Адам баласынын, негізгі мақсаты — көпшілікке пайдасын тигізу, із қалдыру, жақсылық жасау болса керек. Оның бір тармағы — өз ісіне деген құрмет, Отанына деген патриоттық. Сарысу ауданы, Жаңатас қаласында тұратын жазушы Пернебай Дүйсенбин — нағыз патриот адам. Олай дейтініміз, студент кезінен-ақ республика деңгейінде қалам қуатымен танылған Пернебай Дүйсенбин жастық шағын, барлық саналы ғұмырын ауылмен байланыстырған. Алматыдағы жоғары оқу орнын бітіріп, ата-анасына қарау үшін ауылға қайтқан. Мұның өзі ата-ана алдындағы борышын сезіну, патриоттық сезім.

Пернебай Дүйсенбин ауылда мүғалім болды. Қазақ тілі мен әдебиеті пәнінен бала оқытып, бірқатар шәкірттер тәрбиеледі. Бүгінде Президент сыйлығының иегері, есімі елге белгілі журналист-публицист Қали Сәрсенбай, «Шалқар» радиосының директоры Болатбек Төлепберген де Пернебай Дүйсенбиннің шәкірттері.

Сол өзі ұстаздык еткен мектептен Сәуле Жанпейісова, Ардақ Исатаева, Саян Ақмолда секілді талантты өнерпаздарды тәрбиелеп шығарды. Жазушының өзінің туған еліне деген патриоттығы, өз ауылымнан таланттар көп шыға берсе екен деген перзентгік тілегі.

Тараз қаласы әкімдігі мәдениет және тілдерді дамыту бөлімінің Абай атындағы орталықтандырылған көпшілік кітапханалар жүйесінің мәжіліс залында жазушы Халықаралық «Алаш» әдеби сыйлығының лауреаты Пернебай Дүйсенбинмен «Кеудесі қазына, қаламы жүйрік түлға» атты кездесу кеші өтті. Аталған кездесу қаламгердің 80 жылдық мерейтойына арналды. Осы кездесуге қаламгердің қыздары Гүлмира мен Балнұрдың, ұлы Ерланның келгенін көрдік. Бұл да көп әкеге бұйырмайтын бақыт. Мұны да патриот ұл-қыздар тәрбиелеп өсірген жазушыңың өзінің еңбегінің жемісі деп қабылдадық. Кеш иесінің қарындастары Тұрсынай мен Ләззат та жазушы ағаларына деген үлкен құрметпен келіпті.

Жиында Пернебай Дүйсенбин кітапхана қызметкерлері мен жас оқушы оқырмандар алдында өмір жолын, ұстаздық қызметтегі ерекше сәттерді айтып өтті. Кездесу барысында жазушылар Елен Әлімжан, Көсемәлі Сәттібайұлы, ақын Баймаханбет Ахмет сөз алып, кеш иесінің талантына, суреткерлік шеберлігіне тоқталды. Пернебай Дүйсенбин 25 жасында жазған «Таңғы шық» деген повесін жоғалтып алып, 53 жылдан кейін қолжазбасын тапқан екен. Бұл әңгіме де көпшілікке жақсы әсер етті. Облысқа танымал әнші Мерей Әбуованың «Сайра, бұлбұл», ардагер Аманқұл Сқақовтың «Ойлан, балам» әндері көптің көңілінен шықты.

Кеш соңында Тараз қаласы әкімінің орыноасары Дәуір Дәулетов қала әкімінің атынан құттықтап, жазушының иығына шапан жауып, құрмет көрсетті. Пернебай Дүйсенбин барлық қонақтарға алғысын білдіріп, аталған кітапханалар жүйесінің директоры Ұлбосын Сәулебаеваға өзінің көптомдық кітаптарын сыйға тартты.

Есет Досалы

Aq jol. — 2023. — 14 қыркүйек

«Гүл өссе — жердің көркі, қыз өссе — елдің көркі» дейді дана халқымыз. Бұл сөздің астарының мәні тереңде. Бабаларымыз қызды гүлге теңеп, әдеміліктің, әсемдіктің символы санаған.

Жуырда «Анаға тағзым» орталығында орталықтандырылған көпшілік кітапхананың №5 филиал кітапханасының қызметкері Балқия Бекмолдаеваның ұйымдастыруымен «Қыз бала — өмір көркі» атты кеш өтті. Жиынға кітапхана қызметкерлері, ардагерлер үйінен келген әжелер, түрлі ауданнан келген ақ жаулықты аналар, Қордай ауданындағы Мұстафа Шоқай атындағы мектептің оқушысы Алтынхан Саурықов пен Байзақ ауданының оқушысы Ақерке Манас қатысты. Іс-шараның ұйымдастырылу мақсаты ретінде әлемнің сұлулығын көзбен көруге, жанмен түсіне білуге, көңілге тоқу мен зерделі болуға үйрету көзделді. Қазақ қызының бойынан дәстүрімізге сай әдептілік, инабаттылық секілді асыл қасиеттердің табылу маңыздылығы айтылды.

Іс-шараның ашылу салтанатында аталған кітапхана меңгерушісі Жанар Қалжанова сөз сөйлеп, қатысушыларға сәттілік тіледі. Кейінгі кезекте халқымыздың ізгі салтын сақтаған ақ жаулықты аналардың ыстық лебізін жеткізу үшін Байзақ ауданының тұрғыны Бақтыгүл Әбдібайқызына сөз берілді.

— Қыз бала қай халықта болмасын әдемілік пен әдептіліктің, сұлулық пен іңкәрліктің символы саналған. Халқымыз қызды қонақ деп, төрінен орын беріп, алтынның сынығына балап өсірген. Жалпы бала тәрбиесіне, соның ішінде қыз бала тәрбиесіне өте көп көңіл бөлген, — дей келе, Б.Әбдібайқызы қыздарға ізгі ниетін білдіріп, арнау өлеңін оқыды.

Іс-шара барысында оқушылар да ана мен ұстаз тақырыбын қозғап, арнаулы өлеңдер жинағын көрермендерге паш етті. Келесі кезекте қонақтарға қыз баланың тәрбиесіне қатысты сұрақтар қойылып, қатысушылар өз кезегінде ойларымен бөлісті.

Жиын соңында қатысушылар әннен шашу шашты. Ал кітапханашы Мая Әзімқұлова қонақтарды «Қыз — ұлттың ұяты, халықтың шырайы» атты кітап көрмесімен таныстырды.

Гүлжан ТӨЛЕГЕНОВА,

Түймекент ауылы, Байзақ ауданы

AR-AI. – 2023. – 19 шілде (№53).

Жаз — әсіресе балалардың асыға күтетін мерейлі маусымы. Күнделікті сабақтар артта қалып, осы уақытты балғындар барынша қызықты әрі көңілді өткізуді армандайды. Жаз маусымы басталысымен оқушы қауымның арманына арқау болатын жазғы сауықтыру лагерьлері де есіктерін айқара ашады.

Жаз мезгілі ондағы өзгерістер мен ерекшеліктер жайлы мағлұмат беру мақсатында Ғ.Мұратбаев атындағы кітапхана қызметкерлері №35 орта мектеп жанынан ашылған лагерьге барып, «Жазда атамның ауылына» библиофреш, «Ханталапай: асық ату» спорттық ойындары, «Ойлана ойнайық» ойын-саяхаты, «Ойнай білсең, ойлай білесің» әдеби викторинасы, «Шынықсаң, шымыр боларсың» көрме диалогы, «Құстар әлемінің атаулары» ұсыныс көрме сияқты балаларды қызықтыратын іс-шараларды өткізді. Бұл тұрғыда кітапханашылар балаларға жаз қызықтары туралы айтып берді.

Балаларды кітап оқуға шақыру, білімді, жан-жақты болуға үйрету, жарыста жеңімпаз болуға ұмтылуын дамыту, білімді, дарынды, озық болуға ынталандыру үшін түрлі қызықты іс-шаралар ұйымдастырылды. Олардың ойлау қабілеті мен сөздік қорын дамыту үшін «Білімді мыңды жығар», «Әртүрлі сұрақтар», «Жұмбақтар», «Мақал- мәтелдерді жалғастыр», «Ертегілер», «Ой сергіту», «Менің денсаулығым, менің болашағым» атты ойындар ойнатылды.

Әр кезеңде ойын шартына сәйкес логикалық сұрақтар қойылып, сурет салудан жарыс өтті. Тартысты жарыста оқушылар өз біліктіліктері мен белсенділіктерін көрсете білді. Сонымен қатар түрлі қызықты кітаптардан құралған «Кітап — ғажайып жаршысы» атты кітап көрмесі балалар назарына ұсынылып, әдеби мұраларға шолу жасалды. Көрмеде ұсынылған әрбір кітаппен балалар жеке-жеке танысып, өз ризашылықтарын білдірді.

Кез келген елдің болашағы халқының денсаулығына байланысты екендігі дәлелдеуді қажет етпейтіні шындық. Бүгінгі дені сау ұрпақ — елдің ертеңгі жалғасы. Әрбір өткен іс-шарада балаларды жалықтырып алмайтындай спорттық ойындарды

қосып, қимыл қозғалысына да мән берілді. Мұнда балалардың денесін шыңдауға, шымыр да шапшаң, ұқыпты да жинақы, талғампаз да қанағатшыл, таза да сымбатты болуға тәрбиелейтін ойындар да ұйымдастырылды. Балаларға қазақтың ұлттық ойындары туралы мол ақпарат берілді.

Ал сұрақ-жауап кезеңінде оқушылардың жаздан да ыстық құшағы бар ата мен әженің үйіне асығатындығы белгілі болды.

Iс-шаралардың қызықты өтуіне балалар бөлімінің меңгерушісі Анар Искакова, кітапханашылар Ұлжан Бейсенова, Бағира Бұлтанқұлова, Гүлжан Бошаевалар барынша атсалысты. Шара соңында белсенділік танытқан барлық оқушыға балмұздақ таратылды.

Аr-Аі. – 2023. – 30 маусым

Тараз қаласы әкімдігінің мәдениет және тілдерді дамыту бөлімінің Орталықтандырылған көпшілік кітапханалар жүйесі қала тұрғындарының бос уақытын тиімді өткізуіне атсалысу, көпшілікті кітапқұмарлыққа баулу, қоғаммен байланысты нығайту, кітап оқуды дәріптеу мақсатында «Кітап — асыл қазына» атты кітапхана түнін өткізді.

Кешке жиналған тұрғындарға «Кітап әлемді бағындырады» атты көрме мен түрлі кітап инсталляциялары ұйымдастырылып, әдебиеттерге шолулар жасалынды. Сондай-ақ кітапхана оқырмандары Мысырда мәмлүктер мемлекетінің негізін қалаған Дешті Қыпшақ даласының атақты перзенті Сұлтан Бейбарыстың, ұлы кемеңгер ақын А.Құнанбайұлының, қазақ әдебиетінің классигі, ақын Мағжан Жұмабаевтың бейнесін сомдап, Рахымжан Отарбаевтың «Сұлтан Бейбарыс» атты пьесалық драмасынан үзінді, Абай Құнанбаевтың «Әуелде бір суық мұз ақыл зерек», Мағжан Жұмабаевтың «Мен жастарға сенемін» өлеңдерін жатқа оқыды.

Ал «Әдеби қонақжай» алаңында зиялы қауым өкілдері ақын, журналист, Қазақстан Республикасы Журналистер одағы сыйлығының лауреаты, Қазақстан Жазушылар одағының мүшесі Ғайни Әлімбекқызы, филология ғылымдарының докторы, профессор, М.Х.Дулати атындағы Тараз мемлекеттік университеті «Дулатитану» ғылыми-зерттеу орталығының директоры Сәмен Құлбарақ, Тараз қалалық ардагерлер үйінен аға буын өкілдері қатысқан, еліміздің руханиятын дамытуға сүбелі үлес қосып келе жатқан жазушы, драматург, публицист, Халықаралық «Алаш» әдеби сыйлығының иегері Елен Әлімжанмен сұхбат өткізіліп, оқырмандар қойылған сауалдарына тұшымды жауап алды. Кітапхана қызметкерлері өз кезегінде жазушының «Тақталас» атты кітабының «Қызыр баба немесе Ұлыс күн хикаясы» атты екі бөлімді аңызға құрылған хикаясынан үзінді көрсетті.

Кітапхананың түнгі қонақтарына арналып түрлі іс-шаралар да ұйымдастырылды. Сондай-ақ осы күні әлем әдебиеті мен халық ертегілері, баспа беттеріне жарияланған жаңалықтар бойынша сұрақтар, жұмбақтар, мақал-мәтелдер, жаңылтпаштар жарысы, ән айту, би билеу, өлеңдер оқитын «Әдеби-библио бар», «Ойын академиясы», шарлардан түрлі мүсіндер жасайтын «Шар-шоу», ұлттық нақышта жабдықталған, ертегілер оқылатын «Әжемнің ертегісі», ойды дамытатын түрлі ойындар ойналатын «Теңіз қарақшылары» және әндер сайысы өтетін «Караоке» алаңдары көпшілікке айрықша әсер сыйлады. Әр алаңда ерекше форматта өткізілген, оқырманға рухани білім мен демалыс сыйлаған тағылымды шаралар оқырмандарын қызықтырып, көтеріңкі көңіл-күйге бөледі. Осылайша тағылымды шара келушілердің тарихи танымын да кеңейтті.

Ұлбосын Саулебаева,

Тараз қалалық орталықтандырылған көпшілік кітапханалар жүйесінің

директоры

Jambyl-Taraz. — 2023. — 7 маусым

Оқушыларды кітап оқуға баулу мақсатында Тараз қаласы әкімдігінің мәдениет және тілдерді дамыту бөліміне қарасты орталықтандырылған көпшілік кітапханалар жүйесі тарапынан жыл басынан түрлі іс-шаралар ұйымдастырылып келеді. Оның ішінде балалар әдебиетін насихаттау арқылы баланы кітап оқуға дағдыландырып, өмірлік құндылықтарды бойына сіңіруге айрықша мән берілген.

Баланы кітап оқуға көбірек баулу үшін балаларға кітапты сүюге көмектесу керек. Міне, осы мақсатта кітапханалар жас ұрпақтың шығармашылық қабілетін дамытуға бағытталған «Кітап оқы, талқыла, суретте», «Дауыстап оқу – руханиятқа талпынысты ояту» атты жобалар аясында және кітапханалар жанынан ұйымдастырылған қызығушылық клубтары бойынша мәдени іс-шаралар өткізіліп келеді.

1 маусым – Халықаралық балаларды қорғау күні. Бұл күн олардың денсаулығын сақтау, болашақ ұрпаққа білім мен тәрбие беру жөніндегі барша әлемдегі озық пікірлердің тоғысқан арнасы десек, артық айтқандық емес.

Балалық шақтың басты мерекесіне орай балғындарға мерекелік көңіл-күй сыйлау, балалар әдебиетін насихаттау мақсатында қалалық М.Шолохов атындағы кітапханасында «Біз бақытты баламыз» атты бейнешолу, Ғ.Мұратбаев атындағы кітапханасында «Бақытты бала – бақытты ел» ойын саяхаты, №5 кітапханасында «Балалар –
біздің болашағымыз» кітап көрмесі, №6 кітапханасында «Бақытты балалар – бейбіт елдің тірегі» атты мерекелік кештер ұйымдастырылды. Айталық, М.Әуезов атындағы кітапханасында балалар үшін танымдық және қызықты өткізілген ашық есік күніне қатысушылар назарына қазақ, орыс, шетел балалар жазушыларының шығармалары, халық ауыз әдебиетінің озық үлгілері, балалар энциклопедиясы және бүлдіршіндерге арналған ертегі кітаптар топтастырылған «Кітап – білім бұлағы» тақырыбында кітап көрмесі мен түрлі кітап инсталляциялары ұсынылды. Балалардың ойлау қабілеттерін дамытатын «Сурет жұмбақ шешу», «Санамақ», «Жұмбақтарды шешу», «Сұрақ-жауап» сайысы, кітап жайлы викториналық әдеби ойындар ойнатылып, кітаптар мен журналдардан қызықты әңгімелер дауыстап оқылды. Балалар ойындарға белсене қатысып, өздерінің жылдамдық пен тапқырлықтарын танытып, қабілеттерін көрсетті. Сонымен қатар балалар бөлімінің кітап қорымен, дүниетанымын кеңейтетін, ақыл-ойын дамытып, шығармашылық қабілетін шыңдайтын кітаптармен танысып, ән айтып, би биледі.

Кітапханаларымызда осындай рухани құндылықтарымызды насихаттайтын, балалардың кітапқа деген қызығушылығын оятатын көпшілік іс-шаралар алдағы жазғы демалыс кезінде де жалғасын таба бермек.

Бақыт ТОҚСАНБАЕВА,

Тараз қаласы әкімдігі мәдениет және тілдерді дамыту бөлімінің басшысы

Jambyl-Taraz. — 2023. — 31 мамыр

Еңбек ардагері, Сарысу ауданының Құрметті азаматы, елімізге танымал қаламгер, ақын, журналист Дулат Шалқарбаевтың биыл дүниеге келгеніне 100 жыл толып отыр. Тараз қалалық орталықтандырылған көпшілік кітапханалар жүйесіне қарасты Ғани Мұратбаев атындағы кітапхана қызметкерлері аталған мерейтойға орай айтулы іс-шара ұйымдастырды. Тарқата айтсақ, №30 мектеп-гимназия оқушыларының қатысуымен «Оқитын ұлт» республикалық жобасы шеңберінде «Бір өңір — бір кітап» облыстық акциясы аясында «Өрелі сөз өрген» атты әдеби кеш өткізді.

Дулат Шалқарбаев 1923 жылы Сарысу ауданының Байқадам ауылында туған. Байқадам орта мектебінің 9-сыныбын бітірген соң әртүрлі жұмыс атқарған. Ширек ғасыр бойы аудандық, облыстық газеттерде, кәсіптік білім беру және мәдениет салаларында табысты қызмет атқара жүріп, көркем шығармашылықпен де үзбей шұғылданды. Ол жиырма шақты поэзиялық және прозалық кітаптың, бірнеше пьесаның, балаларға арналған көптеген туындының авторы. Бірнеше өлеңі мен әңгімелері ұжымдық жинақтарда жарияланған. «Дарабоз» әдеби жабық бәйгесінің бірнеше мәрте жүлдегері.

Іс-шара облыс тұрғындары, әсіресе жастар арасында жергілікті әдебиет туындыларын оқу және насихаттау, өлке тарихын, табиғатын, әдебиетін және мәдени мұрасын өркендетуді көздейді. Жасөспірімдердің зияткерлік-рухани дамуына ықпал жасау мақсат етілген іс-шара кітапханашы Гүлжан Бошаеваның ақын өміріне шолу жасауьімен басталды. №30 мектеп-гимназияның 8-сынып оқушылары Мерей Дәулеткерей мен Алина Русланқызы ақын өлеңдерін жатқа оқыды. Ақын шығармашылығы бейнеслайд арқылы көрсетіліп, мектеп кітапханашысы Ақмарал Абласанова

Жазушының «Дүрбелең» атты тарихи романына тоқталып, қысқаша мазмұндама берді. Сондай-ақ ақын өмірі мен шығармашылығына арналған «Қарымды қаламгер» тақырыбында кітап көрмесі ұсынылып, онда Д.Шалқарбаевтың «Өмір өзі сөйлейді», «Бабалар тағылымы» атты өлеңдер, толғаулар, шешендік сөздер жинағына кітапханашы Бағира Бұлтанқұлова библиографиялық шолу жасады. Ақын шығармашылығымен танысқан жас ұрпақ рухани азықпен сусындап, ақын өлеңдеріне қызығушылық танытып отырды.

Көрме диалоггың берері мол

Сонымен қатар аталған кітапхана қызметкерлері қала тұрғындарының демалыс уақытын тиімді пайдалану, оқырмандардың назарын кітап оқуға аудару, руханиятқа бай орта қалыптастыру, оқырмандарды жаңа кітаптармен және жаңа авторлармен таныстыру мақсатында «Әлемді кітаппен таны» тақырыбында көрме диалог өткізді. Іс-шара барысында кітапхана қызметкерлері келген оқырмандарға керемет көңіл күй мен рухани азық сыйлау үшін қызықты қойылымдар қойып, ертегілер әлеміне саяхат ұйымдастырып, түрлі викториналық және интеллектуалды ойын ойнатты. Ойынға атсалысып, белсенділік танытқан балаларға сыйлықтар үлестірілді. Іс-шараға қатысушы, кітапхананың жас оқырмандары Нұрсезім Болатбек, Нұршайық Пансатбек, Айзере Пансатбек өлең-жырларын жатқа оқыды.

Бұдан бөлек «Кітап — сарқылмас қазына» тақырыбында кітап көрмесі ұсынылды. Онда балаларға арналған түрлі танымдық және көркем әдебиеттер мен әр халықтың ертегілері топтастырылды. Көрмеге қойылған кітаптарға кітапханашылар арнайы шолу жасап, оқырмандарды кітап оқуға шақырды.

Жаңагүл Ахумбекова,

Ғ.Мұратбаев атындағы кітапхана меңгерушісі,

Тараз қаласы

Arai. – 2023. – 12 мамыр

Абай атындағы орталық кітапханада Алаш қозғалысының қайраткері, ақын, қазақ әдебиетінің жарқын жұлдызы Мағжан Жұмабаевтың 130 жылдығына арналған «Мағжан — поэзия падишасы» атты кездесу кеші өтті.

Іс-шараға Солтүстік Қазақстан облысы Мағжан Жұмабаев атындағы Жоғары колледж дирекгоры Жандильдин Ерлік Борисұлы, мағжантанушы, тарих пәнінің оқытушысы, Мағжан Жұмабаевтың немере інісі Тасболат Бекеновтің қызы Бекенова Гүлмира Тасболатқызы, Мағжан Жұмабаевтың немере інісі Тасболат Бекеновтің әйелі, Мағжан Жұмабаевтың келіні Бекенова Сара Ғабдулғазизқызы қатысып, Мағжан Жұмабаевтың азаматтық үні, ұлтгық рух пен патриоттық тәлім-тәрбиенің қайнар көзіндей өлең деген құдірет арқылы ұлт руханиятына қосқан үлесі туралы кітапхана оқырмандарымен ой бөлісті.

Сонымен бірге кітапхана оқырмандары Аяна Ким, Айзере Бақытжанқызы, Күнтөре Нұрай, Аликеева Таңшолпан, Еркінбекқызы Кәусар, Жиенғали Исламали, Байдаулетова Меруерт, Сапарбай Жанна Мағжан Жұмабаевтың қазақ халқының ұлттық тұрмыс-тіршілігіндегі жақсы қасиеттерін жырлаған, сырға толы «Хакім Абай», «Әжесі мен немересі», «Түркістан», «Қазақ тілі», «От», «Р…ға», атты өлеңдерін оқып, кеш көркін қыздыра түссе, Халықаралық Тараз инновациялық институтының 1-курс студенті Өсер Едіге ақынға арнаған өлеңін оқыды.

Кітапхана ұжымы ұйымдастырған «Ұлт рухының кемеңгері» атты кітап көрмесіндегі Мағжан Жұмабаевтың «Мен жастарға сенемін» атты жыр жинағын кітапхана қызметкері Гауһар Бименова таныстырып, Мағжан Жұмабаевтың жай ғана акын емес, ұлт болашағы үшін күрескен қайраткер, өмірден өз орнын үнемі іздеумен өткен, бар білген-түйгенін соған сарп еткен суреткер ретінде халкының есінде екенін атап өтті.

Абай атындағы орталық кітапханасы

Jambyl-Taraz. – 2023. – 28 сәуір

Қалалық орталықтандырылған көпшілік кітапханалар жүйесінің №6 кітапханасының коворкинг орталығында «Жастар кітап әлемінде» жобасы аясында «Оқуға құштар жастар — тәуелсіздік тірегі» тақырыбында оқырман конференциясы өтті.

Жастар — біздің еліміздің жарқын болашағының кепілі. Іс-шара оқырмандардың назарын кітап оқуға баулу, руханиятқа бай орта қалыптастыру, оқырмандарды жаңа кітаптармен және жаңа авторлармен таныстыру мақсатында ұйымдастырылды.

— Кітапхананың жас оқырмандармен жұмыс істеудегі ең маңызды қызметі — көрме қызметі, оның мақсаты мен міндеттері кітапхана қорларының байлығын ашу. Осыған орай кітапхана қызметкерлерінің ұйымдастыруымен «Кітап — сарқылмас қазына» атты кітап көрмесі ұсынылды.

Көрмеге өз бетінше оқуға арналған көркем әдебиеттің шытырман оқиғалар, тарихи, фантастикалық әдебиет жанрында мемлекеттік және орыс тілдерінде кітап жаңалықтары топтастырылған, — дейді кітапхана меңгерушісі А.Бекпатшаева.

Конференцияда Тараз қалалық жастар ресурстық орталығының директоры Абзал Есіркепов, Шерхан Мұртаза атындағы Халықаралық Тараз инновациялық институтының білімгері Азамат Намелбек, облыстық «Ғұмыр-Дария» газетінің тілшісі Нұрболат Аманбек, «Еркін ойлар алаңы» дебат клубының өкілі Фархат Қаумен қонақ болды. Сондай-ақ М.Х.Дулати атындағы Тараз өңірлік университетінің журналистика мамандығының және Тараз инновациялық көпсалалы колледжінің студенттері де қатысты. Жиын барысында кітапхана меңгерушісі Айгерім Бекпатшаева да тақырыпқа қатысты ойын білдіріп, жұмыс тәжірибесімен бөлісті.

Arai. – 2023. – 26 сәуір

Ақын, жазушы, ардагер журналист Баймаханбет Ахмет пен мәдениет саласының ардагері Малика Айданқызының қаламынан туған «Бақытты балалық шақ» атты кітабы отбасындағы бала тәрбиесіне арналған.

Кітап авторларының бірі Б.Ахмет «Балаларға бақытты балалық шақ пен болашақ сыйлау — ата-аналар мен мемлекеттің ең басты міндеті. Қолдарыңызға тиген мына кітапта, міне, осы тұрғыда отбасылық һәм әулеттік тәрбиенің де балаға берері мол екені біршама таратыла айтылады. Бұл — ата-аналар кітабы, демек, сіздің кітабыңыз!» дейді.

Тараз қаласындағы Абай атындағы кітапханада ұйымдастырылған «Кітап — ғажап әлем» кітап фестивалі барысында жаңа кітаптың тұсауы кесілді. Кітапхана ауласында «Кітап әлемді бағындырады» атты үлкен көрме жабдықталған. Осында кітап көрмелеріне шолу жасалып, кітапхана оқырмандарына таныстырылды. Кітапхана оқырмандары, кішкене балдырғандардың биі көпшіліктің сүйіспеншілігін оятты.

Кешке Тараз қаласы әкімінің орынбасары Дәуір Дәулетов қатысып, Баймаханбет Ахметтің шығармашылығына табыс тілеп, ақынның иығына шапан жапты. Кітапхана қызметкерлері ақынның жаңа танымдық туындысы бойынша шолу жасап, «Өжет» хикаятынан сахналық қойылым қойды. Әннен шашу шашылды. Жаңа кітаптың тұсауын М.Х.Дулати атындағы Тараз өңірлік университетінің профессоры Сәмен Құлбарақ пен сатирик ақын Бақытжан Советұлы кесті. Соңынан ақынға өздерінің ізгі тілектерін арнады. Сәмен Құлбарақ ақынның өлеңдеріне тоқталса, Бақытжан Советұлы жазушылық қырын оқырманға таныстырды. Ал, балалар жазушысы Марат Құлибаев ақынның журналистік қырын аша түсті. Сондай-ақ, Б.Ахметке деген ізгі тілектерін Тараз қаласы әкімдігі және тілдерді дамыту бөлімінің басшысы Бақыт Тоқсанбаева мен Тараз қалалық ардагерлер кеңесінің хатшысы Сауранбек Жамалбеков жеткізді.

Кеш соңында кітапхана оқырмандары ақынға сұрақ қойып, өзара пікір алмасты.

Диас Маратұлы, журналист, Тараз қаласы

Aq jol. — 2023. — 25 сәуір

Қазақ халқы — салт-дәстүрге өте бай. Бұл — оның мәдениетті әрі тәрбиелі ел екендігінің айғағы. Біздің халқымыз өз ұрпақтарына ғасырдан-ғасырға ұлт қасиетін салт-дәстүрмен, өнегені әдет-ғұрыппен, үлгіні жөн-жосықпен, әдепті ырым, тыйыммен тәрбиелеп, ұлағатты ұл, инабатты қыз өсірген. Осылайша ұлттық тәлім адамгершіліктің көрсеткіші екенін көрсеткен.

Оқырмандарға ата-бабаларымыздың салт-дәстүрі туралы түсінік беру, қазақтың әдет-ғұрпын бойларына сіңіру, халқына, ұлтына, туған жерге деген сүйіспеншіліктерін арттыру мақсатында №6 кітапхана қызметкерлерінің ұйымдастыруымен «Анаға тағзым» орталығында «Салт-дәстүрім — таусылмайтын байлығым» атты танымдық сағат өткізілді.

Шара барысында Тараз қаласы әкімдігі дене шынықтыру және спорт бөлімінің бұқаралық спорттық іс-шаралар өткізу орталығының спорт бойынша әдіскерлері Асқар Құрбан мен Қуат Құрманқұлов ұлттық ойындардың түрлеріне, тәрбиелік мәні мен маңыздылығына тоқталса, Тараз инновациялық колледжінің кітапхана меңгерушісі Анар Асанова танымдық сағаттың жастарға берер тәрбиесі мол екенін баса жеткізді. Келесі кезекте №32 орта мектептің мұғалімі Әсел Супабекова сөз алып, жылы лебізін білдірді.

Бұдан кейін Тараз Инновациялық колледжінің білімгерлері қыз бен жігіт арасындағы «Салт айтысты» көпшілік назарына ұсынса, №32 орта мектептін 9 сынып оқушылары Ақан серінің «Балқадиша» әнінен сахналық қойылым көрсетілді. Сондай-ақ, аталмыш мектептің оқушылары халык әні «Еркем-айды» қазақтын ұлттық аспабы домбыраның сүйемелдеуімен орындап кешті әрлендіре түссе, Әдемі Бексұлтанова Мырзаның «Мереке» күйін нақышына келтіріп орындады. Сондай-ақ кітапхана қызметкері Айгүл Станбекқызы «Салт дәстүрім — таусылмайтын қазынам» атты кітап көрмесіне библиографиялық шолу жасады.

Шара сонында №6 кітапхана меңгерушісі Айгерім Бекпатшаева оқырмандарды кітаппен дос болуға шақырып, жиналған қауымға алғысын жеткізді.

Жанар Егеубаева,

№6 кітапхананың қызметкері

Jambyl-Taraz. — 2023. — 14 сәуір