орталық кітапханасының қызметкерлері «Абай – ұлы тұлға» атты кең көлемде Абай шығармаларынан кітап көрмесін ұйымдастырды. Бұл күні тарихи Тараз аспанында Абайға деген құрмет асқақтап тұрды.

 Есет Досалы

Ақ жол. – 2025. – 12 тамыз (№90). – 8 б.

     Аmanat партиясы облыстық филиалының қолдауымен Тараз қалалық орталықтандырылған көпшілік кітапханалар жүйесі ұлтымыздың ұлы ойшылы, ақын, философ Абай Құнанбайұлының туғанына 180 жыл толуына орай «Адамзаттың шамшырағы – Абай» атты әдеби круиз ұйымдастырды. Бұл іс шара қоғамдық көлік жолаушыларына арналды.

Іс-шара барысында ұлы ақын Абайдың өмірі мен шығармашылығы туралы сұрақтар қойылып, белсене қатысқан жолаушыларға сыйлық берілді. Аталған кітапхананың сұрақтарына жауап беріп, сыйлық алған жеңімпаздың бірі тараздық Іңкәр Бекенқызы. «Биыл Абай Құнанбайұлы атамыздың мерейтойы. Ақынның өлеңдерін үнемі жаттап, өзіме тәрбие ретінде пайдаланамын. Маған хакімнің қара сөздері туралы сұрақтар келді. Дер кезінде жауап бердім. Осындай танымдық сұрақ-жауап сайыстарының өтіп тұрғанын қолдаймын», – дейді ол. Сонымен қатар іс-шараға белгілі ақын Серік Томановтың немерелері де белсене қатысыпты. Айзере Серік пен Әлихан Серік хакімнің өмірі мен шығармашылығына назар аударып, ізденіп жүретін балалар екен. Олар ақынның өмірінен қойылған сұрақтарға сәтті жауап беріп, сыйлыққа Абай шығармаларының жинағын ұтып алды.

Қазақтың ұлы ақыны, ағартушы Абай Құнанбайұлының 180 жылдық мерейтойына орай М.Әуезов атындағы кітапхана Қ.Рысқұлбеков саябағының демалушыларымен «Абай әлемі» атты поэзия сағатын өткізді. Мұндай кеш кімді де болса рухани биіктерге жетелеп, болашаққа деген құштарлыққа ұмтылдыратыны белгілі. Саябақта қыдырып жүрген қала тұрғындары лирика әлеміне терең қанат қағып, рухани демалысты сезінді. «Мұндай іс- шаралардың өтіп тұрғанын қолдаймыз. Өлең тыңдау деген – демалыстың үлкені. Абай Құнанбайұлы поэзиясы рухани үлкен құндылық. Өзім де немерелеріме ақынның өлеңдерін жаттатып жүремін. Абай жырлары – рухани бағытқа адастырмай апаратын бағдаршам», – дейді қала тұрғыны, Қазақстанның еңбек сіңірген қайраткері Асылхан Шүңіреков.

Осылайша, хакімнің мерейтойына арналған іс-шаралар көпшіліктің көңілінен шығып жатыр. Алдағы уақытта да Абай әлеміне терең саяхат жасау басқа да кітапхана, рухани ордалар арқылы жалғаса берері анық.

«Орталық кітапханалар жүйесі және оған қарасты кітапханалар Абай Құнанбайұлының мерейтойына бірнеше ауқымды жоспар жасаған еді. Сол жоспарымызды шетінен ел назарына ұсынып келеміз.

Кітапханамызға хакімнің мерейтойына қатысты ұсыныстарымен келіп жатқан кісілер де бар. Біз басқа мекемелермен бірлесе отырып алдағы уақытта да халықтың ойынан шығатын іс шараларымызды жалғастыра береміз. Себебі, Абай – адамзаттың ұстазы. Себебі, Абай – таусылмас терең мұхит, – дейді Абай атындағы Тараз қалалық орталықтандырылған кітапханалар жүйесінің директоры Ұлбосын Сәулебаева.

 Есет ДОСАЛЫ

Ақ жол. – 2025. – 7 тамыз (№88). – 7 б.