Болмысы бөлек, парасаты биік, ұлт руханиятына адал қызмет еткен азаматтың бірі де бірегейі Серік Томанов. Оның есімі табандылықпен атқарылған еңбекпен, ел мүддесін бәрінен жоғары қоятын азаматтық ұстаныммен тығыз байланысты. Байыптылық пен зиялылықты ту етіп, сөз бен істің үйлесімін сақтай білетін тұлғалық келбеті көпке үлгі еді…

      Серік Томанов — жүрек сөзін жырмен өрнектеген, адам жанының нәзік иірімдерін терең сезіне білетін ақын. Оның өлеңдерінен туған жерге деген сағыныш, елге деген сүйіспеншілік, адамзатқа деген мейірім айқын сезіледі. Ол сөзді талғаммен таңдап, қарапайым тіршіліктің өзінен үлкен философия таба білетін еді. Ақынның әрбір жолы оқырманын ойға жетелейді, рухын көтереді, жүрегіне жылу сыйлайды.

      Құрметті оқырмандар! Сіздердің назарларыңызға Серік Томановтың «Соғады сендеп жүрегім» өлеңдер, балладалар, поэмалар кітабын ұсынамыз.

      Осындай дарынды тұлғаның еңбегі — қазақ әдебиетінің қазынасына қосылған бағалы мұра.

     Томанов, С. Соғады сен деп жүрегім [Мәтін] : өлеңдер, балладалар, поэмалар / Серік  Томанов. — Алматы: Хантәңірі, 2017. — 260 б.

Қу тірліктің бағасын білгің келсе,

Көз қырыңды салып қой қорымдарға!

Серік Томанов

   «Соғады сен деп жүрегім» — Серік Томанов поэзиясындағы махаббат лирикасын терең философиялық деңгейге көтерген көрнекті жыр жинақтарының бірі. Бұл кітапта ақын адам жүрегінің ең нәзік, ең шынайы күйін — сүйіспеншілік сезімін басты тақырып етіп алып, оны өмір, тағдыр, уақыт, жалғыздық және рухани жауапкершілік ұғымдарымен астастыра суреттейді.

Ақын махаббатты адамды әлсірететін емес, керісінше рухани кемелдікке жеткізетін күш ретінде көрсетеді. Өлеңдерде жүрек пен ақыл, сезім мен сабыр арасындағы ішкі тартыс айқын байқалады.

Бұл жыр жинақ махаббатты терең сезінетіндерге, поэзиядан жан тыныштығын іздейтіндерге, сезім мен ой үйлесімін бағалайтын оқырманға арналған. Өлеңдер оқырманды толғандырып қана қоймай, өз жүрегіне үңілуге мәжбүр етеді.

«Соғады сен деп жүрегім» — Серік Томановтың махаббат лирикасындағы шынайылығы мен рухани тереңдігін танытатын көркем жыр жинағы.

Ақын жырларынан ұлттық рух, дәстүрге деген құрмет, болашаққа деген сенім көрініс табады. Оның өлеңдері оқырманымен бірге жасай бермек, жүректерге жол тауып, саналарда жаңғыра беретіні сөзсіз.

Ақын жыр сүйер қауымды өзімен бірге ойлантады, қуантады, мұңайтады, рухтандырып, шабыттандырады. Халқының көркем тілін, кестелі сөзінің тапқыр теңеулерін санаға құяды. Егер қазақ поэзиясын сүйетін болсаңыз, бұл кітап — жүрекпен оқуға тұрарлық туынды.

  Құрметті оқырмандар!

Жыр алыбы, суырыпсалма ақын, қазақ халқының ұлы перзенті қазақтың ұлы ақыны, айтыстың өрен жүйрігі, ауыз әдебиетінің көрнекті өкілі, 20 ғасырдың Гомері атанған — Жамбыл Жабаев.

Жамбыл — поэзияның сарқылмас қайнар көзі, өшпес даналық көзі, мәңгілік құндылық. Оның туындылары әрдайым халықпен бірге жасайды. Жамбылдың шығармалары әлемнің көптеген тілдеріне аударылды, көптеген елдерге таралды.

Құрметті оқырманадр! Сіздердің назарларыңызға Жамбыл Жабаевтың 180 жылдығына орай «Күн толғауы» атты кітабын ұсынамыз.

Жабаев, Ж. Күн толғауы [Мәтін] / Жамбыл Жабаев. ; [кітапты баспаға әзірлеген «Мазмұндама» қоғамдық қоры]. — Алматы: Мазмұндама, 2022. — 116 б.

Жамбыл Жабаевтың бұл жинағында осы кезге дейін жазылған бірнеше өлеңдері, жыр-дастаны мен айтыстары топтастырылған. Тарихтың ызғарлы уақыттарының кезеңінде өз халқына үміт беріп, ерлік пен елдікке шақырған өлеңдері қазіргі кезде де жоғары бағалануда. Келер ұрпақтың болашағының жарқын болуына ықпалдасып, өзінің өнегесі мен тәрбиесін өлеңдері арқылы жеткізген. Ұлы Отан соғысы кезінде Жамбыл өлеңдері майдан даласын шарлап, жауынгерлерді ерлікке, ел қорғауға шақырды.

«Күн толғауы» – ақынның даналық ойы мен суырыпсалмалық шеберлігін айқын көрсететін жырлар топтамасы. Жамбыл поэзиясына тән қарапайым тіл, өткір ой, шынайы сезім оқырманды бірден баурап алады. Ақын күнді — өмірдің, жарықтың, үміттің символы ретінде алып, адамзат баласын ізгілікке, адалдыққа үндейді.

Жинақтағы толғауларда халықтың тұрмыс-тіршілігі, арман-мұраты, тарихи кезеңдердегі елдік мүдде көркем бейнеленген. Бұл шығармалар тек әдеби мұра ғана емес, жас ұрпақты отансүйгіштікке, ұлттық құндылықтарды құрметтеуге тәрбиелейтін рухани сабақ іспетті.

«Күн толғауы» кітабы – Жамбыл Жабаевтың мәңгі өшпес мұрасын тереңірек танып, қазақ сөз өнерінің құдіретін сезінгісі келетін әрбір оқырманға арналған құнды жинақ. Жыр алыбының өнегелі сөзі бүгінгі күнде де өзектілігін жоғалтпай, рухани бағдар беруді жалғастырып келеді.

       Құрметті оқырмандар!

Қазақ әдебиеті мен ғылымының өркендеуіне сүбелі үлес қосқан көрнекті қаламгер, дарынды драматург, зерделі зерттеуші. Ол — ұлттық рух пен тарихи сананы жаңғыртқан, сөз өнерін ғылыммен ұштастырған қалам иесі Медеу Сәрсеке.

Жазушының шығармашылығы — ел тарихына, тұлғалар тағдырына, өнер мен ғылымның даму жолына терең үңілген тағылымды ізденістерге толы. Әсіресе, оның өнеркәсіп пен өндіріс тақырыбын қозғаған «Инженерлік әулет», «Теміржол», «Көмір кеніші» секілді деректі прозалары қазақ әдебиетінде сирек жазылған, тың бағыттың көшбасшысына айналды.

Медеу Сәрсеке — ұлт мақтанышы Қаныш Сәтбаевтың алғашқы әрі ең толық ғылыми-көркем өмірбаянын жазып, ғасырлық тұлғаның бейнесін халық санасына сіңіре білген қайраткер қаламгер.

Құрметті оқырмандар! Сіздердің назарларыңызға Медеу Сәрсекенің 90 жылдығына орай «Ноқталанған тарихшы» Ермұхан Бекмахановтың шерлі ғұмыры туралы деректі роман-эссе атты кітабын ұсынамыз.

Әдебиет пен ғылымның шекарасын өшіріп, руханият пен өндіріс арасындағы көпірді қаламмен қалаған бірегей тұлға.

  Сәрсеке, М. Ноқталанған тарихшы [Мәтін] : Ермұхан Бекмахановтың шерлі ғұмыры туралы деректі роман — эссе / Медеу Сәрсеке. — Астана: Фолиант, 2023. — 608 б.

«Ноқталанған тарихшы» — бұл қазақ тарих ғылымының көрнекті тұлғасы, белгілі тарихшы Ермұхан Бекмаханов туралы жазылған деректі ғұмырнама (биографиялық тарихи еңбек). Кітапта автор Медеу Сәрсеке Бекмахановтың өмір жолын, ғылыми қызметін, қоғамдағы оқиғаларға көзқарасын, сондай-ақ оның тағдырында орын алған қудалау мен қуғын-сүргінді жан-жақты суреттейді.

Ең маңызды сюжеттердің бірі — Бекмахановтың татымды еңбектеріне тыйым салынуы, саяси қысым көргені және өмірінің ауыр кезеңдері. Автор оның ғалым ретінде ғана емес, қоғамдағы әділдік пен шындық үшін күрескен адам ретінде тұлғалық бейнесін ашады

Кітап 11 тараудан тұрады және әр тарауда ғалымның балалық шағынан бастап, ғылыми қызметіне, жеке өміріне және адамгершілік қағидаларына дейінгі қыр-сыры көрсетіледі. Осылайша оқырман Бекмахановтың тұлғасын жан-жақты танып біледі

«Ноқталанған тарихшы» — бұл Ермұхан Бекмахановтың шынайы өмірі мен ғылыми жолына арналған тарихи-деректі еңбек. Кітапта оның ғылыми батылдығы, әділет ізденісі мен ауыр тағдыры көрсетіліп, қазақ тарих ғылымының қалыптасу кезеңі мен тоталитарлық жүйенің қысымдары туралы маңызды ойлар айтылады.

Осы жинақта оқырман жазушының терең танымын, шебер тілін, тарихи дерек пен көркемдік өрнекті шебер тоғыстырған қалам қуатын анық сезінеді. Бұл — ұрпаққа ұлағат, елге аманат болар рухани қазына.

Бұл шығарма — қазақ тарихына қызығатын, тарихи тұлғалардың тағдырын түсінгісі келетін оқырман үшін аса құнды еңбек.

Қай кезде де ұлттың рухын көтеретін, елдік пен ерліктің мәнін ұқтыратын тұлғалар бар. Солардың бірі — аты аңызға айналған батыр, жазушы, ұлт ұлағатының символына айналған Бауыржан Момышұлы. Оның өмір жолы мен ойлары — тек соғыс даласындағы ерліктің ғана емес, рухани биіктіктің де көрінісі.

Бауыржан Момышұлының шығармашылығының бір саласы оның өлеңдері мен қанатты сөздері, мақал — мәтелдері. Батыр жазушының өсиет сөздері күні бүгінге дейін елдің аузында.

Құрметті оқырмандар! Желтоқсан айында Ай кітабы бетіне  Ұлы Отан соғысының хас батыры, атақты қолбасшы, екі тілде бірдей жазған қаламы жүйрік жазушы Бауыржан Момышұлының 115 жылдығына орай «Бауыржан Момышұлының нақыл сөздері» атты кітабын ұсынамыз:

 Момышұлы, Б. Бауыржан Момышұлының нақыл сөздері [Мәтін] — А.: Sana Publishing, 2025. — 120 б.

Нақыл сөз — белгілі бір ойды терең мағынамен, әсерлі және ықшам түрде жеткізетін даналық тұжырым. Ол адамгершілікке, еңбекке, ерлікке, білімге, өмірдің мәнін түсінуге үйретеді.

Бұл кітап аты аңызға айналған қазақ батыры, жазушы әрі ойшыл Бауыржан Момышұлының терең ойлы, мән-мағынаға толы қанатты сөздері мен нақылдарын жинақтайды. Ерлік пен елдіктің символына айналған Бауыржан Момышұлының өмірлік тәжірибесінен, әскери және рухани мұрасынан алынған бұл цитаталар оқырманға ой саларлық, шабыт берерлік қуат сыйлайды. Кітапта батырдың Отан, парыз, батылдық, тәртіп, білім, достық және өмір мәні туралы айтқан ақыл-кеңестері ұсынылған. Әрбір сөзінде терең даналық, ұлт рухын асқақтатар жігер мен адамгершілік ұстанымдары көрініс табады. «Бауыржан Момышұлының даналық сөздері» — жастарға үлгі, аға буынға тәрбие құралы бола алатын, рухани байлыққа толы кітап. Ол әрбір қазақтың үйінде орын алатын құнды туынды болмақ. Бұл кітапты оқи отырып, батырдың ой әлеміне үңіліп, өзіңіздің де рухани көкжиегіңізді кеңейтіңіз!

Тәуелсіздік — халықтың ғасырлар бойы арман-мұратының жүзеге асқан сәті. Бірақ сол азаттықтың қадірін түсініп, оны нығайта білу — әр буынның тарихи жауапкершілігі. Құрметті оқырмандар! Қараша айында Ай кітабы бетіне жазушы Бейбіт Қойшыбаевтың 80 жасына орай  «Тәуелсіздік һәм зиялылар»  атты кітабын ұсынамыз:

Қойшыбаев, Б. Тәуелсіздік һәм зиялылар [Мәтін] : (тарихи миниатюралар, зерттеулер, мақалалар, сұхбаттар) / Бейбіт Қойшыбаев. — Алматы: Тоғанай Т, 2024. — 368 б.

   Жазушы, публицист, тарих ғылымдарының кандидаты, қоғам қайраткері Бейбіт Орынбекұлы Қойшыбаев 20 қарашада 1945 жылы Жамбыл облысы Сарысу ауданы Саудакент ауылында дүниеге келген. 1968 жылы Қазақ ұлттық аграрлық университетін бітірген.

1968-69 жылдары Байқадам кәсіптік-техникалық училищесінің оқытушысы, 1969-71 жылдары Қазақ КСР-і Министр Кеңесінің “Қазақ ауыл шаруашылығы техникасы” бірлестігінде инженер, аға инженер, 1971-75 жылдары Алматы облысы комсомол комитетінің кәсіптік-техника білім секторының меңгерушісі болды. 1975-85 жылдары «Қазақстан пионері», «Білім және еңбек», «Социалистік Қазақстан» (қазіргі «Егемен Қазақстан») газет-журналдарында жауапты қызметтер атқарды. 1985-87 жылдары Қазақ КСР-і Жоғары Кеңесі Төралқасы аппаратында Жоғары Кеңес актілерін жариялау тобының аға редакторы болды. 1988-89 жылдары «Қазақ әдебиеті» газетінде аға тілші, бөлім меңгерушісі, 1990-91 жылдары «Денсаулық» журналының бас редакторы, 1991-96 жылдары Қазақстан Жазушылар одағы басқармасының хатшысы, сонымен бірге Қазақстан әдеби қоры басқармасының төрағасы, «Тіршілік» журналының бас редакторы, «Әдеби қор жаршысы» газетінің бас редакторы, 1997-2001 жылдары «Zaman – Қазақстан» газеті бас редакторының орынбасары болды. ҚР Экономика және сауда министрлігі автор құқығын қорғау агенттігі бас басқармасының бастығы, Алматы облысы көші-қон және демография басқармасында бөлім бастығы қызметтерін атқарды. 2001-2003 жылдары «Қазақ энциклопедиясы» баспасында бастығының орынбасары, 2003-07 жылдары «Заңгер» журналының жауапты редакторы, «Қазақ әдебиеті» газеті бас редакторының орынбасары болып істеді.

Өз еңбектерінде тарихтың «ақтаңдақ» беттерін зерттеуге ден қойды. Шығармалары орыс, беларус, болгар, қытай тілдеріне аударылған. Қазақ КСР-і Жоғары Кеңесінің Құрмет грамотасымен, «Құрмет» орденімен марапатталған.

Бейбіт Қойшыбаевтың «Тәуелсіздік һәм зиялылар» атты кітабында өткеніміздің белгілі-бір кезеңдеріндегі мәселелер жайлы уақытында қағаз және электронды бұқаралық ақпарат құралдары беттерінде жария еткен зерттеулері, тарихи миниатюралары, публицистикалық мақалалары, дөңгелек үстел материалдары, журналистердің сауалдарына берген жауаптары белгілі бір жүйемен топтастырылған. Біріне бірі ішкі үндестікпен жалғасқан материалдардың бәрі оқырманның тарихи жады мен санасын жаңғыртуына септесіп, тәуелсіз еліміздің қазіргі жағдайы мен болашағы жайында ой түюіне, зиялылықты, зиялылардың әр кезеңдегі әрекеттерін сын көзбен саралай білуіне, сөйтіп қазіргі таңда аса қажет айқын азаматтық позициясын бекемдей түсуіне жәрдемдесуді көздейді.

Кітап Отан тарихының ақиқатын білуге құмартатын, бүгінімізді дәл танып, — 2022 жыл басындағы халықтық революцияны тұншықтырған Қанды қаңтардан кейін алға тартылған Жаңа Қазақстан құру идеясын, күн тәртібіне шыққан ұлы мұраттарымызды тереңнен түсінуге және жеке басының иланымдық тұғырын мығымдай түсу арқылы жүзеге асыруға бекіген ізденімпаз азаматтарға, жастарға, қалың жұртшылыққа арналған.

Қазақ әдебиетінің алтын арқауы — ақындық өнер. Ел тарихының еңселі беттері, халықтың қуанышы мен қайғысы, асыл армандары мен үміттері — бәрі де ақын жүрегінен жыр болып төгілген. Осы қасиетті жолды жалғап келе жатқан жаңа толқын — бүгінгі жас ақындар.

Жамбыл өңірі — ежелден-ақ ақындықтың алтын бесігі саналған қасиетті мекен. Бұл топырақтан жыр алыбы Жамбыл Жабаев бастаған алыптар шоғыры түлеп ұшты. Бүгінде сол ұлы дәстүрді жалғап, туған елінің рухын жырға қосып жүрген жамбылдық жас қаламгерлер аз емес.

       Құрметті оқырмандар! Сіздердің назарларыңызға лирик ақын Данияр Әлімқұлдың  35 жасқа толуына орай «Екеумізді сағындық» атты кітабын ұсынамыз:

Әлімқұл, Д. Екеумізді сағындық [Мәтін] / Данияр Әлімқұл. — Алматы: Abai, 2023. — 144 б.

Бұл жинаққа ақынның бірқатар туындылары мен кейінгі жылдар жазылған өлеңдері еніп отыр.

«Екеумізді сағындық» деген атау екі адамның арасындағы айырмашылық, бір-біріне деген сағыныш, өткен шақтың естелігі мен ықыластың іздерін білдіреді.

Данияр Әлімқұл — махаббат сезімін маздатқан лирикалық өлеңдерімен ойлы оқырманның жүрегін баурайды. Ақынның бұл кітабы поэзия сүйетін оқырмандарды терең мұң мен тебіреністі сағынышқа жетелейтін сөзсіз.

Кітап көпшілік оқырман қауымға арналған.

       Құрметті оқырмандар!

Қазақ сатирасының кең тынысын, шымыр сөзін, шындықты шымшып айтатын шебер қалам иесі — Кәдірхан Баққараев. Ол — шындықты шырылдатып айтудан қорықпаған, қоғамның көлеңкелі тұстарын күлкімен түйреген, ұлт мінезін әзілмен айшықтаған қаламгер. Қазақ әдебиетінде сатира мен әзіл-сықақ жанрын өркендеткен көрнекті қаламгер.

Кәдірхан аға — күлкіні қару емес, құрал еткен. Ол үшін сатира — адам жанын жараламай, есігін ашып, айнасын көрсету. Оның әрбір әңгімесі — өмірдің бір үзігі, қоғамның бейнесі. Әзілінің астарында — ауыр шындық, қалжыңының түбінде — қапалы шын жүрек жатыр.

Сіздердің назарларыңызға белгілі журналист, жазушы Кәдірхан Баққараевтың 90 жас мерейтойына орай «Арбаның артық дөңгелегі» атты жинағын ұсынамыз. Бұл жинақта Кәдірхан ағамыздың ой ұшқырынан тізбеленген жазбалары көрсетілген.

    Баққараев, К. Арбаның артқы дөңгелегі [Мәтін] / Кәдірхан Баққараев. — Алматы: Таймас, 2014. — 192 б.

Кәдірхан Баққараевтың «Арбаның артық дөңгелегі» деген жаңа жинағына хикаяттар, эсселер, әңгімелер, балаларға арналған ертегілер, тәмсілдер, фельетондар, хат ізімен жа- зылған өткір сынға құрылған көркемсөздер енгізілген. Журналистика мен жазушылықтың барлық жанрларының қамтылуы кітаптың танымдық жүгін көтеріп түр. Автордың мұнан бұрынғы кітаптарынан айырмасы эпикалық жанрларға тән шығармаларды игеруі болып табылады. Автордың тілі отты, ойы ұшқыр. Оқырманын бірден баурап алады.

Кәдірхан Жұматайұлы Баққараев — 1935 жылы 1 қыркүйекте, Жамбыл облысы Талас ауданы Ақкөл ауылында дүниеге келген. Кәдірхан Баққараевтың қаламынан шыққан туындылар арасында:

— «Ұзатылған қауын»

— «Штирлицтің ішірткісі»

— «Алтын жұмыртқа»

— «Арбаның артық дөңгелегі»

— «Қазақ тілін ардақтау – ардың ісі» сияқты жинақтар бар. Бұл шығармаларында автор сатиралық тәсілмен қоғамдағы түрлі мәселелерді, адам мінез-құлқындағы кемшіліктерді әшкерелейді.Кәдірхан Баққараевтың шығармалары қазақ әдебиетінде сатира жанрының дамуына елеулі үлес қосты.

Кәдірхан ағаның шығармасы оқырмандарға күлкі арқылы ой тастайтын, тұшымды тағылым қалдыратын өмір сабағы.

Қазақ әдебиетінде сатиралық жанрдың шынайы өкілі ретінде Кәдірхан Баққараевтың мұрасы – болашақ ұрпаққа үлгі, өмір мен өнердің арасындағы шекараны тап басып көрсете алған үлкен мектеп.

Кітап көпшілік оқырман қауымға арналады.

Құрметті оқырмандар

      Абай Құнанбайұлы — қазақ халқының ұлы ақыны, ойшыл, композитор,  аудармашы әрі ағартушы.   XIX ғасырдың екінші жартысында өмір сүрген  ұлы тұлға қазақ руханиятына өлшеусіз еңбек сіңірді.

Ақын өз шығармалары арқылы халқына білім мен ғылымды меңгеруді, әділет пен адалдықты ту етуді, еңбек пен жауапкершілікті қадірлеуді үйретті. Абайдың терең философиялық ойлары, өмірлік көзқарасы мен адамзатқа ортақ танымы — бүгінгі күнге дейін өзектілігін жоғалтқан емес.

Биыл қазақ халқы данышпан перзенті Абай Құнанбайұлының 180 жылдық мерейтойын атап өтуде. Осы мерейлі дата аясында ақын мұрасын насихаттау — әрбір ұрпақ үшін рухани парыз, елдік жауапкершілік.

Абайдың терең ойлары мен ұстанымдары топтастырылған  «Нақыл сөздер» кітабын назарларыңызға ұсынамыз. Ақынның әрбір сөзі — жүрекке жетер шындық, ойға жетелер даналық.

Қазақ халқының  ұлы  ақыны, ойшыл әрі ағартушысы Абай Кұнанбайұлының нақыл сөздері — өмірдің  мәнін терең  ұғынуға жетелейді. Шығармашылығымен қоса, даналығы, тағылымды ойлары ұрпақтан-ұрпаққа  мұра болып келеді

Кітапта топтастырылған нақыл сөздер әрбір оқырманның жүрегіне  жол табары сөзсіз. Оқырман назарына ұсынылып отырған «Абайдың нақыл сөздері» атты бұл жинақ — ой тереңдігімен, өмірлік даналықпен көмкерілген аса құнды рухани еңбек. Кітапта Абайдың қара сөздерінен, өлең жолдарынан, айтқан ғибратты ойларынан үзінділер берілген.

Абай Құнанбайұлының нақыл сөздері [Мәтін] / [бас ред. С. Теңіз]. — Алматы : Sana Publishing, 2025. — 144 б.

Бұл нақыл сөздер адамгершілікке, ізгілікке, парасаттылыққа жетелейді. Әрбір сөз — өмірдің мәнін ұғынуға, өзіңе және қоғамға сын көзбен қарауға бастайтын шамшырақ тәрізді. Кітап тек жастарға ғана емес, кез келген жас ерекшелігіндегі оқырманға арналып, терең ой саларлық дүниелерді қамтиды.

«Нақыл сөздер» жинағы — ұлттық тәрбиенің негізі, Абай даналығының айнасы. Бұл кітап әрбір қазақтың рухани сөресінде тұруға лайық. Оның өнегелі ойлары — жеке тұлғаның қалыптасуына, ұлттың болашағын тәрбиелеуге қызмет етеді.

Абайды тану — өзіңді тану. Абайды оқу – жүректі тәрбиелеу, ақыл-ойды дамыту. Сізді ұлы ақынның даналыққа толы сөздерін бірге оқуға, ойға шомуға, рухани биіктікке бет бұруға шақырамыз.

Кітаппен дос болыңыз — Абаймен сырласыңыз!

Құрметті оқырмандар!

«Қыздың құндылығын құдайдың өзі көтеріп қойған» деген сөз бар. Қыз береке, қыз  қонақ, қыз өріс. Алла әркез қыз баланың дәрежесін көтеріп, құрметке лайық, жүрегін нәзік етіп жаратқан. Қыз бала үйдің гүлі, елдің көркі, ұлттың үміті. Қыз – Жаратқанның мейірімінен жаралған, жүрегіне ізгілік ұялаған, әлемге жылулық сыйлайтын ерекше жаратылыс.

Бүгінде айтыскер ақын Мұхамеджан Тазабек ағамыз әйелдерді құрметтеуді, ата-аналарды құрметтеуді, отбасына адалдықты, балаларды қолдауды, елге деген сүйіспеншілікті насихаттайды.

Сіздердің назарларыңызға белгілі айтыскер ақын, қазақстанның қоғам қайраткері, дінтанушы, публицист, Қазақстанның еңбек сіңірген қайраткері Мұхамеджан Оразбайұлы Тазабек ағамыздың 50 жас мерейтойына орай «Еркем, өмірің болсын көркем» Қызға деген қамқорлықтың қазақша үлгісі атты кітабын ұсынамыз.

   Тазабек, М. Еркем, өмірің болсын көркем [Мәтін] : [қызға деген қамқорлықтың қазақша үлгісі] / Мұхамеджан Тазабек. — Алматы : [баспасыз], 2023. – 152 б.

Белгілі айтыскер ақын, Мұхамеджан Тазабектің қазақтың аяулы аруларына арналған бұл кітабы рухани-мәдени құндылықтарға, өмірден түйген ой-толғаныстарына толы. Сонымен қатар болашақ келін, ана, әже болатын қыздарымыздың қаперінде ұстай жүрсе дейтін келелі ойлары көрсетеді.

«Еркем, өмірің болсын көркем» кітабі жеті бөлімдерден тұрады:

• Қыздың құндылығын құдайдың өзі көтеріп қойған;
• Заманауи қазақ қызының бейнесі;
• Қызға қырық үйден қамқорлық жасау;
• Қыз үйдің берекесі мен қуанышы;
• Қыздың ризығы мен байлығы;
• Қыз және қазіргі психология;
• Қыз және махаббат.

Мұхамеджан Оразбайұлы Тазабек 1975 жылы 3 шілдеде Жамбыл облысы, Байзақ ауданы, Шахан ауылында дүниеге келген. Отбасында 5 баланың үлкені.

1992 жылы сол ауылдың Мұхтар Әуезов атындағы орта мектебін бітіреді. Мұхамеджанның әкесі — филолог, публицист, ақын, анасы — ауылдық кітапханашы. Шыққан тегі Ұлы жүздің Дулат тайпасы Шымыр руынан.

Мұхамеджан Тазабектің айтыс саласында жеткен жетістіктері мектеп қабырғасынан бастау алады. Ол 14 жасынан қазақтың төл өнерінің додасынан табылып, ауданаралық ақындар айтысының талай рет бас бәйгесін иеленеді.

Жас ақынның тұлға болып қалыптасуына бірқатар адамдардың ықпалы тиеді.

Мұхамеджан Тазабек бұл шығармашылығын түгелдей нәзік сырлы қыз-келіншектерге арнады. Сіз бұл кітапты оқысаңыз, өміріңе қажет сабақ аласыз, шынайылық әжеге, анаға, қыз-келіншек, қарындастарымыздың қандай жүректері нәзік, іңкәрлікке толы болатынын түсінесіз.

Кел оқырман қызықты нәзік жандар әлеміне бірге саяхат жасайық!

Құрметті оқырмандар!

Қазақ әдебиетінің көрнекті өкілі, жазушы, драматург, журналист Елен Әлімжанның шығармашылығы — халқымыздың рухани әлемінің, ұлттық болмысының айнасы. Оның қаламынан  туған көркем туындыларда адамгершілік, ізгілік, ұлттық тәрбие мен тағылым терең көрініс тапқан.

Елен ағамыз Кеңестер Одағының үш медалімен және Мәдениет министрлігінің «Мәдениет кайраткері» төсбелгісімен марапатталған. «Құрмет» орденінің, «Ерең еңбегі үшін» медалінің иeгepi, «Жамбыл облысының Құрметті азаматы», Халықаралық Алаш сыйлығының  лауреаты.

Сіздердің назарларыңызға, Елен Әлімжанның 80 жас мерейтойына орай «Абайтаудың ар жағы мен бер жағы»  портреттер, әдеби-сын мақалалар сұхбат атты кітабын ұсынамыз.

Қаламгердің қаламынан туған әр жолы — ел мен жерге деген сүйіспеншіліктің белгісі. Сондықтан  Елен Әлімжанның шығармашылығы — туған топырақтың тынысын жеткізетін  сырлы да сазды дүние.

  Әлімжан, Е. Абайтаудың ар жағы мен бер жағы [Мәтін] : портреттер, әдеби-сын мақалалар, сұхбат / Елен Әлімжан. — Алматы: Abai, 2023. — 304 б.

Белгілі жазушы Елен Әлімжанның бұл жинағына енгізілген Әулиеата өңірінен шыққан қаламгерлер туралы шығармашылық портреттер, сондай-ак әдеби-сын макалалары, сұхбаттары топтастырылған. Бұл макалалар бұрын-соңды айтылмаған тың ойларымен құнды. Мәселен, автор Абайды қазақ ақыл-ойының асқар тауы ретінде қарастырып, оның ар жағы мен бер жағы ту­ралы ой тербейді. Бауыржан Момышұлын жазушы, батыр ғана емес, Алаш арыстарының жалғасы, қоғам қайраткері ретінде қарастырады. Шерхан Мұртазаның кенді, тыңды игеру туралы кеңестік саясат салқынымен жазылған шығармаларының табысты болуы — кейіпкерлерін ата-баба рухынан қол үздірмегендігі, дәстүрлі байланыста қарастырғандығы деп біледі. Ал, Әкім Тарази прозасын қазақ әдебиетіндегі ерекше құбылыс деп дәлелдейді.

Қаламгер бұл кітапты көпшілік қауымға және жастар мен оқушылар оқуға арналған.            

Елен Әбдуатұлы Әлімжан — көрнекті жазушы, драматург, публицист, туған топырағының тағдырын  терең сезініп, әдебиет арқылы ұрпаққа өнеге қалдырған қаламгер. Ол 1945        жылы 18 маусымда Жамбыл облысы, Талас ауданының Көмекші ауылында (қазіргі Аққұм ауылында) дүниеге келген.

«Аққұм» жеті жылдық, Бостандық ауылындағы «Алғабас» орта мектебін бітірген (1961ж.), Әл-Фараби атындағы ҚҰУ-і  филология факультетінің 1968 жылғы түлегі.

Қазақ телестудиясының комментаторы (1968-70), Жамбыл облыстық  «Еңбек туы» газетінің тілшісі, бөлім меңгерушісі (1970-1976, 1999-2004), бас редакторының орынбасары (2004-2008), Қазақстан Компартиясы Жамбыл облыстық, Комитетінің нұсқаушысы (1976-1980),  «Социалистік  Қазақстан» (қазіргі «Егемен Казақстан») газетінің Жамбыл облысы бойынша меншікті тілшісі (1980-1991), телерадио компаниясының төрағасы (1991-1996), «Түркістан» газетінде бөлім меңгерушісі «Қазақ, энциклопедиясы» баспасында жетекші маман (1997-1998), «Алтын шырақ» журналының жауапты шығарушысы (2006-2008), облыстық, ішкі саясат басқармасы жанындағы акпараттық талдау орталығының бөлім меңгерушісі (2008-2015) қызметтерін атқарған. 2004-2008 жылдары «Бауыржантану» ғылыми-зерттеу орталығында қосымша қызмет атқарды.

Тұңғыш  «Ән сыры» атты әңгімесі  Қазақстан жас жазушыларының «Таңғы шық» (1964) атты жинағында жарық көрген. «Оралу» (1978), «Көріпкел» (2000), «Ақ пepiште — арманым» (2016) әңгімелер мен хикаяттар, «Тақталас» (2006), «Толық, адам туралы» (2005), «Бауыржанның пырағы» (2010), «Адамгершіліктің  ақ жолы» (2013) атты пьесалар мен публицистикалар жинағының «Анажар» (2019), «Алтын жүлге жыры» (2022) романдарының авторы.

Елен  Әлімжанның пьесалары  М.Әуезов атындағы академиялық  драма театрында және бірсыпыра  облыстық  театрларда,  халық театрларында қойылып келеді «Тақталас», «Бip қазаққа бip қатын?!…» комедиялары орыс тіліне аударылып, Жамбыл облыстық, орыс драма театрында, «Жанұран» комедиясы қырғыз тіліне аударылып, Қырғыз телерадиокорпорациясының «Учур» театрында қойылды. «Айт күні» атты әңгімесі Анкарада жарық көрген түрік  халықтары  әдебиеті антологиясының қазақ  әдебиеті томына енген. «Баймырза» атты әңгімесі де түpiк тілінде жарияланған. Жазушының «Бауыржан Момышұлы» атты драмасы осы тұлғаның 100 жылдығына арналған республикалық  драмалық  шығармалар конкурсында бipiнші орын алса (2010), «Әйелдер бip icті бастады…» атты комедиясы Мәдениет министрлігі жариялаған «Тәуелсіздік толғауы» конкурсының комедия номинациясы бойынша екінші жүлдегері (2014) болып танылды. «Ақ періште — арманым!» атты драмасы Мәдениет министрлігінің грантына ие болған.

Шығармаларында туған елге, ұлттық рұхқа, адамгершілік пен ар-ожданға деген терең көзқарас байқалады. Қаламгерлік қарымы мен азаматтық болмысы ел жадында сақталатын тұлға. Кітап көпшілік қауымға және жастар мен оқушыларға арналған.