Кітап – адамзаттың ең жақын досы және ақылшысы, даналық пен білімнің қайнар көзі. Осыған орай, «Көне Тараз» тарихи-этномәдени кешеніндегі «Көркемсурет» ғимаратында «Art&Science»: Білімге деген құштарлық» Jambyl Book Fest» атты кітап фестивалі өтті.

Өскелең ұрпақтың рухани-адамгершілік білімін жоғарылату, кітап пен оқуға деген қызығушылықты ояту, кітап пен ғылымды дәріптеу мақсатында облыс әкімдігінің мәдениет, архивтер және құжаттама басқармасының қолдауымен Ш.Уәлиханов атындағы Жамбыл облыстық әмбебап ғылыми кітапханасы мен Тараз қаласы әкімдігінің мәдениет және тілдерді дамыту бөлімі, қалалық орталықтандырылған көпшілік кітапханалар жүйесі бірлесіп өткізген шара аясында «Кітап жәрмеңкесі», «Оқуға құштар оқырман» – оқу марафоны, «Ауылға кітап» – кітап сыйла акциясы, «Кітапхана және ритейл» тәжірибе алмасу, «Балаларға базарлық», «Сиқырлы әріптер сыры» – Брайль кітаптарының көрмесі, «Білім мен ғылымның көкжиегі» ашық алаңы, «Жаңа кітапқа жарқын жол» – жаңа кітаптардың тұсаукесері ұйымдастырылды.

Сонымен қатар Татарстан Республикасы Қазан қаласынан келген педагогика ғылымдарының кандидаты, Роберт Мансуров, академик Расых Салахов және Астана қаласы Қазақстан Республикасының Ұлттық академиялық кітапханасынан, ҚР Жазушылар одағынан өкілдер, елімізге танымал ақын-жазушылар Жүсіпбек Қорғасбек, Бейбіт Сарыбай қатарлы қаламгерлер қатысып, өз ойларын ортаға салды. Сондай-ақ кітап құмарлардың мерекесінде еліміздегі 20-ға жуық баспаның төл өнімдері ұсынылды.

Жұмаш ЖОЛБОЛДЫ

Jambyl-Taraz. — 2024. – 26 сәуір (№33). — 2 б.

Кітапсыз білім жоқ,
Білімсіз күнің жоқ.

***

Кітап — білім бұлағы,
Білім — өмір шырағы.

***

Оқысаңыз, балалар,
Шамнан шырақ жағылар!

***

«Кітап маған тақтан да қымбат».

***

«Адамзат оқуды тоқтатқан кезде ойлауды да доғарады»

Осы секілді мақал-мәтелдер мен түрлі қанатты сөздерді кітапты қастерлеп, білім биігінен көрінген және оқу мен тоқудың пайдасы мен оңды нәтижесіне көздері жеткен даңқты тұлғаларымыз айтып кеткен. Жалпы адамзат хат танығалы бері кітап оқу үрдісі үзілген емес. Мұндай ізгі дәстүрдің алдағы ғасырларда да жалғасын таба беретініне сенгіміз келеді.

Өкінішке қарай, бірақ қазіргі заманда кітап оқитындардың қарқыны бәсеңдеп, кітапханаға баратындардың қатары сиреп бара жатқаны жасырын емес. Оны мамандар мен оқырмандар және кітапханашылар қазір үлкеннің де, кішінің компьютер мен ұялы телефонға тәуелділігімен қоса. өзге де себептермен түсіндіреді.

Дегенмен: «Пайда ойлама, ар ойла, талап қыл артық білуте,

Артық білім кітапта, ерінбей оқып көруге», — деп өзі де кітап арқылы білім нәрімен сусындаған ақыл-ойдың алыбы Абай айтқандай, артық білуге талап қылып оқимын және кітапханағада барамын деген адамға қашан да уақыт табылады.

Оқырмандарды кітапханаға көбірек тарту және балалардың кітапқа деген қызығушылығын оятып, ынтасын арттыра түсу мақсатында жуырда Тараз қалалық орталықтандырылған көпшілік кітапханалар жүйесіне қарасты Ғани Мұратбаев атындағы кітапхана ұжымы «Анаға тағзым» отбасын қолдау орталығында «Баланы кітапқа қалай қызықтырамыз?» тақырыбында іс-шара өткізді.

Тараз қаласындағы «Болашақ» мектеп-интернатының дефектолог маманы, кітапсүйер жандардың бірі Айжан Калиакперова мен А.Гайдар атындағы №35 орта мектептің кітапхана меңгерушісі Мира Бекбосынова оқушыларға кітаптың берері мол, мәртебесі биік екенін айта келе, өздері оқыған кітаптармен тереңірек таныстырып, көпшілікті кітап оқуға шақырды.

Одан кейін кітаптың баспада қалай дайындалып, баспаханадан қалай шығатыны жөнінде слайд көрсетілді.

Өз кезегінде №3 мектеп-лицейден келген «Шаттық» би тобы түрлі билерімен іс-шараны ажарландыра түсті.

Ой мен бойды сергіткен әдемі биден кейін «Кітап — ғажайып жаршысы» тақырыбында үш бөлімнен тұратын кітап көрмесі ұйымдастырылды. Көрмедегі кітаптармен кітапхана қызметкерлері Ұлжан Бейсенова мен Бағира Бұлтанқұлова жан-жақты таныстырып, оқуға кеңес берді.

Көңілге түрлі ой салар тағылымды кеш соңында оқушылар өздерінің алған әсерлерімен бөлісіп, ұйымдастырушылар мен қонақтарға алғыстары мен ризашылықтарын білдірді.

Іс-шара соңында көпшілік «Анаға тағзым» отбасын қолдау орталығының тыныс-тіршілігімен танысып, экскурсия жасады.

Осы орайда кітапханалардың тұрақты оқырманы ретінде шамадан тыс қолдансақ денсаулығымызға зиянын, уақытымыздың босқа өтуіне ғана ықпалын тигізетін компьютер мен телефонға телміргенше ой-өрісімізді кеңейтіп, ақылымызды нұрландыра түсетін үнсіз тәрбиешіміз — кітаптарды архивтер мен сөрелерде шаң бастырмай оқып тұрайық дегім келеді.

Бақытжан ӘЛІҚҮЛОВ, ақын, журналист

Арай. – 2024. – 10 сәуір (№27)

Қазақ мәдениеті тарихында ақын, жазушы, аудармашы, философ Шәкәрім Құдайбердіұлының орны ерекше. Өйткені ол — Абайдың нағыз мұрагерлерінің бірі және бірегейі. Шәкәрім — қазақ әдебиетінде ғана емес, дүниежүзілік әдебиетте де өзінің орны бар, шоқтығы биік тұлға. Ойшыл ғұламаның шығармашылық мұрасы — халқымыздың ғасырлар бойы маңызын жоймайтын рухани қазынасы.

Кемеңгер ақынның өшпес мол мұрасын, туындыларын жастарға насихаттау, сүйіспеншілігін оятып, жігерлендіріп, биік мақсаттар қоюға ықпал ету мақсатында Тараз қалалық орталықтандырылған көпшілік кітапханалар жүйесі де өз үлесін қосуда.

Осы орайда өткен жылы Қазақстан Республикасының Ұлттық академиялық кітапханасы мен «Adal as» өндірістік компаниясының ұйымдастыруымен Шәкәрім Құдайбердіұлының 165 жылдығына орай Астана қаласында өткен «Шәкәрім оқулары» республикалық байқауына Тараз қалалық орталықтандырылған көпшілік кітапханалар жүйесінің оқырманы Қайрат Айханым қатысып, бас жүлдені иеленіп қайтты. Сондай-ақ Шәкәрім шығармашылығын балалар мен жасөспірімдер арасында насихаттау мақсатындағы биыл Астана қаласында ұйымдастырылған II республикалық «Шәкәрім оқулары» байқауына қалалық кітапхананың тағы бір оқырманы Әдия Әлімахмет қатысып, жүлделі I орынға қол жеткізді.

Жеңімпаз оқырмандарымызды жетістіктерімен құттықтай отырып, әлі де талай асулардан асып, биік белестерді бағындыруына тілекшіміз.

Ғалия Тұрлыбаева,

Тараз қалалық орталықтандырылған көпшілік кітапханалар жүйесінің бөлім меңгерушісі

Jambyl-Taraz. — 2024 . — 5 сәуір (№27). — 2 б.

Абай атындағы орталық кітап ханасында «Воокdating» жобасы аясында «Даналықтың бәрі — кітапта» клуб мүшелерінің қатысуымен халқымыздың біртуар тұлғасы Абай Құнанбайұлына арналған «Абай мұрасы — халықтың қазынасы» атты кітап бенефисі (белгілі бір тұлғаның шығармаларын насихаттау) өткізілді.

Жобаның мақсаты — білімді қоғам топтарын шоғырландыру, отандық жазушыларды қолдау, оқырмандарға міндетті түрде оқу үшін кітаптың өзін ұсынған нұсқасын жасау.

Аталған клубтың отырысында даналықтың таусылмас қазынасы, қазақ тарихының өткені мен бүгінін ұштастырып келе жатқан Абай мұрасына арналды.

Басқосуды жүргізген кітапхананың бөлім меңгерушісі Ж.Дөнесова алғашқы сөзді филология ғылымдарының докторы, профессор, М.Х.Дулати атындағы Тараз өңірлік университеті «Дулатитану» ғылыми-зерттеу орталығының директоры Сәмен Құлбараққа берді. Ғалым Абайды өз заманындағы қайраткер, гуманист тұлға ретінде суреттегенін, соңында мәңгі өшпес ұлағатты өсиеті, өнегесін қалдырған ұлы Абайдың шығармаларына терең мән беріп, оның ойлағаны мен орындалмай қалған армандары туралы жан-жақты баяндап берді.

Сөз кезегін алған Жамбыл облыстық қазақ драма театрының актері, Республиканың еңбек сіңірген артисі Асқарбек Сейілхан 2020 жылы коронавирус пандемиясына байла- нысты жарияланған карантин уақытысында ұлы Абайдың 175 жылдығына орай түсірілген телевизиялық хабарда Абай Құнанбайұлы бейнесін сомдай отырып, ақынның 45 қара сөзін арнайы телехабар арқылы жатқа айтып шыққандыған атап өтті.

Сондай-ақ басқосуға қатысқан бірқатар оқытушылар мен Тараз қалалық ардагерлер кеңесінің мүшелері А.Мақашев, Д.Әлиев даналықтың таусылмас қазынасы, қазақ тарихының өткені мен бүгінін ұштастырып келе жатқан ғұлама Абай мұрасын бүгінгі ұрпаққа насихаттап, жастарды ақын шығармаларын оқуға шақырды.

№43 орта мектебінің оқушысы, қалалық Абай оқуларының 2- орын иегері Аруна Дулат Абай атасына арнаған «Ұлы Абай рухына арнау» өлеңін оқыса, №39 мектеп-гимна- зиясының оқушысы Шайра Разакова мен Әлмұхамед Сейітхан ақынның «Бала секілді», «Аларман» атты өлеңдерін жатқа оқып берді.

Кітапхана ұжымы кемеңгер, қарасөздің қас шебері, поэзияның патшасы Абай Құнанбайұлы шығармашылына арналған «Адамзаттың шамшырағы — Абай» атты кітап көрмесін ұйымдастырып, оқырман назарына ұсынды.

Алдаберді Меңлібайұлы,

Тараз қалалық ардагерлер кеңесінің мүшесі.

Ардагер айнасы. — 2024. — 3 сәуір

2 сәуір — Халықаралық балалар кітабы күніне орай Тараз қалалық орталықтандырылған көпшілік кітапханалар жүйесінде жыл сайынғы дәстүр бойынша «Кітап апталығы» өтті.

Апталық аясында М.Әуезов және Ғ.Мұратбаев атындағы кітапханаларда балалардың кітап оқу мәдениетін дамыту және белсенді кітап оқуға тарту, кітап оқу мәдениетін дәріптеу мақсатында дәстүрге сай кітап көрмелері ұйымдастырылып, «Кітап арқылы ашылған сырлы әлем» атты кітаптар шеруі, «Қызықты кітаптар әлемі шақырады» ашық есік күні, «Ертегілер еліне саяхат» әдеби ойын, «Журналдардың сендерге айтары бар» атты балалар журналдарына шолулар ұйымдастырылды. Сондай-ақ ертегі кейіпкерлерінің қатысуымен қойылған ойын түріндегі көріністер көрсетіліп, балғындарға халық ауыз әдебиеті, қызықты сиқырлы әңгімелер, балалар әдебиетінің алтын қорынан алынған шытырман оқиғалы әдебиеттер таныстырылды.

Назым Мухамбетиярова,

Тараз қалалық орталықтандырылған көпшілік кітапханалар жүйесі директорының орынбасары

Jambyl-Taraz. — 2024. – 30 наурыз

Кітапхана өмірі — сырт көзге біліне, байқала бермейтін ағысы баяу, тулаған толқындар ішінде жататын өмір. Сол өмірге бойлап, дендеп енген адам ғана бұл шаңырақтың қыры мен сырын аңғара алмақ.

Осындай шаңырақтың бірі Тараз қалалық орталықтандырылған көпшілік кітапханалар жүйесі. Жүйеде 8 кітапхана оқырмандарға қызмет көрсетеді. Оқырмандар үшін кітапханаларда барлық жағдай жасалған. Яғни компьютерлермен жабдықталып, ғаламтор желісіне қосылған. Қазіргі кезде қоғамымыздың дамуына қарай ақпаратты жан-жақты алу аудио, видео, интернет жүйесі арқылы мүмкіндік туғанымен, кітапханадан кітаптарды оқи отырып алатын білім мен салауаттылықтың орны ерекше деп түсінетін оқырмандар кітапханаға келіп өздеріне қажетті кітаптарды алып оқып, баспасөз кұралдары газет, журналдардан керекті ақпарат ала алады. Кітапханалар әрдайым оқырмандармен жұмыс істеудің жаңа тиімді тәсілдерін іздейді, арнаулы мерекелерде, мерейтой иелеріне арналып кітап көрмелері ұйымдастырылып, насихатталып, жоспарға сәйкес мәдени-көпшілік іс-шаралар өткізіледі. Кітапты насихаттау, кітап пен оқуға деген қызығушылықты қолдау, қоғамның интеллектуалды әлеуеті мен мәдени кұндылықтарын арттыру, кітап оқуға тарту, өскелең ұрпақтың рухани-адамгершілік білімін арттыру мақсатындағы «Кітап фестивалі», «Түнгі кітапхана», «Жүз кітап оқып, ой бөлісемін» оқырман бенефисі, «Көркем әдебиет — ұлтымыздың құнды жауһарлары» атты окырмандар байқауы түріндегі оқырмандардың бос уақыттарын тиімді өткізуге, оқу мәдениетін қалыптастыруға бағытталған түрлі жобалар аясында ұлттық әдебиетіміздегі ең үздік деген туындыны оқу және насихаттау, рухани мұрамызды сақтау әрі өнегелікке тәрбиелеу мақсатындағы «Бір ел — бір кітап» республикалық акция аясында өткізілген іс-шаралар көпшіліктің кітапханаға деген қызығушылығын арттыруда.

Кітап — білім мен рухани байлық бұлағы. Білім бұлағы — кітапты оқырмандарға насихаттауда кітапхананың рөлі өте зор. Рухани азық іздеген, көзі ашық, көкірегі ояу әрбір адамның келер шаңырағы — кітапхана. Кітапхана — сапалы білімнің сенімді кепілі.

Ұлбосын Саулебаева,

Тараз қаласы орталықтандырылған көпшілік кітапханалар жүйесінің директоры

Jambyl-Taraz. — 2024. — 21 наурыз

Тараз қаласы, Абай атындағы орталық кітапханасында 15 ақпан — Кеңес әскерінің Ауғанстан жерінен шығарылғанына 35 жыл толуына орай «Отқа оранған он жыл» атты кездесу кеші өткізілді.

Іс-шара тағдырдың жазуымен елге оралмай қалған Ауған соғысында көз жұмған қаһарман жерлестерімізбен бақилық болған бауырларымызды 1 минут үнсіздікпен еске алумен басталды.

Кеш қонақтары Ауған соғысының ардагерлері Қалабаев Дүйсенәлі Ибрагимұлы және Амирбеков Марат Бегасылұлы өмірлерінің өлшеулі бір бөлшегін, жауқазын жастық шақтарының үлесін оқ пен от арасында өткізген күндері туралы кітапхана оқырмандарымен ой бөлісіп, ҚР ҰҚК Шекара қызметінің сарбаздарына турлі араңдатушылыққа бой алдырмай, Отан алдындағы қызметін адал атқаруға шақырды.

Кітапхана оқырмандары тарапынан қойылған «Кеңесәскері Ауғанстан жерінен шығарылатынын естігенде қандай сезімде болдыңыздар?», «Бүгінгі таңда майдандас достарыңызбен хабарласып тұрасыздар ма?», «Кейінгі ұрпаққа айтар тілектеріңіз» деген сұрақтарға жауап беріп, бейбіт өмірдегі жарқын істері, қоғамдық жұмыстарға белсенділіктері туралы ойларымен бөлісті.

№39 мектеп-гимназиясының 7 «а» сынып оқушылары — Еркінбекқызы Кәусар, Сыпатай Дана, Жарылқасын Арайлым Ауған соғысының ардагері Бақытбек Смағұлдың «Ауғанда болған ардагер», «Армысыңдар, ауғандық ардагерлер» атты өлең жолдарын оқыса, Жұмаділда Ерасыл сазгер Жарасқан Төлебайдың «Мен қазақпын» әнін, «Шабыт» домбырашылар ансамблі Әбдімомын Желдібаевтың «Ерке сылқым» күйін орындап берді.

Ауған соғысы жауынгерлерінің ерліктері туралы баяндайтын кітапхана ұжымы ұйымдастырған «Ауған соғысының ақиқаты» атты кітап көрмесіндегі Ауған соғысының ардагері Аманкелді Жантасовтың «Жартасты жастанған жасақ» атты кітабына кітапхана қызметкері Сәуле Ешжанова библиографиялық шолу жасады.

Дөңесова Гүлжазира,

қызмет көрсету бөлімінің меңгерушісі, Абай атындағы орталық кітапхана, Тараз қаласы

Алғашқы әскери және технологиялық дайындық. — 2024. — №1. — 2 б.

Алғыс айту күні — сан түрлі сынақтардан өткен халқымыздық ынтымақ-бірлігін айғақтайтын ерекше күн. Осы мерекеге орай Тараз қалалық орталықтандырылған көпшілік кітапханалар жүйесінде елімізде тұрып жатқан әртүрлі ұлттар мен ұлыстардың арасындағы достық пен ынтымақтастықты дәріптеу мақсатында мәдени-көпшілік шаралар өтті.

Айталық, Абай атындағы орталық кітапханасында «Қазақ халқына мың алғыс» атты кездесу кеші ұйымдастырылды. Сондай-ақ Тараз қаласы әкімдігі жұмыспен қамту және әлеуметтік бағдарламалар бөлімінің мүгедектер мен қарттарға үйде әлеуметтік көмек көрсету бөлімшесінің қызмет алушылары Ольга Цой, Инна Герасименко, ҚР Ұлттық Ұланы 5513 әскери бөлімінің 1-бөлімше сарбаз атқышы Дәулет Қасеновпен, М.Әуезов атындағы кітапханасы Жамбыл облысы өзбек қоғамдық бірлестігінің өкілі Абдрахман Зайнутдиновпен «Ризашылық — мейірімділік бұлағы» атты сұхбат, №5 кітапхана Жамбыл облысы әкімдігінің ішкі саясат басқармасының «Қоғамдық келісім» мекемесінің мамандары Валентина Досыбаева, Жазира Шілдебаева, «Тараз-Болашақ» медициналық орталығының медбикесі Күлшат Дәрібаева «Алғыс айту — парызым» атты «дөңгелек үстел» отырысын, №6 кітапхана зейнеткер Пак Еленамен және №32 орта мектебі мұғалімі Алина Штокаловамен «Алғыс айту — асыл қасиет» атгы кездесу кештерін өткізді.

Кеш қонақтары оқырмандармен елімізде түрлі этнос өкілдері аралас-құралас, тату өмір сүріп жатқаны, елдегі тыныштық пен ынтымақтың, қазақстандықтардың бір-біріне деген достығы мен ыстық ықыласын білдіретін күн екені, мерекенің мән-мағынасы туралы әңгіме өрбітті. Сонымен қатар тақырыпқа байланысты кітап көрмелері ұйымдастырылып, библиографиялық шолу жасалды.

Гүлдана ҮСЕНБАЕВА,

Тараз қалалық орталықтандырылған көпшілік кітапханалар жүйесінің әдіскері

Jambyl-Taraz. — 2024. — 8 наурыз (№19). — 6 б.

Тараз қалалық орталықтандырылған көпшілік кітапханалар жүйесінің №6 кітапханасында «Сырғалым» клубы мүшелерімен қыз балалардың жан дүниесіндегі көркемдік талғамын қалыптастыру, қазақ халқының қыз тәрбиелеу салт-дәстүріне байланысты әдептілікке, инабаттылыққа, ізеттілікке тәрбиелеу мақсатында «Қыздар сұлу көрінер қылығымен» атты кездесу кеші өтті.

Шараға қаламыздағы «Ақ келін» өнімдерін өндіруші Мөлдір Абдрахманова, «Брилиант» салонының шаш әрлеушісі Әсел Асылбаева, Жамбыл облыстық жастар ресурстық орталығының уақытша бос жүрген жастар және жас отбасылармен жұмыс бөлімінің басшысы Марал Хантөреқызы және психолог маманы Нұрай Үсенқызы, этнодизайнер, тігінші Жансая Асқанбекқызы қатысып, қыздардың бойынан ақылдылық, білімділік, инабаттылық, сымбаттылық, көріктілік және іскерлік қасиеттер табылуы керектігі туралы ақыл-кеңестерімен бөлісті. Сонымен бірге кеш қонақтары өз кәсіптері туралы, жеткен жетістіктері жайлы да айтып, шеберлік сағатын өткізді.

Клуб мүшелері өздері оқыған жазушылардың кітаптарындағы сұлулықтың, даналықтың, кемел ақылдың үлгісі болған әйел-аналар бейнесі туралы ой-пікірлерін ортаға салды.

Сондай-ақ тіршіліктің толып жатқан қыр-сырларын ұлы тұлғалар өнегесі арқылы танып-білуге, түсінуге ықпал ететін әдебиеттер қойылған «Қазақ әдебиетіндегі қыз болмысы» атты кітап көрмесі ұйымдастырылып, Әсел Қайратқызының «Қыз өссе – елдің көркі» атты кітабына библиографиялық шолу жасалды.

Айгерім Бекпатшаева,

Тараз қалалық ОККЖ №6 кітапхананың меңгерушісі

Jambyl-Taraz. — 2024. — 1 наурыз (№18). — 2 б.

Аңырақай шайқасы — қазақ жерінің тұтастығын сақтап қалуға негіз болған қазақ-жоңғар соғысындағы ең ірі және шешуші шайқастардың бірі.

Саяси және әскери бірлікке қол жеткізген үш жүз жасақтары 1728 жылы Балқаш пен Шу бойына қарай жылжып, ұрысқа әзірлене бастады. Қазақтардың әрекетін сезген, қазақ жерін тұтас жаулау ниетіндегі жоңғарлар да Шу мен Балқаштың оңтүстігінде үлкен шеп құрды. Ғасыр шайқасы 1729 жылы болды. Шайқастың басында Бөлек батыр Қараұлы жоңғар әскерлерінің қолбасы Аңырақаймен жекпе-жекке шығып, оны өлтірді. Осылайша қазақ қолдарының рухы көтерілді. Шайқаста қалмақтар жеңіліп, Аягөз, Шарға қарай жөңкіле қашты.

Біріккен қазақ қолының жоңғар басқыншылығына қарсы жүз жылдық азаттық соғысында бетбұрыс жасаған ең ірі жеңісі — Аңырақай шайқасына 295 жыл толып отыр. Осыған орай Тараз қаласындағы Ғ.Мұратбаев атындағы кітапхана қызметкерлері №35 орта мектептің 8-сынып оқушыларының қатысуымен «Аңырақай шайқасы — ұлы бірліктің жеңісі» атты көрме дерек ұйымдастырып, өткізді. Іс-шараны кітапхана меңгерушісі Жаңагүл Ахумбекова кіріспе сөзбен ашты. Одан соң, кітапханашы Бағира Бұлтанқұлова Аңырақай шайқасы және оның тарихи маңызы туралы кеңінен тарқатып айтып берді. Ал аталмыш мектептің тарих пәнінің мұғалімі Назгүл Молдабаева бейнеслайд арқылы шайқастың болған орны жайында тарихи деректер келтіре отырып, баяндама жасады. Кітапханашы Гүлжан Бошаева «Әбілқайыр хан. Аңыз бен ақиқат» кітабына библиографиялық шолу жасап, жиналғандарды көптеген тың деректермен сусындатты.

Оқушылар тақырыпқа қатысты ойларын ортаға салып, тарихи білімдерін шыңдай түсті. Тақырып бойынша ұйымдастырылған кітап көрмесімен танысты.

Аңырақай шайқасы — тарихи маңызы мен ауқымдылығы жағынан орыс халқының Бородино шайқасынан еш кем түспейді. Осыны өскелең ұрпақ санасына сіңіріп өсуі керек. Түсінген адамға қазақтардың бұл соғыстағы жеңісі — кейінгі ұрпақты рухтандыратын тарихи оқиға. Сондықтан, біз бұл тағдыршешті шайқастағы батырларымыздың ерлігін ешқашан ұмытпауымыз керек.

Бақытжан Әліқұлов,

Тараз қаласы.

Әулиеата. — 2024. — 23 ақпан (№15). — 4 б.