Құрметті жасөспірім балақайлар!

        Сіздердің назарларыңызға қазіргі замандағы танымал балалар мен жасөспірімдер жазушысы Клэр Бертолеттің қызықты әрі тәрбиелік мәні зор  «Ханшайымның 10 оқиғасы» атты кітабын ұсынамыз.

       Бертолет, К. Ханшайымның 10 оқиғасы [Мәтін] / Бертолет К. ; [сурет. Адора ; қаз. тіліне ауд. Б. Салыхова]. — Алматы: Алматыкітап, 2024. — 68 б.

      Бұл кітап балалардың алдынан таңғажайып қиял әлемін ашады. Әр елде әртүрлі дәуірде өмір сүрген ханшайымдар туралы қиял-ғажайып ертегілер берілген.

       Шытырман оқиғаға құрылған ертегі бірден баурап алып, мәңгі есіңізде қалады. Ханшайымның ең әдемі тәжін киіп аспанмен таласқан ғимаратта тұратын Келли ханшайымға қонаққа барасыз. Патшайым Аделаида ханшайымның мінез-құлқы мен сыр сымбатын бағалай ма деп алаңдайсыз.

       «Ханшайымның 10 оқиғасын» оқи отырып Әлемдегі ханшайымдардың қиял-ғажайып әлеміне саяхаттайсыз.

       Бұл кітапты оқыған сайын қиялыңыз кеңіп, жүрегіңіз жылынып, өзіңізді шынайы ханшайымдай сезінесіз. Бұл кітап — рухани байлық пен өмірлік сабақтың қайнар көзі. Кітапты ашқан әрбір бала өзіне жақын ханшайымды табады: бірі – жүрегі жұмсақ, екіншісі – ақыл-парасатты, енді бірі – батырлығы мен табандылығымен ерекшеленеді. Олардың бастан кешкен он түрлі оқиғасы әр оқырманға қуаныш сыйлап қана қоймай, жүрегіне сенім ұялатып, арманға қанат бітіретіні сөзсіз.

       Кітапханамызға келіп, «Ханшайымның 10 оқиғасы» кітабымен бірге керемет саяхатқа аттаныңыз!

       Ертегі әлемі сізді күтуде!

Құрметті жасөспірім оқырмандар!

       Сендер ертегіні өте жақсы көресіңдер, бұл ешбір күмән тудырмайтын ақиқат шындық! Өйткені сендер кішкентай кездеріңнен ата-әжелеріңнен естіген ертегілерге бауыр басып, солардан алған үлгі-өнегелеріңе еліктеп, өсіп келесіңдер.

      Осылайша ертегі кейіпкерлерінен үйренген: сүйіспеншілік, татулық, мейірімділік, ұстамдылық, адалдық сияқты адамзат үшін айрықша бағалы саналатын асыл қасиеттерді бойларыңа толассыз сіңірудесіңдер.

       Бүгінде әлем балаларының сүйікті жазушыларына айналған Шарль Перро мен Ағайынды Гриммдердің «Ертегілер» жинағын назарларыңызға ұсынамыз.

       Перро, Ш. Ертегілер [Мәтін] / Перро Ш., Гриммдер А. ; [сурет. А. Құлбаева ; құраст. Ә. Файзуллаұлы ; дизайні Н. Айымбет]. — Алматы: Балауса, 2025. — 240 б.

Бұл жинаққа әлемге кеңінен танымал Шарлъ Перро мен Ағайынды Гриммдердің ең көркем ертегілері енгізілген.

       Олар ғасырлар бойы балалардың қиялын баурап, жақсылық пен жамандықты, адалдық пен сатқындықты, еңбекқорлық пен жалқаулықты айқын бейнелер арқылы көрсетіп келеді. Әр ертегіде ғибратты ой, адамгершілікке тәрбиелерлік тағылым бар.

       Жинақ жас оқырманды қиял-ғажайып әлемге жетелеп, мейірім мен әділетке, адалдық пен батылдыққа баулиды.

       Бұл ертегілер бүгінде әлем балаларының ең сүйіп оқитын туындыларына айналған. Қаламгердің осынау шығармаларының өміршеңдігін паш етіп, бүгінде әлемнің түкпір-түкпірінде осылардың желісімен жазылған талай-талай опера мен балеттер қойылып келеді.

       Бүгінде бұл жинақ ең үздік туынды ретінде әлем балалар әдебиетінің алтын қорына қосылған.

       Бұл кітаптан орын алған «Қасқыр мен жеті лақ», «Жіп иіруші үш әйел», «Бақа патшазада», «Бұрқасын патшайым», «Құстұмсық король», «Ақылды Эльза» деп аталатын біраз ертегілері балақайларға ұсынылып отыр.

       Бір ғажабы, халық арасынан жинақталған ежелгі көне ертегілерді күні бүгінге дейін балалар да, үлкендер де барынша зейін қоя қызығып оқиды.

       Ендеше, балалар, ертегілер әлеміне қош келдіңдер!

       Кітапханамызға келіп, осы ғажайып ертегілер жинағын оқып, рухани байыңыздар!

       Ертегі — тәрбие мен қиялдың қазынасы

Құрметті жас оқырмандар!

Сіздерді «Ол кім? Бұл не?» атты қызықты және танымды балалар энциклопедиясымен танысуға шақырамыз!

        Энциклопедия баланың дүнетанымын жетілдіріп, жеке тұлға ретінде жан-жақты дамуына игі ықпал ететін, адам өмірі мен тыныс-тіршілігінің сан алуан салаларымен таныстырады, оқырманның күнделікті өмірде өзін қызықтырып, сырын білгісі келген сұрақтарының шешімін табуына көмектеседі.

       Энциклопедия жас оқырмандардың орта білімін арттыруға, зеректілігін шыңдауға, дүниетанымын байытуға бағытталған әлемдік және отандық ең маңызды ұғымдар, терминдер және тұлғалар еніп отыр.

       Ол кім. Бұл не? [Мәтін] : балалар энциклопедиясы. 3 т. 1 т. / [құраст. И. Хасенұлы] . – [ өңд., толықт. 2-ші бас.]. — Алматы: Дәуір, 2025. — 648 б.

       Бұл энциклопедия әр түрлі тақырыптарды қамтиды. Мұнда ғарыш, табиғат құбылыстары, жануарлар әлемі, тарихи оқиғалар, ұлы қайраткерлер, әйгілі шайқастар, шет мемлекеттер жайлы алуан түрлі қызықты ақпараттар табуға болады.

       Сұрақтарға нақты әрі түсінікті жауап береді. Қиял мен логикалық ойлауды дамытады.  

       Кітапта көп суреттер мен иллюстрациялар бар, бұл оқуды жеңіл әрі қызықты етеді.       

      «Ол кім? Бұл не?» энциклопедиясы — баланың жан-жақты дамуына ықпал ететін, білімге деген құштарлығын оятатын тамаша кітап. Бұл — кішкентай зерттеушілер үшін үлкен әлемге жол ашатын алғашқы қадам.

       Кітапханамызға келіп, «Ол кім? Бұл не?» энциклопедиясымен танысып, жаңа білімге қадам басыңыз!

Құрметті жас оқырман!

       Сіздердің назарларыңызға Бельгиялық жазушы, ақын Элен Дельфорж жазған және де оның отандасы, суретші Квентин Гребан иллюстрацияларын салған «Мама» кітабын ұсынамыз.

     Дельфорж, Э. Мама [Мәтін] / Элен Дельфорж, Квентин Гребан. ; [француз тілінен ауд. З.Батаева, С.Батаева]. — Алматы: Steppe&World Publishing, 2020. — 64 б.                     

                                               Әлі алда ең алғашқы қадамың,

                                              Ең алғашқы қылқалам мен кітабың.

                                              Суға жүзген ең алғашқы құлашың,

                                                 Ең алғашқы әлди-әні анаңның,

                                             Ең алғашқы балауыз шам, мерейің.

                                            Ең алғашқы таспадағы бейне-фильм.

   Ең алғашқы «Мама» деген асыл сөз,

   Ең алғашқы жақсы көрген сезімің.

Әлі алда ең алғашқы әзілің,

Ең алғашқы қасық толған балшырын,

Ең алғашқы түймедағың бақтағы.

Міне, солай.

Ояндың ба, құлыным?

Болашаққа жоспарымыз осындай!

      Бұл жыр жинағы тек тамаша шумақтарымен ғана емес, бельгиялық автор Квентин Гребанның 32 акварель суретімен де тәнті етеді. «Мама» жыр жинағы 2018 жылы жарық көріп, әлемнің 25 тіліне аударылған.

           Мама — адам баласының ең алғашқы сөзі. Мама — барлық аналарға ортақ есім. Мама — махаббат, мейірім, байланыс, кейде сағыныш. Әлемде қанша бала болса, сонша ана бар. Сонда да, барлық құрлықтардағы аналар сәбиін құшағына алғанда, олар бір-біріне ұқсайды екен.

    Бұл кітапта әр дәуірдегі, әр континенттегі ана тағдырының қуанышы мен қайғысы өлең түрінде суреттелген. Автор ана махаббатының қаншалықты терең екендігін көрсетеді. Қазір «Мама» өлеңмен жазылған заманауи кітаптар арасында ең танымал шығармалар қатарына кіреді.

     «Ана» әлемнің бар жақсылығы мен махаббатын сыйғызуға болатын жалғыз сөз. «Ана» дегенде толқымайтын жүрек, толғанбайтын жан жоқ. Осы үш қана әріптен тұратын «Ана» сөзінің астарында теңіз сияқты терең ой жатыр.

     Кітапты қолыңызға алып, ананың махаббатына толы әлемге бірге саяхаттайық! Ана жүрегі — мейірімнің мекені. Бұл кітап соның дәлелі. «Мама» — жүрекке жол табар ерекше шығарма. Сіздерді жүрекке жылы, ерекше сезімге толы Элен Дельфорждың «Мама» кітабын оқуға шақырамыз.

                                                           Кітап — сенің жан досың!

Құрметті жас оқырмандар!

      Сіздердің назарларыңызға! Ағылшын жазушысы Фрэнсис Ходжсон Бёрнеттің жүрекке жылы «Кішкентай лорд Фаунтлерой» атта жасөспірімдерге арналған тәрбиелік мәні зор қызықты романын ұсынамыз.

     Роман тұңғыш рет 1886 жылы жарияланған болатын. Ағылшын-америкалық жазушының түптің түбінде мейірімділіктің үстемдік құратынына риясыз сенімі, өзіне тән ерекше шығармашылығы мен жазу стилінің арқасында, бір қарағанда қарапайым көрінетін шығарма жүз қырық жылға жуық уақыт бойы оқырманның жүрегінен орын алып келеді.

   Бернетт, Ф.Х. Кішкентай лорд Фаунтлерой [Мәтін] : роман / Фрэнсис Ходжсон Бернетт. ; ауд. Ж.Кенжеғұл ; сурет. Ян Райзер. — Астана: Фолиант, 2025. — 160 б.

 Бұл жинақта жазушының ең танымал аудармасы ұсынылған. Фрэнсис Бернётт шығармасының көпшілік ықыласына бөленуінің басты себебі — тақырыбының қарапайымдылығы мен әмбебаптығы екенін атап өткен жөн.

     Шығармада кішкентай лорд анасының тәрбиесінен аз уақытқа ажырап қалса да, еш мойымай, тәрбиелі де қамқор ата-ананың шексіз махаббатына бөленіп өскен, жас та болса өзгенің көңіл күйіне айрықша сезімтал қарайтын, өзінің бауырмалдылығымен, мейірімге толы пәк жүрегі мен өзгенің ниетін өзінікіндей көретін періште пейілімен қатал аристократ атасын сара жолға бағыттайды.

                                                                  Бірінші бөлім. Күтпеген жаңалық

                                                Екінші бөлім. Седриктің достары

                                           Үшінші бөлім. Қоштасу

                                              Төртінші бөлім. Англияда

                                                        Бесінші бөлім. Сарайда

                                                          Алтыншы бөлім. Граф пен немересі

                                                            Жетінші бөлім. Шіркеуде

Сегізінші бөлім. Фаунтлерой атқа мінуді үйренді

Тоғызыншы бөлім. Жұпыны лашықтар

Оныншы бөлім. Граф неге ашуланды?

Он бірінші бөлім. Америкадағылар алаңдаулы

Он екінші бөлім. Үміткерлер

Он үшінші бөлім. Дик көмекке дайын

Он төртінші бөлім. Әшкерелеу

  Он бесінші бөлім. Седрик сегіз жасқа толды

     Бұл туынды балаларға адамгершілік, шынайылық, қарапайымдылық пен мейірімді болудың маңызын үйретеді. Кішкентай Седриктің іс-әрекеті арқылы оқырман жақсылық жасаудың құдіретін сезінеді.

«Кішкентай лорд Фаунтлерой» — баланың жүрегімен үлкен жүректерді жұмсартуға болатынын дәлелдейтін тамаша кітап. Жас оқырмандарға рухани тәрбие беретін, ой саларлы, оқуға тұрарлық шығарма.

     Кітапханамызға келіп, осы тамаша туындымен танысып, рухани байыңыздар!

     Кітап — сіздің ақылшы досыңыз!

Құрметті жас ізденушілер!

      Динозаврлар — жер бетінде мезозой дәуірінің басым бөлігінде үстемдік етіп, сондай-ақ, жойылып кеткен омыртқалы жануарлардың Dіnоsauгіа атты жоғары тобына жататын өкілдері. Бұл дәуір үш кезеңді қамтиды:

     Триас (шамамен 252-201 млн жыл бұрын),  Юра (201-145 млн жыл бұрын) және Бор кезеңі (145-66 млн жыл бұрын). Алғашқы динозаврлар триас кезеңінде пайда болып, тез арада барлық құрлықтарға таралып, түрлі экологиялық орталарда тіршілік ете бастаған.

Динозаврлардың басты ерекшелігі — олардың аяқтары денені тік ұстап тұру қалпы. Бұл ерекшелік оларды басқа жорғалаушылардан ерекшелендіріп тұрады.

Жас оқырмандар, сіздерге Гүльжан Назымбетованың (ғылыми-танымдық кітап) «Қазақстан динозаврлары» атты кітабын ұсынамыз.

  Назымбетова, Г. Қазақстан динозаврлары [Мәтін] — Dinosaurs of Kazakhstan — Динозавры Казахстана : (ғылыми-танымдық кітап) / Гульжан Назымбетова. — Алматы: Дәуір, 2025. — 80 б.

«Қазақстан динозаврлары» атты ғылыми-танымдық кітаптан, оқырман көне дәуір кезеңінде динозаврлардың Қазақстанның қай аймағында тіршілік еткенін, олардың өмір сүру салты мен жойылып кету себептерін біле алады.

Жинақта динозаврлардың сыртқы бейнесі, мінез-құлқы мен өмір сүру ортасын көрнекі түрде сипаттайтын 65 түрлі-түсті иллюстрация берілген. Бұл көрнекі материалдар, динозаврларды жақсырақ түсініп, ежелгі жануарлардың түрлерін есте сақтауға көмектеседі.

 Кітап оқушыларға, студенттерге, мұғалімдерге және оқытушылар мен ғалымдарға, сондай-ақ, дүниежүзінің көне тарихына қызығушылық танытатын оқырмандарға арналған

Құрметті жас оқырмандар!

     Балалар, сендер ақша туралы білгілерің келе ме? Ақшаны қалай жинауға болады, қалай дұрыс жұмсау керек, тіпті бір күні миллионер болуға болатынын ойлап көрдіңдер ме?

     Міне, осы сұрақтардың бәріне қызықты да түсінікті жауап беретін кітап — «Сенің алғашқы миллионың»!

     Бұл кітапта үш тамаша автор — Джеймс Маккена, Джанин Глайста және Мэтт Фонтейн — бізге ақшаның құпияларын қызықты тілмен түсіндіреді.

   Маккена, Д. Сенің алғашқы миллионың [Мәтін] / Джеймс Маккена, Джанин Глайста, Мэтт Фонтейн. ; [ағыл. тіл. ауд. Г. Әбішева]. — Астана: Фолиант, 2025. — 144 б.

     Табысқа жету жолындағы алғашқы қадамыңның бастамасы. Бұл тек ақша туралы ғана емес, еңбек, табандылық, арман мен мақсатты жүзеге асыру жайлы мотивациялық ой. Әр адамның өз жолы бар, ал бұл жол — сеніммен басталып, еңбектену арқылы миллионға жетелейді. Ең бастысы — өзіңе деген сенім мен нақты қадам болу қажет.

     Қарапайым тілмен жазылған бұл кітап баланың қаржылай тәуелсіз және сауатты болып өсуіне, дұрыс қаржылық шешімдер қабылдауына және өз өмірі үшін жауапкершілікті сезінуіне көмектеседі.

     «Сенін, алғашқы миллионың» — қаржы, жинақ, инвестиция, шығындар мен кірістер туралы балаларға арналған алғашқы қазақ тіліндегі басылым. Кітапта қаржылық жағдайдың баланың қабілеттеріне және қабылдаған шешімдеріне байланысты екені айтылады. Сонымен қатар ақша жинаудың және пайда табудың жолдары көрсетіледі.

     Инвестиция дегеніміз не?

     Шығын неге кірістен аз болуы керек?

     1 000 000 жинау үшін қаржылық жоспар қандай болу қажет?

     Кітаптан қаржыға байланысты басқа да қызықты сұрақтарға жауап табуға болады.

     Балақай ендеше, ақша табудың қарапайым әдіс-тәсілдерін үйреніп ал. Сенің қолыңнан келеді. Қаржылық тәуелсіздікке қол жеткізудің және бизнес бастаудың қыр-сырын үйрен ақша жина. Шынында, миллионерлер — ақша жұмсайтын емес, ақша үнемдейтін адамдар. Сенің де миллионер сияқты ойлайтын уақытың келді кірісіңді көбеит. Қаржы әлеміндегі инвестиция және күрделі пайыз мөлшері терминдерімен танысып, оларды тәжірибеде қолдан.

    Алғашқы миллионыңа адал еңбекпен жет.

Құрметті жас оқырмандар!

     Бұл кітап — тек әскери техника мен дрон жайлы дерек емес, ол — ерлік пен намыс, отанға деген адалдық пен заманауи қаһармандардың шынайы бейнесін баяндайтын тағылымды еңбек. 

    Бұл туынды — қазіргі заманның батырлары туралы жазылған жас буынға үлгі болатын туынды. Технология мен рух, ұлттық сана мен жауынгерлік рух бір арнаға тоғысқан бұл кітап оқырманды терең ойға жетелеп, Отанды қорғаудың жаңа қырларын танытады. 

     Сіздердің назарларыңызға Неджати Акбабаның «Дрон сайыпқырандары» атты кітабын ұсынамыз.

     Акбаба, Н. Дрон сайыпқырандары. Жаңа өнертабыс [Мәтін] / Неджати Акбаба. ; [түрік тіл. ауд. Г. Файзулла]. — Астана: Фолиант, 2025. — 200 б.

     Неджати Акбабаның «Дрон сайыпқырандары» шығармасы. Ярен, Үміт және Окан — жақын достар. Үшеуі мектептің ең зерек оқушыларының қатарында. Олар қазір мектеп зертханасында дрон жасап жатыр. Үшеуінің арманы — нарықтағы қарапайым емес, көрінбейтін және өз-өзін қуаттайтын дрон ойлап табу.

     Мектептің бұзық балалары Неждет пен Кенан болса оларға қызғанышпен қарап, іздерінен аңдып, жобаларының күл-талқанын шығармақшы.

     Тіпті бірде олардың дронын құлатпақшы болып қауіпсіздік қызметкерлерінің аңшы дронына шабуыл жасады.

     Кенан мен Неждет қауіпсіздік қызметкерлеріне әрекеттерінің себебін қалай түсіндіреді? Ал дрон жасаушы үш дос алдарында кездескен қиындықтарды жеңіп шыға ала ма?

     Балалар осы сұрақтарға жауап беріп көрініздерші.

     Автор оқырманды түрік халқының рухы мен қайсарлығын, сондай-ақ болашақ соғыстардың сипатын терең ұғына білуге жетелейді. «Дрон сайыпқырандары» — жаңа буынды ұлттық мақтаныш пен жауапкершілікке баулитын әсерлі шығарма.

Құрметті балалар!

     Жапон халық ертегілері жапон мәдениетінің бай мұрасын бейнелейді. Жапон ертегілерінде табиғатқа деген сүйіспеншілік, адамгершілік құндылықтары, батырлық және әділдік сияқты тақырыптар кеңінен көрініс табады. Жапон ертегілері көбінесе адам мен табиғат арасындағы үйлесімділікке негізделген.

     Сіздердің назарларыңызға Хирошимадағы Жапония-Евразия ұйымының, Жапония фольклортанушылар ассоциациясының, Евразия Жазушылар Одағының мүшесі, жапонта- нушы Шарафат Жылқыбаеваның аударуымен «Жапон ертегілері» атты кітабын ұсынамыз. Бұл қызыққа толы ертегі кітабы Жапон тілінен аударылған.

    Жылқыбаева, Ш. Жапон ертегілері [Мәтін] / Шарафат Жылқыбаева. ; [жапон тілінен ауд. Ш. Жылқыбаева]. — Алматы: Балалар әдебиеті, 2025. — 420 б.

     Бұл кітапта Жапонияға кең тараған ертегілер топтастырылған.

     Солтүстігіндегі Хоккайдодан бастап оңтүсгігіңдегі Окинаваға дейінгі Күншығыс аралдарыңда айтылатын қиял-ғажайып, батырлық, тұрмыс-салт, аң-құс, хайуанаттар туралы ертегілердің барлығы түпнұсқадан тікелей аударылған. Кітапқа сондай-ақ «Урашиматароу», «Ханасакаджиисан», «Кинтароу», «Иккюсан», «Ақыдды қоян», «Иссунбоуши», «Умихико мен Ямахико», «Момотароу» сияқты жапон префектураларына кең тараған ертегілер де енгізілген. Бұл ертегілерде батырлық пен адамгершілік қасиеттерін дәріптейтін оқиғалар баяндалады. Әр ертегінің өзіне тән ерекше кейіпкерлері мен сюжеттері бар.

     Жапон мұралары:

     Жапон халық ертегілері ұрпақтан ұрпаққа жалғасып келе жатқан мәдени мұра болып табылады. Бұл ертегілер жапон халқының дәстүрлері мен салт-дәстүрлерін сақтап, оларды кейінгі ұрпаққа жеткізеді. Сонымен қатар, жапон ертегілері әлем әдебиетінде де үлкен орын алады және көптеген тілдерге аударылған.

     Бұл әдемі ертегілер тек — балаларға ғана емес, ересекетрге де ой салар рухани қазына. Олай боласа сіздерді рухани, бай ертегілерді оқуға шақырамын.

Құрметті оқырмандар!

     Әр бір жанның жүрегінде әке сөзі ерекше орын алады. Әке — отбасының тірегі, баланың қорғаны, өмірдің бастапқы бағдаршамы іспетті. Оның әрбір айтқан ақылы, әрбір жасаған ісі балаға бағыт, отбасыға тұғыр. Әке тек асыраушы ғана емес, ол үлгі, тәрбие, мінез мектебі. Оның маңдай тері мен маxаббаты, үнсіз жанашырлығы мен өмірлік сабыры әр перзенттің жүрегінде өшпес із қалдырады. Әке туралы сөз — мейірім мен құрметке толы шынайы алғыс пен қадірлеудің көрінісі.

     Әке деген биік шыңы адамның,
     Әке деген — тірегі ғой ғаламның.

     Сіздердің назарларыңызға түріктің көрнекті жазушысы Орхан Кемалдың ең сүйікті танымал болған кітаптарының бірі «Әке үйі» романын ұсынамыз.

  Кемал, О. Әке үйі [Мәтін] : роман / Орхан Кемал. ; [түрік тіл. ауд. Ж. Мақсұтхан]. — Алматы: Балалар әдебиеті, 2025. — 128 б.

Бұл жазушының 2 кітаптан түратын «Кішкене адамның романы» кітабының алғашқысы. Кітапта балалық шақтан бозбалалық жас аралығын ең көркем түрде бейнелеген шығарма.

     Түрік әдебиетінің аса көрнекті өкілдерінің бірі Орхан Кемалдың «Әке үйі» (Baba Evi, 1949) романы — жазушының автобиографиялық шығармаларының алғашқысы. Роман оның «Балапан шақ — жастық кезең» циклінің бастамасы саналады және жазушының өмірлік жолын, әлеуметтік ортаның адам мінезіне әсерін, кедейлік пен әділетсіздікпен күрес тақырыптарын терең суреттейді.

     Шығарма бас кейіпкердің балалық шағынан басталады. Оның әкесі — әділетсіздікке төзбейтін, бірақ мінезі қайшылыққа толы, жиі қудалауға ұшырайтын қоғам қайраткері. Әкенің күрделі мінезі, отбасылық қиындықтар, тұрмыс таршылығы баланың психологиясына үлкен әсер етеді. Бала қай жерде тұрақтап өмір сүрсе де, тағдыры біртіндеп әлеуметтік әділетсіздікпен бетпе-бет келіп, өзін және өз орнын іздеуге ұмтылады.

     Шығармада әкенің тұлғасы әрі шабыт көзі, әрі ауыр сабақ ретінде суреттеледі. Кейіпкердің өмір жолы арқылы Орхан Кемал қоғамдағы таптық айырмашылықтарды шынайы бейнелейді. Роман қиындықтарға қарамастан, адамдық қадір мен сенімнің жоғалмауы туралы.

     Орхан Кемалдың тілі қарапайым, шынайы, жылы. Ол күнделікті өмірдің ішкі драмасын асыра көрсетпей, өмірдің өзінен алынған көріністермен әсерлі жеткізеді. Бұл роман да жазушыға тән гуманистік және реалистік бағытта жазылған.

     Оқырманға жеңіл әрі әсерлі оқылады. Автордың өз өмірінен алынғандықтан, оқиға өте табиғи және сенімді. Түрік қоғамының ХХ ғасыр басындағы әлеуметтік ахуалын түсінуге мүмкіндік береді.

     «Әке үйі» — Орхан Кемалдың шығармашылық әлеміне кіретін тамаша бастау. Бұл — тек әке мен бала туралы роман емес, адамның өмір жолын, оның қалыптасуы мен күресін ашатын терең туынды. Шынайылық, жылы адамгершілік пен өмірлік сабақтарға толы бұл кітап көптеген оқырмандардың жүрегіне жол тапқан.

     Оқырман бұл кітап сіздердің жүректеріңізден орын алар кітап екені белгілі. Олай болса «Әке үйі» романын оқуға шақырамыз.